ከሳ 22

አሳይ ባረዉ ደእያዋ ናግያ ዎጋ

1 "እት አሳይ ቦራ ዎይ ዶርሳ ዉኢደ ሹኮፐ፥ ዎይ ዛልኦፐ፥ ቦራ ድራዉ እቼሹ ቦራ፥ ዶርሳ ድራዉ ኦይዱ ዶርሳ ጭጎ።

2 "ካይሱ ጎልያ ቦኪደ ኦይቀቶፐነ ሾጨቲደ ሀይቂንቶ፥ ሾጬዳዌ ሱ ጉሴዳዎ ኦሸተና። 3 ሽን ሄዌ ጻልቂ ዶል ክችና ሀኖፐ፥ እ ሄ ጉኬዳ ሱ አጩዋን ኦሸቴ። ካይሱ ባረ ዉኤዳዋ ዛሮ፤ ሽን አዉ አያይነ ዮፐ፥ ባረ ዉኤዳዋ ዛራናዉ እ ዛልኤቶ። 4 እ ዉኤዳ መሂ ፓጻ ደኢደ አ ኩሽያን ቤትንቶ፥ ቦራ፥ ዎይ ሀርያ፥ ዎይ ዶርሳ ግዶፐነ፥ እ ባረ ዉኤዳዋ ላኡ ኩሽያ አደ ጭጎ።

5 "እት አሳይ ባረ መህያ ደምባን ዎይ ዎይንያ ቱራ ግዶን ሄምሽን፥ መሂ ሀራ አሳ ሾይቃፐ ሞፐ፥ እ ባረ ሾይቃፐ ዎይ ባረ ዎይንያ ቱራ ኡባፐ ሎእያዋ አፍላማ ጭጎ።

6 "ጻራጋይ ደንዲደ አጉን ቡራና ላኢደ፥ ዶርያን ደእያ ካ፥ ዎይ ኤቁዋን ደእያ ካ፥ ዎይ ጎሻ ኡባ ምያዋ ግዶፐ፥ ኮይሮ ጻራጋ ኦይዳ ብታኒ አጫ ጭጎ።

7 "እት አሳይ ብራ ዎይ ሀራ ሚሻ ናግሳናዉ ባረ ሾሮ ሀዳራ እምና፥ ሾሩዋ ሶፐ ሄ ሚሻይ ዉኤቶፐነ ካይሱ ኦይቀትንቶ፥ ካይሱ ሄ ሚሻዉ ላኡ ኩሽያ አደ ጭጎ። 8 ሽን ካይሱ ቤተናን ዮፐ፥ ጎልያ ጎዳይ ፕርድያዋንቱኮ ሺቂደ ባረ ሾሩዋ ሚሻ ቦላ ባረ ኩሽያ ዎቤናዋ ጫቆ።

9 "አሳይ አይ ሞቱዋንካ፥ ቦራ ጋሱዋን፥ ዎይ ሀርያ ጋሱዋን፥ ዎይ ዶርሳ ጋሱዋን፥ ዎይ ማዩዋ ጋሱዋን፥ ዎይ ሀራ ባዬዳዋ ጋሱዋን፥ ‘ሀዌ ታዋ’ ጊደ ሞተቶፐ፥ ላኡ ባጋይካ ባረንቱ ሞቱዋ ፕርድያዋንቱ ስን አኖ፤ ፕርድያዋንቱ ባይዛንቻ ጌዳ ኡራይ ባረ ሾሮ ላኡ ኩሽያ አደ ጭጎ።

10 "አሳይ ባረ ሾሮ ሀርያ፥ ዎይ ቦራ፥ ዎይ ዶርሳ፥ ዎይ ሀራ መህያ ናግሳናዉ ሀዳራ እምና ሀይቂንቶ፥ ዎይ ደሸትንቶ፥ ዎይ ኦንነ በኤናን ቦንቃንቻይ አፎፐ፥ 11 ሀዳራ ናግያዌ ባረ ሾሩዋ መህያ ቦላ ባረ ኩሽያ ዎቤናዋ መና ጎዳ ስንን ጫቂና፥ ኡንቱንቱ ግዶን ደእያ የዉ ማየቶ። ሄ መህያ ጎዳይ ጫቁዋ አኮ፤ ጭጋ እማናዉ ኮሸና። 12 ሽን መሂ ሾሩዋፐ ዉኤቴዳዋ ግዶፐ፥ እዛዎ ጭጎ። 13 ሄ መህያ ዶአይ መንሬደ ሜዳዋ ግዶፐ፥ ማርካ ግዳናዳን ዶአይ ሚሽን አቴዳዋፐ አኪደ ዮ፤ ያቲደ መኤረቴዳ መህያ ድራዉ ጭጎፖ።

14 "አሳይ ባረ ሾሩዋፐ መህያ ጋርጾፐነ አ ጎዳይ ባይና ሳኣን ሄ መሂ ደሸቶፐ ዎይ ሀይቆፐ፥ ሄ መህያ ጭጎ። 15 ሽን አ ጎዳይ አናና ደኦፐ፥ ጋርጼዳዌ ጭጎፖ፤ ከራዉ አኬዳዋ ግዶፐ፥ ከራዉ ጭግያ ሻሉ አጩዋ ጭጌዳ።

ጌሻ ደኡዋነ አማኑዋ ዎጋ

16 "እት አሳይ አስናዉ ጊጋቤና ዎዶራቶ ጭሚደ፥ እዝና ግስያዋ ግዶፐ፥ እዞ ጭሎሺደ ባረዉ ማቻቶ ኦ።✝22:16-17 ዛረ. 22:28-29 17 እዝ አቡ እዞ አዉ እማናዉ እጾፐ፥ ዎዶራቶ አክያ ኡራይ ጭሎሽያዋ ኬሻ ብራ እ አቦ እሞ።

18 "ብትያ ምሽራቶ ፓጻ ዎፓ።✝22:18 ዛረ. 18:10፣ 11

19 "መህያና ግስያ ኦንነ ቱሙፐ ሀይቆ።✝22:19 ዎጋ 22:19፤ 20:15-16፤ ዛረ. 27:21

20 "መና ጎዳ ጻላላሳፐ አትና፥ ሀራ ጾሳዉ ያርሽያዌ ኦንነ ሙለ ዮ።✝22:20 ዛረ. 17:2-7 21 በቲደ ዬዳ አሳ ቆሆፕተ ዎይ ኡንኦፕተ፤ አያዉ ጎፐ፥ ህንተንቱካ ግብጼ ጋድያን በተ ግዲደ ደኤድታ።✝22:21-22 ከሳ 23:9፤ ዎጋ 19:33-34፤ ዛረ. 24:17-18፤ 27:19 22 አስናይ ሀይቄዳ አምአቶነ አዉ ሀይቄዳ ህዬሳ ኡንኦፕተ። 23 ህንተንቱ ኡንቱንታ ኡንኤና፥ ኡንቱንቱ ታኮ ዋሶፐ፥ 24 ታን ኡንቱንቱ ዋሱዋ ቱሙፐ ስሳና፤ ሄ ዎደ ታ ሀንቁ ህንተንቱ ቦላ ደንዳና፤ ታን ህንተንታ ማሻን ዉርሳና፤ ህንተንቱ ማቻቱ አምኤ ህንተንቱ ናናይካ አዉ ሀይቆዋንታ ግዳናዋንታ።

25 "ህንተንቱ ግዶን ደእያ ታ አሳፐ እት ህዬሳዉ ሻሉዋ ታልኦፐ፥ ሻሉዋ ድቻዉ እምያ አሳዳን ሀኖፕተ፤ ኔን ድቻ አ ኦቾፓ።✝22:25 ዎጋ 25:35-38፤ ዛረ. 15:7-11፤ 23:19-20 26 ኔን አጩዋ ድራዉ ነ ላግያ ማዩዋ ኦይቆፐ፥ አዋይ ዉለናን ደእሽን አዉ ዛራ፤✝22:26-27 ዛረ. 24:10-13 27 አያዉ ጎፐ፥ እ ባረ ቦላ ካምያዌ ሄን ጻላላና፤ ሀራባ አያ ማዪደ አቃናዉ ዳንዳዪ? እ ታዉ ዋሶፐ፥ ታን ቃረትያዋ ግድያ ድራዉ፥ ስሳና።

28 "ጾሳ ቦላ ሸቃ ቃላ ሃሳዮፓ፥ ዎይ ነ ደርያ ሞድያዋ ሸቆፓ።✝22:28 ኪታ 23:5 29 ነ ካ ጼራፐነ ነ ዎይንያ ጉምኤ ኩመንፐ ታዉ ያርሹዋ ሺሻ።

"ኔን ነ አቱማ ናና ግዶን ባይራትያ ናኣ ታዉ እማናዉ ኮሼ። 30 ሚዛፐካ ዶርሳፐካ ሄዋዳን ኦ። ኡንቱንቱ ላፑን ጋላሳይ ጋካናዉ፥ ባረንቱ አየቱዋና አየቱዋና ጋምእኖ፤ ሆስፑን ጋላስ ኡንቱንታ ታዉ እማ።

31 "ህንተንቱ ታዉ ጌሻ አሳ ግዳናዉ ኮሼ፤ ሄዋ ድራዉ፥ ባዙዋ ዶአይ መንሬደ ዎዳ መህያ አሹዋ ሞፕተ፤ ሄዋ ካናዉ ኦልተ።✝22:31 ዎጋ 17:15