ከሳ 29

ቄሳተ ሱን እሚደ ፖልያ ዎጋቱዋ

1 "አሮነነ አ ናናይ ቄሳቱዋ ግዲደ ታዉ ኦና ማላ፥ ኔን ኡንቱንታ ዱማያናዉ ሀዋዳን ኦ፤ ትላ ቦላና ደእያ እት ኮሩማ፥ ላኡ ዶርሳ ኮለቱዋ አካ፤ 2 ሙሩታ ዛርጋ ልያ አካደ፥ እርሹዋ የገናን ኡክ ኡካ፤ ቃይ እርሹዋ የገናን ዛይትያን ኮምፑዋ ኮምፓ፤ ሄዋዳንካ፥ እርሹዋ የገናን ሌኦ ኡክ ኡካደ፥ ዛይትያ ኦካ። 3 ኔን ኡንቱንታ ሳምፓን ዎደ፥ ኮሩማናነ ላኡ ዶርሳ ኮለቱዋና እትፐ ታዉ ሺሻ።

4 "ያታደ አሮናነ አ ናና ጾሳ ዱንካንያ ፐንገ አሃደ፥ ሃን ኡንቱንታ ሜጫ። 5 ሄዋፐ ጉይያን ማዮቱዋ አካደ፥ አዱሳ ሻምጭያ፥ ኤፉድያ ጋርሳና ማይያ አዱሳ ማዩዋ፥ ኤፉድያነ ትራን ዎያዋ አሮና ማይዛደ ኤፉድያ ሂላን ዳደቴዳ ዳንጩዋን ዳንጭሳ። 6 ሻሽያካ አ ሁጲያን ጻጻደ፥ ‘ጾሳዉ ጌሻ ግዲደ ዱማቴዳ’ ያግያዌ ጻፈቴዳ አሌቁዋ ስን ደሙዋን ሻሽያ ምይያን አ። 7 ኦክያ ዛይትያካ አካደ፥ አ ሁጲያን ትጋደ ኦካ። 8 አ ናናካ አሃደ አዱሳ ሻምጭያ ማይዛ። 9 ሻሽያካ ኡንቱንቱ ሁጲያን ጻጻ። ሄዋፐ ጉይያን አሮናነ አ ናና ዳንጩዋ ዳንጭሳ። ቄሳተይ ኡንቱንቶ መና ዎጋ ግዶ። ስም አሮናነ አ ናና ያታደ ቄሳቱዋ ኦሳ።

10 "ኮሩማ፥ ጾሳ ዱንካንያ ስን ኔን አህና፥ አሮነነ አ ናናይ አ ሁጲያን ባረንቱ ኩሽያ ዎኖ። 11 ኮሩማ፥ መና ጎዳ ዱንካንያ ገልያ ፐንግያን መና ጎዳ ማታን ሹካ። 12 ኮሩማ ሱፐ አማሬዳዋ ነ ብራያን አካደ፥ ያርሽያ ሳኣ ቦላ ደእያ ካጨቱዋ ኦክሽን አቴዳዋ ያርሽያ ሳኣፐ ጋርሳ ባጋና ጉሳ። 13 ሄዋፐ ጉይያን ቃን አሹዋ ካሜዳ ሞያ ኡባ፥ ትርያ ጼራ ቦላ ደእያ ሞያ፥ ላኡ ክላሆቱዋነ ኡንቱንታ ካሜዳ ሞያ አካደ፥ ያርሽያ ሳኣ ቦላ ጹጋ። 14 ሽን ኮሩማ አሹዋ፥ አ ጋልባነ አ ማራጭያን ደእያ ቶጪያ አሳይ ኡቶ ሄራፐ ሃሳደ ጹጋ፤ ሄዌ ናጋራ ድራዉ ያርሽያ ያርሹዋ።

15 "ላኡ ዶርሳ ኮለቱዋፐ እቱዋ ኔን አክና፥ አሮነነ አ ናናይ ባረንቱ ኩሽያ አ ሁጲያን ዎኖ። 16 ያቶፐ ዶርሳ ኮልያ ሹካደ፥ ሱ ያርሽያ ሳኣ ምይያን ኡባ ሳኣን ፑሻካ። 17 ዶርሳ ኮልያ አሹዋ ቃንጸሬደ፥ ቃን አሹዋካ ገድያ ሜጫደ ሁጲያ ቦላነ ሀራ ቆሞ አሾቱዋ ቦላ ኡንቱንታ ዎ፤ 18 ሄዋፐ ጉይያን፥ ዶርሳ ኮልያ ኡባና ያርሽያ ሳኣን ጹጋ፤ ሄዌ መና ጎዳዉ ጹገትያ ያርሹዋ፥ ሳዉዋ ቶሽኩ ግያ ያርሹዋነ መና ጎዳዉ ታማን ያርሽያ ያርሹዋ።✝29:18 ኤፈ. 5:2፤ ፕልጵ. 4:18

19 "ቃይ የንኮ ዶርሳ ኮልያ አሮነነ አ ናናይ ባረንቱ ኩሽያ አ ሁጲያን ዎና ማላ ኔን አሀ። 20 ሄ ዶርሳ ኮልያ ሹካደ፥ አ ሱፐ አማሬዳዋ አካደ፥ አሮናዉነ አ ናናዉ ኡሸቻ ሀይቱዋ ጼራ፥ ኡንቱንቱ ኡሸቻ ኩሸቶ ዎጋ ብራቱዋነ ኡንቱንቱ ኡሸቻ ገደቶ ዎጋ ብራቱዋ ኦካ፤ ሄዋፐ ጉይያን፥ አቴዳ ሱ ያርሽያ ሳኣ ምይያን ኡባ ሳኣን ፑሻካ። 21 ያርሽያ ሳኣን ደእያ ሱፐ አማሬዳዋነ ትግያ ዛይትያፐካ አማሬዳዋ አካ፥ አሮና ቦላነ አ ማዩዋ ቦላ፥ አ ናናቱዋ ቦላነ ኡንቱንቱ ማዩዋ ቦላ ፑሻካ። እነ አ ናናይ፥ ኡንቱንቱ ማዩ ጾሳ ኦሶ ዱማታናዋ።

22 "ሀ ዶርሳ ኮልያፐ ሞዋ፥ ናስያ፥ ቃን አሹዋ ቦላ ደእያ ሞያ፥ ትርያ ጼራ ቦላ ደእያ ሞያ፥ ላኡ ክላሆቱዋ፥ ኡንቱንታ ካሜዳ ሞያነ ኡሸቻ ባጋና ደእያ ጉየ ገድያ አካ፤ ሀዌ ቄሳተ ሱን እምያ ዎደ ሹክያ ዶርሳ። 23 መና ጎዳ ስንን ዎዳ እርሹ ገልቤና ኡክ፥ ሳምፓፐ ዛይቲ ዋላከትቤና ኡክ፥ ዛይትያና ኡኬዳ እት ኮምፑዋነ እት ሌኦ ኡክ አካ። 24 ኔን ሀ ቁማ ኡባ አሮና ኩሽያንነ አ ናናቱዋ ኩሽያን ዎደ ዉጻካናዳን ኦ። ኡንቱንታ መና ጎዳ ስንን ፑደነ ዱገነ ቃኖ። 25 ሄዋፐ ጉይያን ኡንቱንቱ ኩሽያፐ ሀዋንታ አካደ፥ ያርሽያ ሳኣ ቦላ ዎደ፥ ጹግያ ያርሹዋና ጋደ፥ መና ጎዳዉ ሳዉዋ ቶሽኩ ጋናዳን፥ ያርሽያ ሳኣ ቦላ ታማን ጹጋ። 26 አሮነ ቄሳ ግዲደ ሱንትያ ዎደ ሹኬዳ ዶርሳ ኮልያ አንጎሱዋ አካደ፥ መና ጎዳ ስንን ቃያ ያርሹዋዳን ቃ፤ ሄዌ ኔና ጋክያ ነ ምያ ግሹዋ ግዳናዋ።

27 "ሄ ሹኬዳ ዶርሳ አሹዋ ቆሞቱዋፐ፥ ያርሹዋ ኦደ ቃዳ አንጎሱዋነ ጾሳ ስንን ፑደ ቶኬዳ ገድያ ጌሻ፤ ሄዋንቱ አሮናዉነ አ ናናዉ ግሹዋ ግዳናዋንታ። 28 እስራኤላቱ መና ጎዳዉ እምያ እትፐተ ያርሹዋፐ ቃያ ባጋዉ ዎጋይ፥ ኡባ ገደካ እስራኤልያ አሳፐ ሺቆደ አሮናዉነ አ ናናዉ ጋክያ ግሹዋ ግዶ።

29 "አሮና ቄሳተ ጌሻ ማዩ አ ሀይቁዋፐ ጉይያን አ ዛረቶ ደኦ፤ ኡንቱንቱ ቄሳቱዋ ካፑዋ ግድያ ዎደ ሀ ማዩዋ ኦከታናዉነ ዱማታናዉ ማይኖ። 30 አ ናናቱዋፐ አ ሳኣን ቄሳቱዋ ግዲደ፥ ጌሻ ሳኣን ኦናዉ ጾሳ ዱንካንያ ይያ ናአይ፥ ሄ ማዩዋ ላፑን ጋላሳዉ ማዮ።

31 "አሮነነ አ ናናይ ቄሳቱዋ ግዲደ ሱንትያ ዎደ ሹከቴዳ ዶርሳ ኮልያ አሹዋ አካደ፥ ጌሻ ሳኣን ዶይሳ። 32 አሮነነ አ ናናይ ዶርሳ ኦርግያ አሹዋካ ማሶፍያን ደእያ ኡክ ጾሳ ዱንካንያ ገልያ ፐንግያን ሚኖ። 33 ኡንቱንቱ ቄሳቱዋ ግዲደ ሱንታናዉነ ዱማታናዉ ናጋራይ አቶ ጌተታናዳን ያርሸቴዳ ሀ ያርሾቱዋ ሚኖ። ሽን ሄ ያርሾቱ ጌሻ ግዴዳ ድራዉ፥ ሀራ አሳይ ኦነ ሞፖ። 34 ቄስያ ግዲደ ሱንትያ ዎደ ሹኬዳ ዶርሳ ኮልያ አሹዋፐ ዎይ ኡክፐ ዎንታ ጋካናዉ ፓላሂደ አቆፐ፥ ታማን ጹገቶ፤ ጌሻ ግዴዳ ድራዉ ሜተቶፖ።

35 "አሮነነ አ ናናይ ቄሳቱዋ ግዲደ ሱንትያ ዎደ ዎያ ዎጋ ልከ ታን ኔና አዛዜዳዋዳን ኦደ፥ ላፑን ጋላሳ ጋርሳን ፖላ። 36 ናጋራይ አቶ ጌተታናዳን ሀቼ ሀቼ ናጋራ ያርሹዋዳን እት ኮሩማ ያርሻ። ሄዋን ያርሽያ ሳኣ ጌሻ፤ ያታደ ያርሽያ ሳኣ ዱማያናዉ ኦካ። 37 ያርሽያ ሳኣ ናጋራ አቶ ግያ ዎጋ ላፑን ጋላሳን ፖላደ፥ አ ዱማያ። ያቶፐ ያርሽያ ሳአይ ጌሻ ኡባፐ እቱዋ ግዴዳ ጌሻ። አ ቦችያ ኡባይካ ጌያና።

ሀቼ ሀቼ ሺሽያ ያርሹዋ

38 "ያርሽያ ሳኣን ኔን ሀቼ ሀቼ ሺሻና ያርሹ ሀዋ። የለቶደፐ እት ላይ ግዴዳ ላኡ ዶርሳ ኦርገቱዋ ያርሻ። 39 ዶርሳ ኮለቱዋፐ እቱዋ ዎንታ፥ ቃይ ላኤንዋ ኦማርስ ያርሻ። 40 ኮይሮ ዶርሳ ማራና እት ኪሎ ግራመ ግዴዳ ሙሩታ ዛርጋ ልያ እት ሊትሮ ጉምኤቴዳ ዛይትያን ሙናቃደ ያርሻ፤ እት ሊትሮ ዎይንያ ኤሳካ ኡሻ ያርሹዋ ኦደ ያርሻ። 41 ላኤን ዶርሳ ኦርግያ ኦማርስ ያርሻደ ዎንታዋ ኬሻ፥ ልያ፥ ዛይትያነ ዎይንያ ኤሳ ሺሻ። ሄዌ መና ጎዳዉ ታማን ያርሸትያ፥ ሳዉዋ ቶሽኩ ግያ ያርሹዋ ግዳናዋ።

42 "ሀ ጹግያ ያርሹ ይያ የለታ ኡባን ጾሳ ዱንካንያ ገልያ ፐንግያን መና ጎዳ ስንን ፓጭ ባይናን ያርሸታናዉ ኮሼ። ታን ያን ህንተንቱና ጋከታደ፥ ኔናና ሃሳያና። 43 ቃይ ያን ታን እስራኤላቱዋና ጋከታናዉ፥ ታ ቦንቹካ ሄ ሳኣ ዱማ ሳኣ ከሳና።

44 "ሄዋ ድራዉ፥ ታን ጾሳ ዱንካንያነ ያርሽያ ሳኣ ዱማያና፤ ኡንቱንቱ ታዉ ቄሳቱዋ ግዲደ ታዉ ኦና ማላ፥ አሮናነ አ ናና ታን ዱማያና። 45 ያታደ ታን እስራኤለቱዋ ግዶን ደአና፤ ቃይ ታን ኡንቱንቱ ጾሳ ግዳና። 46 ታን ኡንቱንቱ ግዶን ደአና ማላ፥ ግብጼፐ ኡንቱንታ ከሴዳ መና ጎዳ ኡንቱንቱ ጾሳ ግድያዋ ኡንቱንቱ ኤራና። ኤ፥ ታን መና ጎዳ ኡንቱንቱ ጾሳ።