18 አሳይ ኡባይ ጉጉንይ ጉጉምያዋነ ዋልቃንይ ዎልቃምያዋ በኤዳ፤ ማላካታ ዋሱዋ ስሴዳ፤ ቃይ ደሪ ጩዋትያዋካ በኤዳ፤ አሳይ ያሻን ኮኮሪደ፥ ሃኩዋን ኤቄዳ።20:18-19 እብራ. 12:18-19 19 ኡንቱንቱ ሙሳ፥ "ኔን ኑዉ ሃሳያ፤ ኑን ስሳና፤ ሽን ኑን ሀይቀናዳን፥ ጾሳይ ኑዉ ሃሳዮፖ" ያጌድኖ። 20 ሙሴ አሳ፥ "ጾሳይ ህንተንታ ፓጫናዉ፥ ናጋራ ህንተንቱ ኦና ማላ፥ አ ያሻይ ህንተንቱ ዎዛናን ደአናዳን፥ እ ዬዳ ድራዉ ያዮፕተ" ያጌዳ። 21 አሳይ ሃክ ኤቂደእሽን፥ ጾሳይ ደእያ ሳኣ ዎልቃማ ማኮ ሙሴ ሺቄዳ።
ያርሽያ ሳአቱዋን ጎኤትያ ዎጋቱዋ
22 ሄዋፐ ጉይያን፥ መና ጎዳይ ሙሳ፥ "እስራኤልያ አሳዉ ሀዋዳን ያጋደ ኦዳ፤ ‘ታን ሳሉዋፐ ህንተንቶ ሃሳዬዳዋ ህንተንቱ ህንተንቱ ሁጲያዉ በኤድታ። 23 ታ ማታን አይ ኤቃነ ኦፕተ፤ ብራ ኤቃ ዎይ ዎርቃ ኤቃ ህንተንቶ ኦፕተ።
24 " ‘ኔን ታዉ ያርሹዋ ያርሽያ ሳኣ ኡርቃፐ መደ ነ ጹግያ ያርሹዋ፥ ነ እትፐተ ያርሹዋ፥ ነ ዶርሳቱዋነ ነ ዴሻቱዋፐ ነ ሚዛቱዋ አ ቦላ ያርሻ። ታ ሱንይ ቆፈታና ማላ ኦዳ ሳኣ ኡባን፥ ታን ህንተንቱኮ ያደ፥ ህንተንታ አንጃና። 25 ኔን ታዉ ያርሹዋ ያርሽያ ሳኣ ሹቻፐ መፐ፥ ማሰቴዳ ሹቻፐ መፓ፤ አያዉ ጎፐ፥ ኔን ማስያ ሚሻን አ ቦቾፐ፥ ነ አ ቱንሳሳ።20:25 ዛረ. 27:5-7፤ ኢያሳ 8:31 26 ታ ያርሹዋ ሳኣ ፑደ ጋይያን ከሶፓ፤ አያዉ ጎፐ፥ ኔን ከስያ ዎደ፥ ነ ካሉ ቤተ’ ያጋደ ኦዳ።