ከሳ 6

1 ሄዋፐ ጉይያን መና ጎዳይ ሙሳ፥ "ታን ግብጼ ካትያ ኦናባ ኔን ሀእ በአና፤ ታ ዎልቃማ ኩሽያ ጋሱዋን እ ኡንቱንታ የዳናዋ፤ ታ ዎልቃማ ኩሽያ ጋሱዋን እ ኡንቱንታ ባረ ጋድያፐ ላጊደ ከሳና" ያጌዳ።

ሙሴ ጼሳ

2 ጾሳይ ቃይካ ሙሳ፥ "ታን መና ጎዳ፤✝6:2-3 ዶመ 17:1፤ 28:3፤ 35:11፤ ከሳ 3:13-15 3 ታን አብራሃመዉ፥ ይሳቃዉነ ያቆባዉ ኡባ ዳንዳይያ ጾሳ ግዳደ ቆንጫድ፤ ሽን ታን፥ መና ጎዳ ግያ ታ ሱንን፥ ታናተ ኡንቱንታ ኤርሳበይከ። 4 ቃይ ታን ኡንቱንቶ ኡንቱንቱ በተ ግዲደ ደኤዳ ካናነ ጋድያ እማናዉ ታ ቃላ ጫቁዋ ኡንቱንቱና ጫቀታድ። 5 ቃይካ ግብጼ አሳቱ አይለይያ እስራኤለቱዋ ኦልያ ታን ስሳደ፥ ታ ቃላ ጫቁዋ ሀሳያድ።

6 "ሄዋ ድራዉ፥ ኔን እስራኤላቱዋ፥ ‘ታን መና ጎዳ፤ ታን ህንተንታ ግብጼቱዋ ናቁዋፐ ከሳና፤ ታን ህንተንታ ኡንቱንቱ አይለተፐካ ላአ ከሳና፤ ቃይ ታን ታ ዎልቃማ ዎልቃን ግብጼቱዋ ቦላ ኢታ ፕርዳ አሃደ ህንተንታ ዎዛና። 7 ታን ህንተንታ ታ ሁጰ አሳዳን አካናነ ታን ህንተንቱ ጾሳ ግዳና። ሄ ዎደ ህንተንቱ ታን መና ጎዳ ህንተንቱ ጾሳ ህንተንታ ግብጼቱዋ አይለተፐ ከሴዳዋ ግድያዋ ኤራና። 8 ቃይ ታን አብራሃመዉ፥ ይሳቃዉነ ያቆባዉ እማናዉ ጫቄዳ ቢታዉ አሀና፤ ሄ ጋድያ ታን ህንተንቶ ጋደ ኦደ እማና፤ ታን መና ጎዳ ያጋ’ " ያጌዳ።

9 ሙሴ ሀዋ እስራኤለቶ ኦዴዳ፤ ሽን ኡንቱንቱ አያናይ መኤዳ ጋሱዋንነ መቀ ባይና አይለተ ጋሱዋን አ ቃላ ስስበይክኖ። 10 ሄዋፐ ጉይያን መና ጎዳይ ሙሳ፥ 11 "ባደ ግብጼ ካትያ፥ ‘እስራኤለቱዋ ነ ጋድያፐ ከሳደ የዳ’ ያጋደ ኦዳ" ያጌዳ። 12 ሽን ሙሴ መና ጎዳ፥ "ሀራይ አቶ እስራኤለቱ ታባ ስሰናን እጼድኖ ሽን ታን ዴዶትያ እንጻርሳን ሃሳይያዋ ካቲ ዎት ስሳኔ?" ያጌዳ። 13 መና ጎዳይ ሙሳነ አሮና፥ "ቢደ፥ ህንተንቱ እስራኤልያ አሳ ግብጼፐ ከሳና ማላ፥ ታን ህንተንታ የዴዳዋ እስራኤልያ አሳዉነ ግብጼ ካትያዉ ኦድተ" ያጊደ አዛዜዳ።

ሙሴነ አሮነ የለታ

14 ኡንቱንቱ ሶይ ሶይ ማይዛ አዎቱ ሀዋንታ። እስራኤልያዉ ባይራ ናኣ ሮቤላ አቱማ ናናይ፥ ሄኖካ፥ ፓሉ፥ ሄጽሮናነ ካርማ፤ ሀዋንቱ ሮቤላ ያራቱዋ።

15 ስሞና አቱማ ናናይ፥ ይሙኤላ፥ ያሚና፥ ኦሃዳ፥ ያኪና፥ ጾሃራነ ካናነ ጋደ ምሽራትፐ የለቴዳ ሻኡላ፤ ሀዋንቱ ስሞና ያራቱዋ።

16 ሌዊያ አቱማ ናናይ ባረንቱ የለታ ማራዳን ገርሾና፥ ቃሃታነ ማራራ። ሌዊ ጼታነ ሀታማነ ላፑን ላይ ደኤዳ።✝6:16-19 ፓይ. 3:17-20፤ 26:57-58፤ 1 ኦዱዋ 6:16-19

17 ገርሾና አቱማ ናናይ ባረንቱ ያራን ያራን ሊብናነ ሽምአ ጌተቲኖ።

18 ቃሃተ አቱማ ናናይ አምራማ፥ ይጽሃራ፥ ከብሮናነ ኡዝኤላ። ቃሃተ ጼታነ ሀታማነ ሄዙ ላይ ደኤዳ።

19 ማራራ አቱማ ናናይ ማህላነ ሙሻ ግያዋንታ።

ባረንቱ የለታ ማራን ሀዋፐ ቆሞና ጼገቴዳ ሌዊያ ያራቱ ሀዋንታ።

20 አምራመ ባረ አዉዋ ምቻቶ ዮከቤዶ አኬዳ። እዛ አሮናነ ሙሳ አዉ የላዱ። አምራመ ጼታነ ሀታማነ ላፑን ላይ ደኤዳ።

21 ይጽሃራ አቱማ ናናይ፥ ቆራሀ፥ ነፌጋነ ዚክራ።

22 ኡዝኤላ አቱማ ናናይ፥ ምሻኤላ፥ ኤልጻፋናነ ሲትራ።

23 አሮነ አምናዳባ ናቶ፥ ናኣሶና ምቻቶ ኤልሼቦ አኬዳ። ያትና እዛ አዉ ናዳባ፥ አቢሀ፥ ኤልኣዛራነ እታማራ ጌተትያ አቱማ ናና የላዱ።

24 ቆረ አቱማ ናናይ፥ አሲራ፥ ኤልቃናነ አብያሳፋ፤ ሀዋንቱ ቆረ ያራቱዋ።

25 አሮና ናአይ ኤልኣዛረ ፑትኤላ ናናቱዋፐ እትኖ አኬዳ፤ እዛ አዉ ፒንሃሳ የላዱ።

ሀዋንቱ ባረንቱ ያራን ያራን ሌዋቱዋ ጎልያ ማይዛ አሳቱዋ።

26 መና ጎዳይ፥ "ግብጼ ጋድያፐ እስራኤላቱዋ ኦላዉ ጊጎ ጩጉዋዳን ጩጉዋዳን ከስተ" ያጌዳዌ ሀ ሙሳነ አሮና። 27 እስራኤላቱዋ ግብጼ ጋድያፐ ከስያዋ ግብጼ ካትያዉ ሃሳዬዳዋንቱ ኡንቱንታ። ሄዋንቱካ ሙሳነ አሮና። 28 መና ጎዳይ ግብጼን ሙሴዉ ሃሳዬዳ ዎደ አ፥ 29 "ታን መና ጎዳ፤ ታን ነዉ ኦድያዋ ኡባ ኔን ግብጼ ካትያዉ ኦዳ" ያጌዳ። 30 ሽን ሙሴ መና ጎዳ፥ "ታን ዴዶትያ እንጻርሳን ሃሳይያዋ ግድሽን፥ ካቲ ታን ኦድያዋ ዎት ስሳኔ?" ያጌዳ።