ከሳ 36

1 "ሄዋ ድራዉ፥ ባጻልኤል፥ ኦሆልኣብነ መና ጎዳ ዱንካንያ ኬጻና ማላነ ኦሶ ግድያ ኤራ መና ጎዳይ እምና፥ ሉጼዳ አሳይ ኡባይ መና ጎዳይ አዛዜዳዋዳን ኡባባ ኦና" ያጌዳ።

አሳይ እሜዳ እሞታ ጮራተ

2 ሄዋፐ ጉይያን ሙሴ ባሳልኤላ፥ ኦሆልኣባነ መና ጎዳይ ዱማ ኤራ እሜዳዋንቱ ኦሱዋ ኦናዉ ያና ኮይያ ኡባ ጼሲደ ሺሼዳ። 3 እስራኤልያ አሳይ ጾሳ ዱንካንያ ኦናዉነ ኦሶ ግድያ እሞታ ኡባ ሙሴፐ አኬድኖ። ቃይ አሳይ ባረ ሸንያን ጮ እምያ እሞታ ዎንታ ዎንታ ጉጅ ጉጂደ አህያዋ አግቤና። 4 ያትና ጾሳ ዱንካንያ ኦያ ኤራይ ኩሜዳ አሳይ ኡባይ ባረንቱ ኦሱዋ አግ ባሺደ፥ 5 ሙሳ ሀዋዳን ያጌድኖ፤ "አሳይ መና ጎዳይ አዛዜዳ ኦሶ ኮሽያዋፐ ሎይ ዳርያዋ አሂደ ደኤ" ያጌድኖ።

6 ሙሴ ዱንካኔዳ ሳኣን ደእያ አሳዉ ሀዋዳን ያጊደ አዛዜዳ፤ "ላኤን አይ አቱማ አሳይካ አይ ማጫ አሳይካ ጾሳ ዱንካንያ ኦሶ እምያዋ እማናዉ አሆፖ" ያግና፥ አሳይ አህያዋ አግ ባሼዳ። 7 አያዉ ጎፐ፥ ኡንቱንቱ አሄዳ እሞታይ ኦሱዋ ኡባ ኦናዉ ግዲደ ፓላሄ።

ጾሳ ዱንካንያ ኦሱዋባ

8 ኦሱዋ ኦያዋንቱ ግዶፐ ሂላ ዳርያዋንቱ ኡባቱ ሊቆ ሊኑዋፐነ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳደቴዳ ታሙ ጋርዱቱዋፐ ጾሳ ዱንካንያ ጊግሴድኖ። ሄ ጋርዳቱዋን እት ሂላይ ክሩበቱዋ ምስልያ ዳዴዳ። 9 ጋርዶቱ ኡባይ እት ልከ ግዲደ፥ ጌሳይ ላታማነ ሆስፑን ዋ፤ ጎምፓይ ኦይዱ ዋ። 10 እቼሹ ጋርዳቱዋ እትፐ ጋደ ስኬድኖ፤ ቃይ የንኮ አቴዳ እቼሹ ጋርዳቱዋካ ኡንቱንቱዋዳን ኦድኖ። 11 እትፐ ጋደ ስኬዳ ጋርዱቱዋፐ እት ጋርዱዋ ዉርሰ ጋጻን ሳሉዋ ማላትያ ጫርቂያፐ ማጫራ መድኖ። ቃይ እትፐ ጋከት ስከቴዳ የንኮ ጋርዱዋንካ ሄዋዳን ኦድኖ። 12 ኡንቱንቱ እትፐ ጋከቴዳ እት ጋርዱዋ ቦላ እሻታሙ ማጫራ፥ ቃይ እትፐ ጋከቴዳ የንኮ ጋርዱዋ ቦላካ እሻታሙ ማጫራ መድኖ። ሄ ማጫራቱ ኡባይካ እቱ እቶ ማራን ደኢኖ። 13 ሄዋፐ ጉይያን፥ ዎርቃፐ እሻታሙ ኦይቂያዋ መድኖ። ዱንካኒ እቱዋ ግዳና ማላ፥ ሄ ጋርዳቱዋ ጋጻ ጋጻ ሄ ኦይቂያዋንቱን ኦይድኖ።

14 ጾሳ ዱንካንያ ቦላና ካምያ ዱንካንያዉ ታማነ እት ጋርዳቱዋ ዴሻ አጎዛፐ ዳዴድኖ። 15 ታማነ እት ጋርዳቱካ እት ልከ፤ እት እት ጋርዱዋ ጌሳይ ሀታሙ ዋ፥ ጎምፓይ ኦይዱ ዋ። 16 እቼሹ ጋርዳቱዋ እት ባጋና፥ ኡሱፑን ጋርዳቱዋ ቃይ የንኮ ባጋና ጋደ ስኬድኖ። 17 ሄዋፐ ጉይያን ጋ ስኬዳ ጋርዳቱዋፐ እት ጋርዱዋ ጋጻን እሻታሙ ማጫራ መድኖ። ቃይካ ጋ ስኬዳ የንኮ ጋርዳቱዋፐ ዉርሰ ጋርዱዋ ጋጻን እሻታሙ ማጫራ መድኖ። 18 ላኡ ባጋና ደእያ ጋርዳቱዋ ጋደ እት ዱንካነ ኦናዉ ናሃስያፐ እሻታሙ ኦይቂያዋ መድኖ። 19 ሄዋፐ ጉይያን ዱንካንያ ካማናዉ ዶርሳ ኦርግያ ጋልባ ዞኦ ቃላምያን የግ ከሴዳዋ ጊግሴድኖ፤ ቃይ አ ቦላና ካማናዉ ቁምእያ ጊግሴድኖ።

20 ጾሳ ዱንካንያ ጻጋግያዋንታ ስት ጌዳ ኦዶሮቱዋፐ ከሴድኖ። 21 እት እት ጻጋግያዉ ጌሳይ ታሙ ዋ፤ ጎምፓይ እት ዋነ ባጋ። 22 እት እት ጻጋግያዉ እቱዋ እቱዋና ጋ ኦይያ ላኡ ፖቱዋ መድኖ። ጾሳ ዱንካንያ ጻጋገቱዋ ኡባካ ሄዋዳን ኦድኖ። 23 ጾሳ ዱንካንያዉ ገድሳ ባጋና ላታሙ ጻጋገቱዋ መድኖ። 24 እት እት ጻጋግያዉ ላኡ ገደቱዋ፥ ኡባና ኦይታሙ ፖይ ገልያ ሉካቱዋ ብራፐ ጊግሴድኖ። 25 ጾሳ ዱንካንያዉ ሁጲሳ ባጋና ላታሙ ጻጋገቱዋ መድኖ። 26 እት እት ጻጋግያዉ ላኡ ፖይ ገልያ ሉካቱዋ፥ ኡባና ኦይታሙ ፖይ ገልያ ሉካቱዋ ብራፐ ጊግሴድኖ። 27 ጾሳ ዱንካንያዉ ጉየ ጋጻን አዋይ ዉልያ ባጋና ኡሱፑን ጻጋገቱዋ መድኖ። 28 ጾሳ ዱንካንያ ጉየ ጋጻን ደእያ ጋጻቶ ላኡ ጻጋገቱዋ ጊግሴድኖ። 29 ሀ ላኡ ጋጻቱዋን ደእያ ጻጋገቱዋ ጻጱዋፐ ጼራ ጋካናዉ ዳቡላ ግድ ቢደ፥ ጼራን እት ሳጋይያን ገል ኦይቀቴድኖ። ኡንቱንቱ ላአቱካ ሄዋዳን ሀኔድኖ። 30 ሄዋ ድራዉ፥ እት እት ጻጋግያዉ ጋርሳና ላኡ ላኡ ገደቱ ደኢኖ፤ ኡባና ሆስፑን ጻጋገቱነ ብራፐ ኦሰቴዳ ታማነ ኡሱፑን ገደቱ ደኢኖ።

31 ቃይ ኡንቱንቱ ኦዶሮቱዋፐ ሽካላቱዋ ከሴድኖ፤ ጾሳ ዱንካንያዉ እት ባጋ ምይያን ደእያ ጻጋገቶ እቼሹ ሽካላቱዋ፥ 32 ቃይ የንኮ ባጋ ምይያን ደእያ ጻጋገቶ እቼሹ ሽካላቱዋ ጊግሴድኖ። ሄዋዳንካ፥ ጾሳ ዱንካንያዉ ጉየ አዋይ ዉልያ ባጋና ዉርሰ ጋጻን ደእያ ጻጋገቶ እቼሹ ሽካላቱዋ መድኖ። 33 ግዶ ሽካሊ ጻጋገቶ ግዶ ሄራና፥ ሀ ጋጻፐ ያ ጋጻ ጋካናዉ ፕን ከሳናዳን ኦድኖ። 34 ጻጋገቱዋ ዎርቃን ሼሺደ፥ ሽካላቱ አያ ሳጋየቱዋ ዎርቃፐ መድኖ፤ ቃይ ሽካላቱዋካ ዎርቃን ሼሼድኖ።

35 ሳሉዋ ማላትያ፥ ኦቻ ቴራ ማላትያነ፥ ሾሎላ ዞኦ ቃጭናፐነ ሊቆ ሊኑዋፐ እት ጋርዱዋ ኦድኖ። ሄ አ ቦላ እት ሂላይ ክሩበቱዋ ምስልያ ስኬዳ። 36 ጋርዱዋ ኦይዱ ቱሳቱዋ ኦዶሩዋፐ ጊግሲደ፥ ዎርቃን ሼሼድኖ። ያቲደ ዎርቃ ካቂያዋንታ ኡንቱንቶ ጊግሴድኖ። ቃይ ቱሳቱዋ ኤስያ ኦይዱ ገደቱዋ ብራፐ መድኖ። 37 ጾሳ ዱንካንያ ገልያ ፐንግያዉ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳደቴዳዋ፥ ጽልፕያ አሌቅስያዋን ጋርዱዋ ጊግሴድኖ። 38 ቃይ ኡንቱንታ ካቂያ እቼሹ ቱሳቱዋ፥ ካቂያ ባላና ደእያዋንታ መድኖ። ቱሳቱ ጉምቦቱዋነ ቃችያዋንታ ዎርቃን ሼሼድኖ። ቃይ ኡንቱንቱ ፖይ ገልያ ሉኮቱዋ እቼሻቱዋካ ናሃስያፐ መድኖ።