ቄሳቱ ማይያ ማዩዋ
(28:1-14)
1 ቄሳቱ ጾሳ ዱንካንያን ኦያ ዎደ ጎኤትያ ማዩዋ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐ ዳዴድኖ። አሮነ ማይያ ጌሻ ቄሳተ ማዩዋካ መና ጎዳይ ሙሳ አዛዜዳዋዳን ኦድኖ።
ኤፉድያ
2 እ ኤፉድያ፥ ዎርቃፐ፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳዴዳ። 3 ኡንቱንቱ ዎርቃ ቆጺደ፥ ሌእያ ዬቻዳ፥ አፐ ቃራር ቃራሪደ፥ ቃጭና ከሴድኖ። ያቲደ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናነ ሊቆ ሊኑዋ ጋደ፥ ኩሽያ ሂላንቻቱ ዳዴድኖ። 4 ላኡ ባጋይ ጋከቲደ እቱዋ ግዳና ማላ፥ ላኡ ሀሽያ ቦላ ጋደ ኦይያ ጫርቂያ ጊግሴድኖ። 5 መና ጎዳይ ሙሳ አዛዜዳዋዳን፥ ሂላይ አሌቂሲደ ዳዴዳ ዳንጩካ ኤፉድያና እታ ግዲደ፥ ዎርቃፐ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳደቴዳ።
6 ኡንቱንቱ ማርግድያ ጌተትያ ላኡ ሹቻቱዋ ጊግሲደ፥ ዎርቃፐ መዳ ሹቻ ኦይቂያዋ ቦላ ማራና ዎድኖ። ማታፋ ቦላ ሱን ዎጪደ ጻፍያዋዳን፥ ሄ ሹቻቱዋ ቦላ ታማነ ላኡ እስራኤልያ ናናቱዋ ሱን ዎጪደ ጻፌድኖ። 7 ጾሳይ ሙሳ አዛዜዳዋዳን፥ ታማነ ላኡ እስራኤልያ ዘረ ሀሳይያዋ ግዳና ማላ፥ ሀ ሹቻቱዋ ኤፉድያና ኦይዳ ሀሽያ ጫርቂያን ዎዳ።
ትራን ዎያዋ
(28:15-30)
8 እ ትራን ዎያዋ ኩሽያ ሂላንቻን ኦስሴዳ። ሄ ትራን ዎያዋ ኤፉድያ ዎርቃፐ ዳዴዳዋዳን፥ ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳድሴዳ። 9 አዉ ኦይዱ ጋጻይ ደኤ፤ ጌሳይነ ጎምፓይ እት እት ታካ፤ ግዴዳዋ ዳኮዬድኖ። 10 ሄዋፐ ጉይያን አ ቦላ ኦይዱ ማራን አልኦ ሹቻቱዋ ዎድኖ፤ ኮይሮ ማራን ዎዳ ሹቻይ፥ ሳርድዮና፥ ቶጳዝዮንያነ ጶልያ እንቁዋ፤ 11 ላኤን ማራን ባሉራ፥ ሳምፔርያነ አልማዝያ ጌተትያ አልኦ ሹቻቱዋ፤ 12 ሄዘን ማራን ያክንትያ፥ ከልቀዶንያነ አመተስጽኖስያ፤ 13 ኦይደን ማራን ብራል፥ ማርግድያነ ያስጲድያ። ሄዋንታ ኡባ ዎርቃፐ ኦሰቴዳ ሹቻ ኦይቂያዋ ቦላ ዎድኖ። 14 እስራኤልያ ናናቱዋ ሱን ፓይዱዋዳን፥ ሹቻቱዋ ፓይዱካ ታማነ ላኡዋ፤ እቱ እቱ ማታፋዳን ዎጨቲደ፥ ታማነ ላኡ ዛራቱዋ ሱንይ ሄ ሹቻቱዋን ጻፈቴዳ።
15 ትራን ዎያዎ ዎዶሩዋዳን ዶቀቴዳ ሳንሳላታ ዋላካይ ባይና ዎርቃፐ መድኖ። 16 ላኡ ዎርቃፐ መዳ ሹቻ ኦይቂያዋንታ ኦድኖ፤ ያቲደ ላኡ ዎርቃ ምግዳቱዋ መዳዋንታ፥ ትራን ዎያዎ ቆሞ ጋጻ ጋጻቱዋና ጋደ ኦይሰድኖ። 17 ሄ ላኡ ዎርቃ ሳንሳላታቱዋ ትራን ዎያዎ ጋጻቱዋን ደእያ ምግዶቱዋና ጋ ኦይድኖ። 18 ሄ ሳንሳላታቶ ህንኮ ባጋ ጼራ ቃይ ኤፉድያዉ ስን ባጋና፥ ሀሽያ ጫርቂያን ደእያ ሹቻ ኦይቂያዋንቱና ጋ ቃቼድኖ። 19 ቃይካ ላኡ ዎርቃ ምግዳቱዋ መደ፥ ኤፉድያፐ ካሊደ ደእያ ትራን ዎያዎ ሶይ ባጋና ደእያ ላኡ ጋጻቱዋ ጼራን አድኖ። 20 ሄዋዳንካ፥ ዎርቃፐ ሀራ ላኡ ምግዳቱዋ መደ፥ ኤፉድያዉ ስን ባጋና፥ ሀሽያ ጫርቂያፐ ጋርሳ ባጋና ኤፉድያ ጼሳን ቃችያዋፐ ቆሞና፥ ስኩ ጋከቴዳ ሳኣ ማታን ካረና ኡንቱንታ ኦይድኖ። 21 መና ጎዳይ ሙሳ አዛዜዳዋዳን፥ ትራን ዎያዋን ደእያ ምግዳቱዋ ኤፉድያን ደእያ ምግዳቱዋና ጋደ፥ ሳሉዋ ማላትያ ባቀን ቃችና ትራን ዎያዌ ጼሳፐ ቆሞና ደእያ ድራዉ፥ ቃሹ ሾልኤና።
ቄሳቱ ማይያ ሀራ ማዮቱዋ
(28:31-43)
22 ኤፉድያፐ ጋርሳና ማይያ አዱሳ ማዩዋ እ ሳሉዋ ማላትያ ጫርቂያፐ ጊግሴዳ፤ ሄዌ ሸማይንያ ኦሱዋ። 23 ሄ አዱሳ ማዮ ቆያ አያ ሳኣ መድኖ፤ ሄ ሳአይ ፔተናዳን፥ ዩሽ አደ ጉጅ ጉጅ ስኬድኖ። 24 ኡንቱንቱ አዱሳ ማዩዋ ዱገ ባጋ ማጫራ ዩሹዋን ሳሉዋ ማላትያ፥ ኦቻ ቴራ ማላትያነ ሾሎላ ዞኦ ዶቀቴዳ ሮማንያ ቴራ ምስለቱዋ መድኖ። 25 ኡንቱንቱ ቃይ ዎርቃፐ ዳላቱዋ መደ፥ አዱሳ ማዮ ዱገ ባጋ ጋጻ ዩሽ አደ፥ ሮማንያ ምስለቱዋ ግዱዋን፥ ዋላካን አድኖ። 26 አሮነ ሄ ማዮ ዱገ ባጋ ማጫራ ዩሽ አደ፥ ዳላነ ሮማንያ ቴራ ምስልያ ዋላኪደ አድኖ። ሄዌ መና ጎዳይ ሙሳ አዛዜዳዋዳን፥ ኡንቱንቱ ጾሳ ዱንካንያ ኦሱዋ ኦደ ማያናሳ።
27 ኡንቱንቱ አሮናዉነ አ ናናዉ ሼማይንያ ሊኑዋፐ አዱሳ ሻምጭያ ጊግሴድኖ። 28 ቃይ አሮነ ሁጲያን ጻጽያ ሻሽያ፥ አ ናናዉ ቆበቱዋነ ጋርሳና ማይያ ማዮቱዋ ሊቆ ሊኑዋፐ ዳዲደ ጊግሴድኖ። 29 ኡንቱንቱ መና ጎዳይ ሙሳ አዛዜዳዋዳን ሳሉዋ ማላትያ፥ ኦቻ ቴራ ማላትያነ ሾሎላ ዞኦ ቃጭናፐነ ሊቆ ሊኑዋፐ ዳዲደ፥ ኩሽያ ሂላን አሌቂሲደ፥ ዳንጩዋ ጊግሴድኖ።
30 ኡንቱንቱ ጌሻ አለቁዋ ምስልያ ዋላካይ ባይና ዎርቃፐ መደ፥ ማታፋ ቦላ ዎጭያዋዳን፥ አ ቦላ፥ "መና ጎዳዉ ጌሻ ግዲደ ዱማቴዳ" ያግያዋ ዎጪደ ጻፌድኖ። 31 ሄዋፐ ጉይያን ሁጲያን ሻሽያፐ ጻደን ቃቻናዳን፥ መና ጎዳይ ሙሳ አዛዜዳዋዳን ሳሉዋ ማላትያ ባቀ አን አደ ቃቼድኖ።
ሙሴ ኦሱዋ ኡባ ጾሞሴዳ
(35:10-19)
32 ጾሳ ዱንካንያ ኪታይ ኡባይ ፖለቴዳ። እስራኤላቱ ኡባባካ መና ጎዳይ ሙሳ አዛዜዳዋዳን ኦድኖ። 33 ሄዋፐ ጉይያን ኡንቱንቱ ጾሳ ዱንካንያ ሙሴኮ አሄድኖ፤ ሄዌካ: ዱንካንያነ አ ሚሻ ኡባ፥ ጋ ኦይያዋ፥ ጻጋገቱዋ፥ ሽካላቱዋነ፥ ቱሳቱ ኤቂያ ሳጽነቱዋ፥ 34 ቦላ ካማደ ዶርሳ ኦርግያ ጋልባ ዞኦ ቃላምያን የግ ከሴዳዋ፥ ሀራ ጋልባፐ መዳ ቁምእያ፥ ታቦታ ገንያ ጋርዱዋ፥ 35 ቃላ ጫቁዋ ታቦታ፥ አ ቶክያ ካሶቱዋነ አቶ ግያ ሳኣ ቁምእያ፥ 36 ጻርጴዛነ አ ሚሻ ኡባ ጾሳ ስንን ዎያ ጌሻ ኡክ፥ 37 ዋላካይ ባይና ዎርቃፐ ኦሰቴዳ ጾምፕያ ዎያ ባላነ አን ማራን ደእያ ጾምፐቱዋ፥ ኡንቱንቱ ሚሻቱዋ ኡባነ ጾምፕያ ዛይትያ፥ 38 እጻና ጩዋይያ ዎርቃ ሳጽንያ፥ ኦከትያ ዛይትያ፥ ሳዊያ እጻና፥ ጾሳ ዱንካንያ ፐንግያ ጋርዱዋ፥ 39 ናሃስያፐ ኦዳ ያርሽያ ሳኣ፥ አ ናሃስያ ዛዝሪያና፥ አ ቶክያ ካሱዋ፥ አ ሚሻቱዋ ኡባ፥ ሜቻ ከርያነ አ ዎያዋ፥ 40 ዳባባ ገንያ ጋርዳቱዋ፥ አ ቱሳቱዋ፥ ኡንቱንቱ ኤቂያ ሳጽነቱዋ፥ ዳባባ ገልያ ፐንገቱዋ ጋርዱዋ፥ ዳባባ ዎዶሮቱዋነ ሽካላቱዋ፥ ጾሳ ዱንካንያ መናዉ ኮሽያ ሚሻቱዋ ኡባ፤ 41 ቄሳቱ ጌሻ ሳኣን ኦደ ጎኤታናዉ ዳደቴዳ ማዮቱዋ፥ አሮነ ጌሻ ማዩዋነ አ ናናይ ቄሳተ ኦደ ማይያ ማዮቱዋ።
42 እስራኤላቱ ኦሱዋ ኡባካ መና ጎዳይ ሙሳ አዛዜዳዋዳን ኡባባ ኦድኖ። 43 ሙሴ ኦሱዋ ኡባ ጾሞስ ጼሊደ፥ ኡንቱንቱ መና ጎዳይ አዛዜዳዋዳን ኦዳዋ በኤዳ። ሄዋ ድራዉ፥ ሙሴ ኡንቱንታ አንጄዳ።