Êxodo 2

ሙሴ የለታነ ድቻ

1 ሄ ዎደ እት ሌዊያ ቆሞ ግዴዳ ብታኒ ሌዋዌ ማጫውኖ አኬዳ፤ 2 እዛ ሻሃራደ አቱማ ናኣ የላዱ። ናአይ ማላ ሎኦ ናኣ ግድያዋ እዛ በኣደ፥ ሄዙ አግና ቆሳዱ። 3 ሽን እዛ ሄዋፐ ዳሩዋ ቆሳናዉ ዳንዳየናዋ ኤራደ፥ ጫርያፐ ቁንኣ አዉ ዳዳዱ፤ ያታደ ሃይ ገለና ማላ ሽድያን ማራጋደ፥ ናኣ አ ግዶን ዎዱ፤ ናይለ ሻፋ ጌተትያ ሃ ዶናን ጫርያ ግዶን ዎዱ። 4 አ ምቻታ እ ሀንያባ በአናዉ ሃኩዋን ኤቃዱ።

5 ግብጼ ካትያ ናታ ቦላ ሜጨታናዉ ናይለ ግያ ሻፋ ዎዱ፤ እዝ ማጫ ቆማቱ ሃ ዶናን ያነ ሃነ ሀመቲኖ፤ እዛ ቁንኣ ጫርያ ግዶን በኣደ፥ ባደ አካ ያና ማላ ባረ ቆማቶ ኪታዱ፤ 6 ቁንኣ ፖካደ፥ በእተ ሀዋን ቄር ናአይ ዬክ ደኤ፤ እዛ አዉ ቃረታደ፤ "ሀዌ እብራዌቱ ቄር ናናቱዋፐ እቱዋ" ያጋዱ።

7 ሄ ዎደ አ ምቻታ ካትያ ናቶ፥ "ነዉ ሀ ናኣ ንናዉ እብራዌ ማጫ አሳፐ እትኖ ጼሳናዉ ቦ?" ያጋደ ኦቻዱ።

8 እዛ፥ "ኤ፥ ባ" ያጋዱ። ናታ ባደ፥ ሄ ናኣ ዳዮ አሃዱ። 9 ካትያ ናታ ሄ ምሽራቶ፥ "ሀ ናኣ አፋደ፥ ታዉ ንሻ፤ ታን ነዉ ድርጉዋ ጭጋና" ያጋዱ። ምሽራታ ናኣ አፋደ፥ ንዱ። 10 ናአይ ድጭና፥ ካትያ ናትኮ አ አሃዱ፤ እ እዝዉ ናኣ ግዴዳ፤ "ታን ሃፐ አ ከሳድ" ጋደ፥ ሙሳ ጋ ሱንዱ።✝2:10 ኪታ 7:21

ሙሴ ሚድያማ ቢታ ባቃቴዳ

11 ሙሴ ድጭ ዎጋ ግዲደ፥ እት ጋላስ ባረ አሳይ ደእያ ሳኣ ቢደ፤ ኡንቱንቱ ዴጾ ኪታ ኪተትሽን ጼሌዳ። ግብጼ ቢታ አሳ እቱ፥ እሻቱዋ ግዴዳ እብራዋቱዋፐ እቱዋ ዋሽን በኤዳ።✝2:11 እብራ. 11:24✝2:11-14 ኪታ 7:23-28 12 እ ያ ሃ ጼልና፥ ኦንነ ባይናዋ በኢደ፥ ሄ ግብጼ ብታንያ፤ ዎደ ሻፍያ ግዶን ቆሴዳ። 13 ዎንተ ጋላስ ከሲደ፥ በእተ! ሀቼ ቃይ ላኡ እብራዌቱ ዋቲኖ። ናቄዳዋ እ፥ "ኔን ነ እሻ ግዴዳ እብራውያ አያዉ ደቻይ?" ያጊደ ኦቼዳ። 14 ሄ ብታኒ፥ "ኔና ኑ ቦላ ሞድያዋነ ዳና ኦ ሱንዳዌ ኦኔ? ኔን ሄ ግብጼ ብታንያ ዎዳዋዳን፥ ታናካ ዎናዉ ቆፓይ?" ያጌዳ። ሙሴ ሄ ዎደ፥ "ታን ኦዳባይ ኤረት ድጌዳ" ያግ ቆፒደ ያዬዳ።

15 ካቲካ ሀዋ ስሴዳ ዎደ፥ ሙሳ ዎናዉ ኮዬዳ፤ ሽን ሙሴ ካትያፐ ባቃቲደ፥ ሚድያማ ጋድያን ደአናዉ ቢደ ሃ ኦላ ዶናን ኡቴዳ።✝2:15 ኪታ 7:29፤ እብራ. 11:27 16 ሄ ዎደ ሚድያማ ቄሳቱዋፐ እቶ ላፑን ማጫ ናናይ ደኢኖ፤ ኡንቱንቱ ባረንቱ አዉዋ ዶርሳቱዋ ሃ ኡሻናዉ ዎንግርያን ሃ ዱቂ ኩንናዉ ዬድኖ። 17 ሄንንቻቱ ዪደ ማጫ ናና የደርሴድኖ፤ ሽን ሙሴ ደንድ ኤቂደ፥ ኡንቱንታ አሼዳነ ኡንቱንቱ ዶርሳቱዋ ሃ ኡሼዳ። 18 ኡንቱንቱ ባረንቱ አዉዋ ዮቶረኮ ዬዳ ዎደ፥ "ሀቼ ዋን ኤለካ ዬድቴ?" ያጊደ ኦቼዳ።*2:18ዮቶረ ሙሴ ቦሉዋ፤ አዉ ሀራ ሱንይ ራኡኤላ። 19 ኡንቱንቱ ዛሪደ፥ "ግብጼ ጋደ አሳ እቱ ኑና ሄንንቻቱዋፐ አሼዳ፤ እ ኑዉ ሃካ ዱቂደ ዶርሳ ዉድያ ኡሼዳ" ያጌድኖ። 20 እ ባረ ማጫ ናና፥ "ያትና እ ሀቃን ደኢ? ህንተንቱ ሄ ብታንያ አያዉ አግ ባሼድቴ? አነ አ ጼሲደ፥ ምያባ ሾቢተ" ያጌዳ። 21 ሙሴ ሄ ብታንያና ያን ደአናዉ ማየቴዳ፤ ብታኒካ ባረ ናቶ ጽፓሮ ሙሴዉ ማቻቶ ኦደ እሜዳ። 22 ጽፓራ አቱማ ናኣ የልና፥ ሙሴ አ፥ "ታን አሳ ጋድያን በተ ግዳድ" ያጊደ፥ ገርሾማ ግ ሱንዳ።

23 ጮራ ላይፐ ጉይያን፥ ግብጼ ካቲ ሀይቄዳ። እስራኤላቱ ባረንቱ አይለተፐ ኡንኤቲደ ዋሴድኖ፤ ኡንቱንቱ ዋሴዳ ዋሱ ፑደ ጾሳኮ ጋኬዳ። 24 ጾሳይ ኡንቱንቱ ኡንኣ ዋሱዋ ስሲደ፥ እ አብራሃመና፥ ይሳቃናነ ያቆባና ጫቄዳ ጫቁዋ ሀሳዬዳ።✝2:24 ዶመ 15:13-14 25 ሄዋ ድራዉ፥ ጾሳይ እስራኤላቱዋ ጼሊደ ኡንቱንቱ ድራዉ ቆፔዳ።*2:25 ኡንቱንቱ ድራዉ ቆፔዳ፦ እት በን ብለይ ኡንቱንቶ ባረና ቆንጭሴዳ ያጌ።