ዛላፐ ሃይ ፑልቴዳ
(ፓይ. 20:1-13)
1 እስራኤለቱዋ ማባራ ኡባይ መና ጎዳይ አዛዜዳዋዳን፥ እት ሳኣፐ ሀራ ሳኣ ዩዪደ፥ ሲን መላ ቢታፐ ደንድ ቢደ፥ ራፍዲማ ጌተትያ ሳኣን ኡቴድኖ። ሽን አሳይ ኡሻናዉ ሃይ ሄ ሳኣን ዬዳ። 2 ኡንቱንቱ ሙሴና ዋላቀቲደ አ፥ "ኑዉ ኡሻናዉ ሃ እማ" ያጌድኖ።
ሙሴ ዛሪደ፥ "ህንተንቱ ታናና አያዉ ዋላቀቲቴ? መና ጎዳ ህንተንቱ አያዉ ፓጪቴ?" ያጌዳ።
3 ሽን አሳይ ያን ሃ ሳመቲደ፥ ሙሴ ቦላ ዙዙሜድኖ። ኡንቱንቱ አ፥ "ኔን ኑና፥ ኑ ናናነ ኑ መህያ ሳሙዋን ዎናዉ ግብጼፐ ከሳደ ፑደ አያዉ አሃድ?" ያጌድኖ።
4 ሙሴ፥ "ታን ሀ አሳ ዋቶ? ኡንቱንቱ ታና ሹቻን ጫዳና ሀኒኖ" ያጊደ መና ጎዳኮ ዋሴዳ።
5 መና ጎዳይ ሙሳ፥ "ኔን አሳፐ ስንዉ ሀመታ፤ እስራኤልያ አሳ ጭማቱዋፐ ኔናና አፋ፤ እን ኔን ናይለ ሻፋ ሃ ሾጬዳ ጻምኣ ነ ኩሽያን ኦይቃደ ባ። 6 ታን ሲና ደርያ ዛላ ቦላ ነ ስንን ኤቃና፤ ኔን ሄ ዛላ ሾጫ፤ አሳይ ኡሻናዉ አፐ ሃይ ከሳናዋ" ያጌዳ። ሙሴ እስራኤልያ ጭማቱዋ ስንን ሄዋዳን ኦዳ።
7 እስራኤላቱ፥ "መና ጎዳይ ኑ ግዶን ደኢየ ባዌ?" ያጊደ ዋላቀቴዳ ድራዉነ መና ጎዳ ፓጬዳ ድራዉ፥ ሄ ሳአይ ማሳሀነ ማሪባ ጌተቲደ ሱንቴዳ።
እስራኤላቱ አማሌቃቱዋ ጾኔድኖ
8 አማሌቃቱ ዪደ፥ ራፊድማን እስራኤላቱዋና ኦላ ጋከቴድኖ። 9 ሙሴ ኢያሳ፥ "ኔን ኑዉ አሳ ዶራደ፥ ከሳደ አማሌቃቱዋና ኦለታ፤ ታን ዎንት ጾሳ ጻምኣ ኦይቃደ፥ ዞዝያ ሁጲያን ኤቃና" ያጌዳ።
10 ሄዋፐ ጉየ ኢያሱ ሙሴ ጌዳዋዳን፥ አማሌቃቱዋና ኦለቴዳ። ሙሴ፥ አሮነነ ሁር ዞዝያ ሁጲያ ከሴድኖ። 11 ሙሴ ባረ ኩሽያ ደን ጋምኤዳ ኬናን ኡባን እስራኤላቱ ጾኒኖ፤ ሽን እ ባረ ኩሽያ ዱገ ዎዳ ዎደ አማሌቃቱ ጾኒኖ። 12 ሙሴ ኩሺ አርጋጬዳ ዎደ፥ ኡንቱንቱ ሹቻ አክ ዪደ፥ ሙሳ አ ቦላ ኡትሴድኖ። አሮነነ ሁር እቱ እት ባጋና እቱ ህንኮ ባጋና ግዲደ፥ አ ኩሽያ ስት ኦደ ኦይቄድኖ። ያትና አዋይ ዉላና ጋካናዉ አ ኩሺ ስት ጊደ ታኬዳ። 13 ሄዋ ድራዉ፥ ኢያሱ አማሌቃቱዋ ኦላንቻቱዋ ማሻን ጾኔዳ።
14 ሄዋፐ ስምና፥ ሙሳ መና ጎዳይ ሀዋዳን ያጌዳ፤ "ሀዌ ኡባ ገደ ቆፈታና ማላ ሀዋ ማጻፋን ጻፋ። ያታደ ኢያሳ ስሰናን አጎፓ፤ አያዉ ጎፐ፥ ሳሉዋፐ ጋርሳን ታን አማሌቃ አሳቱዋ ዛር ቆፈተናዳን ጭራና ይሳና" ያጌዳ።17:14 ዛረ. 25:17-19፤ 1 ሳሜላ 15:2-9 15 ሙሴ ያርሹዋ ያርሽያ ሳኣ ኬጺደ፥ "መና ጎዳይ ታዉ ጾኑዋ እሜ" ጊደ ሱንዳ። 16 እ ሀዋዳን ያጌዳ፤ "ኩሸቱ ፑደ መና ጎዳ ካዉተ አራታኮ ደንዴድኖ፤ የለታፐ የለታ ጋካናዉካ መና ጎዳይ አማሌቃቱዋና ኦለታናዋ" ያጌዳ።