ከሳ 25

ጾሳ ዱንካንያ ቶካናዉ እመቴዳ እሞታ

1 መና ጎዳይ ሙሴዉ ሀዋዳን ያጌዳ፤ 2 "ታዉ እምያዋ አሀናዳን ኔን እስራኤላቶ ኦዳ፤ ታዉ እማናዉ አ ዎዛናይ አ እማ እማ ግያ አሳ ኡባ እሞታ ኔን ታዉ አካ። 3 ህንተንቱ ኡንቱንቱፐ አካና እሞታይ ሀዋ: ዎርቃ፥ ብራ፥ ናሃስያ ብራታ፥ 4 ሳሉዋ ማላትያ፥ ኦቻ ቴራ ማላትያነ፥ ዞኦ ሊቆ ቃጭና፥ ዴሻ እስክያ፥ 5 ዶርሳ ኦርግያ ጋልባ ዞኦ ቃላምያን የግ ከሴዳዋ፥ ሀራ ጋልባ፥ ኦዶሩዋ፥ 6 ጾምፕያዉ ዎጋራ ዛይትያ፥ ኦክያ ዛይትያነ እጻና ሳዌያ ቅማምያ፤ 7 ቄሳቱዋ ካፑዋ ኤፉድያንነ ትራን ዎያዋን የግያ ማርግድያ ጌተትያ ሹቻቱዋነ ሀራ ጶልያ አልኦ ሹቻቱዋ አሆ።

8 "ያቲደ ታን ኡንቱንቱ ግዶን አቃናዳን፥ ኡንቱንቱ ታዉ ጌሻ ሳኣ ጊግስኖ። 9 ልከ ታን ኔና በሴዳ ሌምሱዋ ኡባዳን ጾሳ ዱንካንያነ አ ግዶን ደእያ ሚሻቱዋ ኦተ።

ቃላ ጫቁዋ ታቦታ

10 "ኡንቱንቱ ኦዶሩዋ ምፐ አዱሳተይ ላኡ ዋነ ባጋ፥ ጎምፓይ እት ዋነ ባጋ፥ ጌሳይ ቃይ እት ዋነ ባጋ ግዴዳ ታቦታ መኖ። 11 ሶያነ ካርያ ዋላካይ ባይና ዎርቃን ሼሻ፤ አ ዩሹዋካ ዎርቃ ትገን ዩሻ አ። 12 ሄ ታቦታዉ ኦይዱ ዎርቃ ሳጋየቱዋ ትጋደ ኦይዱ ገደቱዋን እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አ። 13 ሄዋፐ ጉይያን ኦዶሩዋፐ ካሱዋ ከሳደ ዎርቃን ሼሻ። 14 ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አ። 15 ቶክያ ካሶቱ ታቦታ ሳጋየቱዋ ግዶን ደእኖ፤ ኡንቱንቱ ሄዋፐ ኡባካ ከሶፕኖ። 16 ታቦታ ግዶን ታን ነዉ እምያ፥ ታሙ አዛዛቱ ጻፈት ኡቴዳ ላኡ ማሰቴዳ ማርካተ ሹቻቱዋ ዎ።

17 "ዋላካይ ባይና ዎርቃፐ ላኡ ዋነ ባጋ አዱቂያ፥ እት ዋነ ባጋ አክያ አቶ ግያ ሳኣ ቁምእያ መ።✝25:17 እብራ. 9:5 18 ቁምእያዉ ዉርሰ ላኡ ባጋ ጋጻን ላኡ ክሩቤልያ፥ ቆጸቴዳ ዎርቃፐ መ። 19 እት ክሩብያ እት ባጋ ጋጻን፥ ላኤን ክሩብያ የንኮ ባጋ ጋጻን ላኡዋካ ቁምእያና ጋ ኦይደ መ። 20 ክሩበቱ ባረንቱ ቀፍያ ደንደ፥ አቶ ግያ ሳኣ ቁምእያ ባረንቱ ቀፍያን ኩዋይ ዎኖ፤ ቃይ እቱ እቱዋኮ ስም ኡቲደ፥ ቁምእያ ጼልኖ። 21 ቁምእያ ታቦታዉ ቦላ ባጋን ዎ፤ ቃይ ታን ነዉ እምያ አዛዛቱ ጻፈቲደ ማሰቴዳ ሹቻቱዋ ታቦታ ግዶን ዎ። 22 ማርካተ ታቦታ ቦላ ቁምእያ ቦላ ደእያ ላኡ ክሩበቱዋፐ ግዱዋን ታን ኔናና ጋከታደ እስራኤልያ አሳዉ ታን እምያ አዛዙዋ ኡባ ያን ነዉ እማና።

ኡክ ዎያ ጻርጴዛ

23 "ኦዶሩዋ ምፐ አዱሳተ ላኡ ዋ፥ ጎምፓይ እት ዋ፥ ጌሳይ ቃይ እት ዋነ ባጋ ግድያ እት ጻርጴዛ መ። 24 ያታደ ዋላካይ ባይና ዎርቃን ሼሻ፤ ቃይ አ ዩሹዋን ዎርቃ ትገ ዩሻ አ። 25 ሄዋዳንካ፥ ቃይ ጎምፓይ ታካ ግዴዳ ሻሽያ አ ቦላ ዩሻ አ። ያታደ አ ቦላ ዎርቃ ትገ ዩሻ። 26 ሄ ጻርጴዛዉ ኦይዱ ዎርቃ ሳጋየቱዋ መደ፥ ጻርጴዛ ገደቱ ደእያ ኦይዱ ጋጻን ዎ። 27 ጻርጴዛ ቶካናዉ ካሱዋ አያ ሳጋየቱ ጻርጴዛዉ ሻሽያ ጋጻን ሺቂደ ደእኖ። 28 ሄ ቶክያ ካሱዋ ኦዶሩዋፐ ከሳደ፥ ዎርቃን ኡንቱንታ ሼሻ። 29 ሄዋዳንካ፥ ቃይ ሻታቱዋነ ጭልፓቱዋ፥ ዱቂያባቱዋነ ጹአቱዋ ዋላካይ ባይና ዎርቃፐ መ። 30 ታ ስን አያ ጌሻ ኡክይ ኡባ ዎደካ ጻርጴዛ ቦላ ዮፖ።✝25:30 ዎጋ 24:5-8

ጾምፕያ ዎያ ባላ

31 "ጾምፕያ ዎያ ባላ ቆጸቴዳ ዋላካይ ባይና ዎርቃፐ መ፤ ሄ ባላይ ኤቂያ ገዲካ፥ ቃይ ግዶ ቶማይካ ኡባይ ቆጸቴዳ ዎርቃፐ ኦሰታናዉ ኮሼ። አ ዋንጫቱ፥ አ ኩኩሞቱ አ ጪሻቱ ኡባይ አናና እትፐ ኦይቀት መታናዉ ኮሼ። 32 ምይያና ኡሱፑን ማራቱ አዉ ከሲኖ፤ ማራቱዋፐ ሄዛቱ እት ባጋና፥ ቃይ ሄዛቱ የንኮ ባጋና ደእኖ። 33 ኡሱፑን ማራቶካ ሁጲያን ሁጲያን ሄዙ ሄዙ ኩኩሙነ ጪሻይ ደእያ ላዉዝያ ጪሻ ማላትያ ዋንጫይ ደኦ። 34 ጾምፕያ ዎያ ባላዉ ግዶ ቶማይ፥ ኩኩሞቱዋ ጪሻቱ ደእያ ላዉዝያ ጪሻ ማላትያ ኦይዱ ዋንጫይ ደኦ። 35 ላኡ ላኡ እትፐ ዋን ደእያ ሄዙ ማራቱዋፐ ጋርሳና እት እት ኩኩሙ ደኦ። 36 ኩኩማቱነ ማራቱ ኡባይ ጾምፕያ ዎያ ባላና እትፐ፥ ኦይቀት እቱዋ ግዲደ፥ ዋላካይ ባይና ዎርቃፐ ቆጸቲደ መትኖ።

37 "ሄዋፐ ጉይያን ጾምፕያ ዎያ ባላዉ ላፑን ጾምፐቱዋ ጊግሳደ፥ ኡንቱንቱ ስን ግዶዉ ፖአና ማላ ቁ ኦደ ዎ። 38 ጾምፕያ ቶይስያ ቃጰቱዋነ ኡንቱንታ ዎያዋንታ ዋላካይ ባይና ዎርቃፐ መ። 39 ጾምፕያ ዎያ ባላይነ አን ጎኤትያ ሚሻ ኡባይ ሀታማነ እቼሹ ኪሎ ግራመ ግዴዳ ዋላካይ ባይና ዎርቃፐ መቲኖ። 40 አኬካ፤ ታን ኔና ደርያ ሁጲያን በሴዳዋዳን ኪተታ።✝25:40 ኪታ 7:44፤ እብራ. 8:5