ከሳ 17:1-7

ዛላፐ ሃይ ፑልቴዳ

1 እስራኤለቱዋ ማባራ ኡባይ መና ጎዳይ አዛዜዳዋዳን፥ እት ሳኣፐ ሀራ ሳኣ ዩዪደ፥ ሲን መላ ቢታፐ ደንድ ቢደ፥ ራፍዲማ ጌተትያ ሳኣን ኡቴድኖ። ሽን አሳይ ኡሻናዉ ሃይ ሄ ሳኣን ዬዳ። 2 ኡንቱንቱ ሙሴና ዋላቀቲደ አ፥ "ኑዉ ኡሻናዉ ሃ እማ" ያጌድኖ።

ሙሴ ዛሪደ፥ "ህንተንቱ ታናና አያዉ ዋላቀቲቴ? መና ጎዳ ህንተንቱ አያዉ ፓጪቴ?" ያጌዳ።

3 ሽን አሳይ ያን ሃ ሳመቲደ፥ ሙሴ ቦላ ዙዙሜድኖ። ኡንቱንቱ አ፥ "ኔን ኑና፥ ኑ ናናነ ኑ መህያ ሳሙዋን ዎናዉ ግብጼፐ ከሳደ ፑደ አያዉ አሃድ?" ያጌድኖ።

4 ሙሴ፥ "ታን ሀ አሳ ዋቶ? ኡንቱንቱ ታና ሹቻን ጫዳና ሀኒኖ" ያጊደ መና ጎዳኮ ዋሴዳ።

5 መና ጎዳይ ሙሳ፥ "ኔን አሳፐ ስንዉ ሀመታ፤ እስራኤልያ አሳ ጭማቱዋፐ ኔናና አፋ፤ እን ኔን ናይለ ሻፋ ሃ ሾጬዳ ጻምኣ ነ ኩሽያን ኦይቃደ ባ። 6 ታን ሲና ደርያ ዛላ ቦላ ነ ስንን ኤቃና፤ ኔን ሄ ዛላ ሾጫ፤ አሳይ ኡሻናዉ አፐ ሃይ ከሳናዋ" ያጌዳ። ሙሴ እስራኤልያ ጭማቱዋ ስንን ሄዋዳን ኦዳ።

7 እስራኤላቱ፥ "መና ጎዳይ ኑ ግዶን ደኢየ ባዌ?" ያጊደ ዋላቀቴዳ ድራዉነ መና ጎዳ ፓጬዳ ድራዉ፥ ሄ ሳአይ ማሳሀነ ማሪባ ጌተቲደ ሱንቴዳ።