ከሳ 26

ጾሳ ዱንካንያ

1 "ቃይ ሊቆ ፑቱዋፐ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳደቴዳ ታሙ ጋርዳቱዋ ጾሳ ዱንካንያ ጊግሳ። ሄ ጋርዳቱዋን እት ሂላን ክሩበቱዋ ምስልያ ዳድሳ። 2 ጋርዶቱ ኡባይ እት ልከ ግድኖ፤ ጌሳይ ላታማነ ሆስፑን ዋ፤ ጎምፓይ ኦይዱ ዋ ግዶ። 3 እቼሹ ጋርዳቱዋ እትፐ ጋደ ስካ፤ የንኮ አቴዳ እቼሹ ጋርዳቱዋካ ኡንቱንቱዋዳን ኪተታ። 4 እትፐ ጋከቲደ ስከቴዳ ጋርዳቱዋፐ እት ጋርዱዋ ዉርሰ ጋጻን ሳሉዋ ማላትያ ጫርቂያፐ ማጫራ መ፤ ቃይ እትፐ ጋከት ስከቴዳ የንኮ ጋርዱዋንካ ሄዋዳን ኪተታ። 5 እትፐ ጋከቴዳ እት ጋርዱዋ ቦላ እሻታሙ ማጫራ፥ ቃይ እትፐ ጋከቴዳ የንኮ ጋርዱዋ ቦላካ እሻታሙ ማጫራ መ፤ ሄ ማጫራቱ ኡባይካ እቱ እቶ ማራን ደእኖ። 6 ሄዋፐ ጉይያን ዎርቃፐ እሻታሙ ኦይቂያዋንታ መደ ጾሳ ዱንካኒ እቱዋ ግዳና ማላ፥ ሄ ጋርዳቱዋ ጋጻ ጋጻ ሄ ኦይቂያዋንቱን ኦይ።

7 "ቃጭናፐ መቴዳ ጾሳ ዱንካንያ ቦላና ካማና ማላ፥ ታማነ እት ጋርዳቱዋ ዴሻ እስክያፐ ዳዳደ፥ እት ዱንካንያ መ። 8 ታማነ እት ጋርዳቱካ እት ልከ ግድኖ፤ እት እት ጋርዱዋ ጌሳይ ሀታሙ ዋ፥ ጎምፓይ ኦይዱ ዋ ግዶ። 9 እቼሹ ጋርዳቱዋ እት ባጋና፥ ኡሱፑን ጋርዳቱዋ ቃይ የንኮ ባጋና ጋደ ስካ። ኡሱፑን ጋርዱ ዳኮቲደ፥ ዱንካንያዉ ስን ባጋና ዳቡለቶ። 10 ጋ ስኬዳ ጋርዳቱዋፐ እት ጋርዱዋ ጋጻን እሻታሙ ማጫራ መ፤ ቃይ ጋ ስኬዳ የንኮ ጋርዳቱዋፐ ጋጻን እሻታሙ ማጫራ መ። 11 እሻታሙ ናሃስያ ኦይቂያዋ መደ፥ ማጫራቱዋ ግዶ ገልሳ፤ ያታደ ዱንካንያ እትፐ ጋ ኦይ። ያቶፐ ሀ ላኡ ኦይቀቴዳ ካምያዋንቱ እቱዋ ግዳና። 12 ሀ ዱንካንያ ጋርዳቱዋፐ ፓላሄዳ ባጋ ጋርዱ ጾሳ ዱንካንያዉ ጉየና ካቀቶ። 13 ዱንካንያ ጋርዶቱ ላኡ ባጋናካ እት እት ዋ ኬሻ ፓላህኖ፤ ሄ ፓላሄዳዋንቱ ጾሳ ዱንካንያ ካማና ማላ፥ ላኡ ባጋ ምይያና ካቀትኖ።

14 "ዴሻ አጎዛፐ መቴዳ ዱንካንያ ቦላና ካማናዉ ዶርሳ ኦርግያ ጋልባ ዞኦ ቃላምያን የግ ከሴዳዋ ጊግሳ፤ ቃይ አ ቦላና ካማናዉ ቁምእያ ሀራ ጋልባፐ ጊግሳ።

15 "ጾሳ ዱንካንያ ጻጋግያዋንታ ስት ጌዳ ኦዶሩዋፐ ከሳ። 16 እት እት ጻጋግያዉ ጌሳይ ታሙ ዋ፥ ጎምፓይ እት ዋነ ባጋ ግዶ። 17 እት እት ጻጋግያዉ እቱዋ እቱዋና ጋ ኦይያ ላኡ ፖ መ። ጾሳ ዱንካንያ ጻጋገቱዋ ኡባካ ሄዋዳን ኪተታ፤ 18 ጾሳ ዱንካንያዉ ገድሳ ባጋና ላታሙ ጻጋግያዋ መ። 19 እት እት ጻጋግያዉ ላኡ ፖይ ገልያ ኦይታሙ ሉኩዋ፥ ኡባካ ብራፐ ጊግሳ። 20 ጾሳ ዱንካንያዉ ሁጲሳ ባጋና፥ ላታሙ ጻጋግያዋ መ። 21 እት እት ጻጋግያዉ ላኡ ገደቱ፥ ሙለ ኦይታሙ ገደቱ፥ ብራፐ ጊግኖ። 22 ቃይ ጾሳ ዱንካንያዉ ጉየ ጋጻን አዋይ ዉልያ ባጋና ኡሱፑን ጻጋግያ መ። 23 ጉየን ደእያ ጋጻቶ ላኡ ጻጋግያ ጊግሳ። 24 ሄዋ ድራዉ፥ እት ጻጱዋን ላኡ ፖ ጊጋ ጼራ ጋካናዉ እታ ግድ ምግዱዋን ኦይቀታናዉ በሴ፤ ላኡ ጋጻ ኦይያ ጻጋጋቱካ ሀራ ጻጋጊ ኦሰቶዋዳን ኦሰታናዉ በሴ። 25 ሄዋ ድራዉ እት እት ጻጋግያዉ ጋርሳና ላኡ ላኡ ፖይ ገልያ ሉካቱ ደኢኖ፤ ኡባና ሆስፑን ጻጋገቱነ ብራፐ ኦሰቴዳ ታማነ ኡሱፑን ፖይ ገልያ ሉካቱ ደኢኖ።

26 "ቃይ ኦዶሮቱዋፐ ቱቁመትያ ሜጋ ከሳ። ጾሳ ዱንካንያዉ እት ባጋ ምይያን ደእያ ጻጋገቶ እቼሹ ቱቁመትያ ሜጋ፥ 27 ቃይ የንኮ ባጋ ምይያን ደእያ ጻጋገቶ እቼሹ ቱቁመትያ ሜጋቱዋ ጊግሳ። ሄዋዳንካ፥ ጾሳ ዱንካንያዉ ጉየ አዋይ ዉልያ ባጋና ዉርሰ ጋጻን ደእያ ጻጋገቶ እቼሹ ቱቁመትያ ሜጋ መ። 28 ግዶ ቱቁመትያ ሜጋይ ጻጋገቶ ግዶ ሄራና ሀ ጋጻፐ ያ ጋጻ ጋካናዉ ፕን ከሳናዉ ኮሼ። 29 ጻጋገቱዋ ዎርቃን ሼሻደ፥ ቱቁመትያ ሜጋቱ አያ ሳጋየቱዋ ዎርቃፐ መ፤ ቃይ ቱቁመትያ ሜጋቱዋካ ዎርቃን ሼሻ። 30 ጾሳ ዱንካንያ ታን ኔና ደርያ ቦላን በሴዳዋዳን ኦደ ቶካ።

31 "ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ እት ጋርዱዋ ኪተታ፤ ሄ ጋርዱዋ ቦላ እት ሂላን ክሩበቱዋ ምስልያ ስክሳ። 32 ያታደ ዎርቃን ሼሼዳ ኦይዱ፥ ኦዶሩዋ ቱሳቱዋን ደእያ ዎርቃፐ ኦሰቴዳ ካቂያዋን ካቃ። ሄ ኦይዱ ቱሳቱ ብራፐ መዳ ኦይዱ ፖይ ገልያሳን ገልኖ። 33 ሄ ጋርዱዋ ጾሳ ዱንካንያ ካራን ደእያ ኦይቂያዋንቱፐ ጋርሳና ካቄዳ፥ ቃላ ጫቁዋ ታቦታ ጋርዱዋፐ ጉየ ባጋን ዎ፤ ያቶፐ ሄ ጋርዱ ጌሻ ሳኣ ኡባፐ አዳ ጌሻ ሳኣፐ ሻካና።✝26:33 እብራ. 6:19፤ 9:3-5 34 አቶ ግያ ሳኣ ቁምእያ ኡባፐ አዳ ጌሻ ሳኣን ደእያ ቃላ ጫቁዋ ታቦታ ቦላ ዎ። 35 ጻርጴዛ ጋርዱዋፐ ካረና፥ ጾሳ ዱንካንያን ጌሻ ሳኣ ግዱዋን ሁጲሳ ባጋን ዎ፤ ጾምፕያ ዎያ ባላ ቃይ አ ባጋን ገድሳ ባጋና ዎ።

36 "ዱንካንያ ገልያ ፐንግያዉ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ጽልፕያን አሌቅስያዋን ኦሰቴዳ ጋርዱዋ መ። 37 ጋርዱዋ እቼሹ ቱሳቱዋ ኦዶሮቱዋፐ ከሳደ፥ ዎርቃን ሼሻ፤ ካቂያዋንቱካ ዎርቃፐ ኦሰቴዳዋንታ ግድኖ፤ ቱሳቶ ናሃስያ ብራታፐ ትጋደ እቼሹ ፖቱ ገልያዋ መ።