ከሳ 35

ሳምባታ ቦንችያ ዎጋ

1 ሙሴ እስራኤልያ አሳ ሽቁዋ ኡባ ሺሺደ ሀዋዳን ያጌዳ፤ "ህንተንቱ ኦና ማላ፥ መና ጎዳይ አዛዜዳዌ ሀዋ: 2 ሳምንታ ግዶን ኡሱፑን ጋላሳ ኪታ ኪተትተ፤ ሽን ላፑን ጋላሳይ ህንተንቶ ጌሻ ጋላሳ፤ መና ጎዳዉካ ሸምፖ ሳምባታ። ሄ ጋላሳን አይ ኦሶነ ኦያ ኡራይ ኦንነ ሀይቃናዉ በሴ።✝35:2 ከሳ 20:8-11፤ 23:12፤ 31:15፤ 34:21፤ ዎጋ 23:3፤ ዛረ. 5:12-14 3 ሳምባታ ጋላሳን ህንተንቱ ሶን ሶን ታማ ኤፕተ" ያጌዳ።

ጾሳ ዱንካንያ ኦሶ ሺሽያ ሚሻ

4 ሙሴ እስራኤልያ ማባራዉ ሙልያዉ ሀዋዳን ያጌዳ፤ "መና ጎዳይ ሀዋዳን ያጊደ አዛዜዳ: 5 ህንተንቶ ደእያዋፐ መና ጎዳዉ እምያዋ አህተ፤ መና ጎዳዉ እምያዋ አሀናዉ ኮይያ ኦንነ ዎርቃ፥ ብራ፥ ናሃስያ፥ 6 ሳሉዋ ማላትያ ቃጭና፥ ኦቻ ቴራ ማላትያ ቃጭና፥ ሾሎላ ዞኦ ቃጭናነ ሊቆ ሱፍያ፥ ዴሻ ጋልባ፥ 7 ዶርሳ ኮልያ ጋልባ ዞኦ ቃላምያን የግ ከሴዳዋ፥ ቁምእያ፥ ኦዶሩዋ፥ 8 ጾምፕያዉ ዎጋራ ዛይትያ፥ ኦከትያ ዛይትያነ እጻና ሳዌያ ቅማምያ፤ 9 ኤፉድያንነ ትራን ዎያዋን የግያ ማርግድያ ጌተትያ ሹቻቱዋነ ሀራ ጶልያ አልኦ ሹቻቱዋ አሆ።

ጾሳ ዱንካንያ ኦናዉ እመቴዳ አዛዙዋ

10 "ህንተንቱ ግዶን ደእያ ኩሽያ ሂላ ኤራንቻ ኡባቱ ዪደ፥ መና ጎዳይ አዛዜዳ ኡባ ኦኖ: 11 መና ጎዳ ዱንካንያ፥ አ ካምያ ዱንካንያነ አ ካምያዋ፥ ኦይቂያዋ፥ ጻጋገቱዋ፥ ሽካላቱዋ፥ ቱሳቱዋነ ኡንቱንቱ ኤቂያ ሉኮቱዋ፥ 12 ታቦታነ አ ቶክያ ካሱዋ፥ አቶ ግያ ሳኣ ቁምእያዋነ ታቦታ ገንያ ጋርዱዋ፤ 13 ጻርጴዛነ አ ቶክያ ካሱዋ፥ አ ሚሻቱዋ ኡባነ ጾሳ ስንን ዎያ ጌሻ ኡክ፤ 14 ጾምፕያ ዎያ ባላነ አን ማራና ደእያ ጾምፐቱዋ፥ ሚሻቱዋ፥ ጾምፕያ ዛይትያ፥ 15 እጻና ጩዋይያ ሳጽንያነ አ ቶክያ ካሱዋ፥ ኦከትያ ዛይትያነ ሳዊያ እጻና፥ ጾሳ ዱንካንያ ፐንግያ ጋርዱዋ፤ 16 ጹግያ ያርሹዋ ያርሽያ ሳኣነ አ ናሃስያ ዛዝርያ፥ አ ቶክያ ካሶቱዋነ አ ሚሻቱዋ ኡባ፥ ናሃስያፐ ኦሰቴዳ ሜቻ ከርያነ አ ዎያዋ፤ 17 ሶይ ዳባባ ጎዳ ጋርዳቱዋ፥ ቱሳቱዋነ ኡንቱንቱ ገደቱዋ፥ ዳባባ ሶ ግዶ ገልያ ፐንግያ ጋርዱዋ፤ 18 ጾሳ ዱንካንያ ግያ ሽካላቱዋ፥ ዳባባ ግዶ ገቱዋ ኡንቱንቱ ዎዶሮቱዋ፤ 19 ጌሻ ሳኣን ኦደ ጎኤታናዉ ዳደቴዳ ማዮቱዋ፥ ቄሲ አሮነ ማይያ ጌሻ ማዩዋ አ ናናይ ቄሰተ ኪታ ኦደ ማይያ ማዩዋ መኖ" ያጌዳ።

አሳይ አሄዳ እሞታ

20 ሄዋፐ ጉይያን እስራኤልያ ማባራይ ኡባይ ሙሴ ስንፐ ከሴዳ። 21 እማናዉ ኮዬዳዋንቱነ ኡንቱንቱ ዎዛናይ ኡንቱንታ እማ እማ ጌዳዋንቱ ኡባይ ዬድኖ፤ መና ጎዳ ዱንካንያዉ፥ አ ግዶን ኦያ ኦሱዋ ኡባዉነ ጌሻ ማዮ ኮሽያዋ ኡባ አሄድኖ። 22 እማና ኮዬዳ አቱማዋ ኡባይነ ማጫዌ ኡባይ ዪደ፥ ዎርቃፐ መዳ አሌቂያዋንታ፥ ሀይ ጉድቻቱዋ፥ ምግዳቱዋ፥ ሀራ ዎርቃ አሌቂያዋንታ አሂደ መና ጎዳዉ እሞታ ኦደ እሜድኖ። 23 ሳሉዋ ማላትያ ቃጭናይ፥ ኦቻ ቴራ ማላትያ ቃጭናይ፥ ሾሎላ ዞኦ ቃጭናይ፥ ዎይ ሊኑዋ ጌተትያ ሊቆ ቃጭናይ፥ ዎይ ዴሻ አጎዛ፥ ዶርሳ ኦርግያ ጋልባ ዞኦ ቃላምያን የግ ከሴዳዌ፥ ዎይ ማንቻላይ ደእያ አሳይ ኡባይ አሄዳ። 24 ብራ ዎይ ናሃስያ እማናዉ ዳንዳይያ ኡባይ ባረንቱ እሙዋ መና ጎዳዉ እሜድኖ፤ ቃይ ኦዶሩ ደእያ አሳይ ኡባይ ዱማ ዱማ ኦሶ ኦዶሩዋ አሄዳ።

25 ኩሽያ ሂላ ኤርያ ማጫ አሳይ ኡባይ ባረንቱ ኩሽያን ሱቄዳ ሳሉዋ ማላትያ ቃጭና፥ ኦቻ ቴራ ማላትያ ቃጭና፥ ሾሎላ ዞኦ ቃጭናነ ሊቆ ሊኑዋ አሄድኖ። 26 ቃይካ እሙዋ እማናዉ ኮዬዳ ማጫ አሳይ ኡባይ ዴሻ አጎዛ ዳዴድኖ። 27 ካፓቱ ኤፉድያንነ ትራን ዎያዋን ዎያ ማርግድያነ ሀራ ቦንቼቴዳ ሹቻቱዋ አሄድኖ። 28 ኡንቱንቱ ቃይካ ጾምፕያዉ፥ ሳዊያ እጻናዉነ ኦካናዉ ሀንያ ዎጋራ ዛይትያነ ቅማምያ አሄድኖ። 29 እስራኤላቱ አሳይ ኡባይ፥ አቱማዌነ ማጫዌ፥ ኡንቱንቱ ኦናዳን መና ጎዳይ ሙሴ ባጋና አዛዜዳ ኦሶ ሀንያ እሙዋ ኡባ ባረንቱ ሸንያን መና ጎዳዉ አሄድኖ።

ጾሳ ዱንካንያ ኦያ ኩሽያ ሂላንቻቱዋ

30 ሙሴ እስራኤልያ አሳ ሀዋዳን ያጌዳ፤ "በእተ፤ መና ጎዳይ ይሁዳ ዛርያፐ ሁራ ናኣ ናኣ፥ ኡራ ናኣ፥ ባጻልኤላ ዶሬዳ። 31 መና ጎዳይ አ ጾሳ አያናን፥ ሂላን፥ አኬካንነ ኦሱዋ ኡባ ኦያ ኤራን ኩንዳ። 32 ሄዌካ ሂላን ኪታ ሀልቹዋ ከሲደ፥ ዎርቃፐ፥ ብራፐነ ናሃስያፐ ዱማ ዱማባ እ ኡዳናሳ። 33 ሄዋዳንካ፥ አልኦ ሹቻ ማሲደ ጊግሳናሳ፤ ም ማሳናሳነ ኡባ ቆሞ ኦሱዋ ሂላን ኦናሳ። 34 ሄዋ ቦላካ ቃይ አስነ ዳና ዛርያ አህሳማካ ናኣ ኦሆልኣባዉ፥ ሀራ አሳ ታማርስያ ኤራ እሜዳ። 35 ኡንቱንቱ ኡባ ቆሞ ኦሱዋ ኦናዳን፥ ሂላን ኦያዋንታ፥ ኦሱዋ ሀልቹዋ ከስያዋንታ፥ ሳሉዋ ማላትያ ቃጭናን፥ ኦቻ ቴራ ማላትያ ቃጭናን፥ ሾሎላ ዞኦ ቃጭናንነ ሊኑዋ ቃጭናን አሌቁዋ ዳድያዋንታነ ሸማይነቱዋ ግዳናዳን፥ ጾሳይ ኡንቱንቱ ኤራተን ኩንዳ። ኡንቱንቱ ኡባይካ ኡባ ቆሞ ኦሱዋ ሉጺደ ኤርያ ኤራንቻ ግዴድኖ።