ዎርቃፐ መቴዳ ማራ
(ዛረ. 9:6-29)
1 አሳይ ሙሴ ደርያፐ ዎናን ሎይ ጋምኤዳዋ በኤዳ ዎደ፥ አሮና ዩሹዋን ሺቂደ፥ "ሃያ፤ ኔን ኑና ካለያ ጾሳቱዋ ኑዉ መ። ግብጼ ጋድያፐ ኑና ከሴዳ ሙሳ ግዶፐ፥ እ ዋኔደንቶነ ኑን ኤሮኮ!" ያጌድኖ።32:1 ኪታ 7:40 2 አሮነ ኡንቱንታ፥ "ህንተንቱ ማቻቱዋ ሀይንነ ህንተንቱ አቱማ ናናነ ማጫ ናናቱዋ ሀይን ደእያ ዎርቃ ከሲደ፥ ታዉ አኪደ አህተ" ያጌዳ። 3 ሄዋፐ ጉይያን አሳይ ኡባይ ባረ ሀይ ዎርቃ ከሲደ፥ አሮናዉ አሄድኖ። 4 እ ሄዋ ኡንቱንቱ ኩሽያፐ አኪደ፥ ሲልሴዳዋፐ ጉይያን ቆጽያባን ቆጺደ፥ ማራ ማላትያ ኤቃ ኦደ መዳ።32:4 1 ካታ. 12:28፤ ኪታ 7:41
አሳይ፥ "እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ" ያጌዳ። 5 አሮነ ሀዋ በኤዳ ዎደ፥ ሄ ማራ ስንን ያርሽያ ሳኣ ግምቢደ፥ "ዎንታ መና ጎዳ ባላ ጋላሳ ግዳናዋ" ያጊደ ኤርሴዳ። 6 ሄዋ ድራዉ፥ ዎንተ ጋላስ አሳይ ጉራን ደንዲደ፥ ጹግያ ያርሹዋ ሺሼዳ፤ እትፐተ ያርሹዋካ ያርሼዳ። ያቲደ አሳይ ማናዉነ ኡሻናዉ ኡቴዳ። ም ኡሽ ስሚደ፥ ቃይ ዱራናዉ ደንዴዳ።32:6 1 ቆሮ. 10:7
7 ያንና መና ጎዳይ ሙሳ፥ "ኔን ኤለካ ዱገ ዎ፤ አያዉ ጎፐ፥ ነ አሳይ፥ ኔን ግብጼፐ ከሳደ አሄዳዌ ናጋራ ኦደ፥ ባረንቱ ሁጲያ ቱንሴድኖ። 8 ታን ኡንቱንታ አዛዜዳ ኦግያፐ ኡንቱንቱ ኤለካ ሸርእ ጌድኖ። ዎርቃ ሲልሴዳ ማራ ማላትሲደ፥ ባረንቶ ኤቃ መደ አዉ ጎይኔድኖ፤ አዉ ያርሼድኖ። ኡንቱንቱ፥ ‘እስራኤላቶ፥ ህንተንታ ግብጼ ጋድያፐ ከሴዳ ህንተንቱ ጾሳቱ ሀዋንታ’ ያጌድኖ" ያጌዳ።
9 መና ጎዳይ ሙሳ፥ "ታን ሀ አሳ በኣድ፤ ኡንቱንቱ ሞርጊ ሌፋቴዳ አሳ። 10 ሀእ ታ ሀንቁ ኡንቱንቱ ቦላ ኤጽ ከስና፥ ታን ኡንቱንታ ባይዛናዋ ኔን ታና ድጎፓ። ያታደ ታን ኔና ዎልቃማ ካዉተ ኦና" ያጌዳ።
11 ሽን ሙሴ መና ጎዳ ባረ ጾሳ ሀዋዳን ያጊደ ዎሴዳ፤ "አቤት መና ጎዳዉ ኔን ነ ዎልቃማ ዎልቃንነ ነ ምኖ ኩሽያን ግብጼፐ ከሳደ አሄዳ ነ አሳ ቦላ ነ ሀንቁ አያዉ ኤጽ ከስ?32:11-14 ፓይ. 14:13-19 12 ግብጼቱ፥ ‘ጾሳይ ኡንቱንታ ደረቱዋ ቦላን ዎናዉነ ጋድያፐ ፕት ይሳናዉ፥ ኢታ ሀልቹዋን ከሴዳ’ አያዉ ግኖ? ነ ያሽያ ሀንቁዋፐ ስማ፤ ነ አሳ ይሳናዉ ቆፖዋ አጋ ባሻ። 13 ነ አይለቱዋ አብራሃማ፥ ይሳቃነ ያቆባ ሀሳያ፤ ኔን ኡንቱንቶ፥ ‘ታን ህንተንቱ ዛርያ ሳሉዋ ጾልንተቱዋዳን ዳርሳና፤ ሀ ታን ህንተንቶ እማና ጌዳ ጋድያ ኡባካ ህንተንቱ ዛርያዉ እማና፤ ኡንቱንቱ ሄ ጋድያ መናዉ ላታና’ ጋደ ነ ሁጲያን ኔን ጫቄዳ ቃላ ሀሳያ" ያጌዳ።32:13 ዶመ 22:16-17፤ 17:8 14 ሄዋ ድራዉ፥ መና ጎዳይ ባረ አሳ ቦላ ኢታባ አሀናዉ ኦዴዳዋ አጊደ፥ ኡንቱንታ ማሬዳ።
15 ሄዋፐ ጉይያን ሙሴ ታሙ አዛዛቱ ኡንቱንቱን ጻፈት ኡቴዳ ላኡ ማርካተ ሹቻቱዋ ባረ ኩሽያን ኦይቂደ፥ ደርያፐ ዱገ ዎዳ። ሄ ሹቻቱ ላኡ ባጋናካ ጻፈቴድኖ። 16 ሄ ማሰቴዳ ሹቻቱዋ ጊግሴዳዌ ጾሳ፤ ሹቻ ቦላ ዎጪደ ጻፌዳዌካ ጾሳ።
17 ኢያሱ አሳ ጫቡዋ ስሴዳ ዎደ፥ ሙሳ ሀዋዳን ያጌዳ፤ "ዱንካኔዳ ሳኣን ኦላ ዋሱ ስሰቴ" ያጌዳ።
18 ሙሴ ዛሪደ፥ "ታን ስስያዌ ሀዌ የፐ አትና፥ ጾኔዳዋንቱ ኮሻ ዎይ ጾነቴዳዋንቱ ኮሻ ግደና" ያጌዳ።
19 ሙሴ ዱንካኔዳ ሳኣ ማቴዳ ዎደ፥ ማራነ ዱሩዋ በኢደ ሎይ ሀንቀቲደ ባረ ኩሽያን ኦይቆ ማርካተ ሹቻቱዋ ደርያ ጻጱዋን ኦሊደ መንሬዳ። 20 ኡንቱንቱ መዳ ማራካ አኪደ፥ ታማን ጹጌዳ፤ ሄዋፐ ጉይያን ሊቃና ጋካናዉ ጋጪደ ሃ ቦላ ላሊደ፥ እስራኤልያ አሳይ ኡሻናዳን ኦዳ።
21 ሄዋፐ ጉይያን፥ ሙሴ አሮና፥ "ሀ አሳይ ኔና ዋትኔ ኔን ኡንቱንታ ሀዋ ማላ ዎልቃማ ናጋራዉ ካለዳዌ?" ያጌዳ።
22 አሮንካ ዛሪደ፥ "ታ ጎዳዉ፥ ሀንቀቶፓ፤ ሀ አሳይ ኢታ ኦናዉ አይ ኬሻ ኮይንቶ ኔን ኤራሳ። 23 ኡንቱንቱ ታና፥ ‘ኑና ካለያ ጾሳቱዋ ኑዉ መ። አያዉ ጎፐ፥ ሀ ኑና ግብጼፐ አሄዳ ሙሴ እ ዋኔደንቶነ ኑን ኤሮኮ!’ ያጌድኖ። 24 ታን ኡንቱንታ፥ ‘ህንተ ቦላ ደእያ ዎርቃ ከሲደ፥ ሀምተ’ ያጋድ። ሄዋፐ ጉይያን ኡንቱንቱ ታዉ እሜዳ ዎርቃ ታን ታማን የግና፥ ሀ ማራይ ከሴዳ" ያጌዳ።
25 አሮነ አሳ ገደ ጮ የድ አግና፥ አሳይ ባረ ሞርከቱዋ ስንን ካዉሺደ ካቴዳዋ ሙሴ በኤዳ። 26 ሄዋ ድራዉ፥ ሙሴ ዱንካኔዳ ሳኣ ገልያ ፐንግያን ኤቂደ ሀዋዳን ያጌዳ፤ "መና ጎዳ ባጋ ግዴዳ አሳይ ኦንነ ታኮ ዮ!" ያጌዳ። ሌዋቱ ኡባይ አኮ ሺቄድኖ።
27 ሄዋፐ ጉይያን እ ኡንቱንታ፥ "መና ጎዳይ እስራኤልያ ጾሳይ ሀዋዳን ያጌ፤ ‘አሳይ ኡባይ ማሻ ባረ ጼሳን ጼሳን ዳንጮ፤ ዱንካኔዳ ሳኣን ጋጻፐ ጋጻ ጋካናዉ፥ ጉየዉነ ስንዉነ ስመረቶ፤ እቱ እቱ ባረ እሻ፥ ባረ ላግያነ ባረ ሾሩዋ ዎ ያጌ’ " ያጌዳ። 28 ሌዋቱ ሙሴ አዛዜዳዋዳን ኦድኖ፤ ሄ ጋላስ አሳፐ ሄዙ ሻኣ ኬሻይ ሀይቄዳ። 29 ሄዋፐ ጉይያን ሙሴ ሌዋቱዋ፥ "ሀቼ ህንተንቱ ጾሳዉ ዱማቴድታ፤ አያዉ ጎፐ፥ ህንተንቱ ህንተንቱ ናናነ ህንተንቱ እሻቱዋ ዎናዉካ አዛዘቴድታ፤ ሀቼ መና ጎዳይ ህንተንታ አንጃና" ያጌዳ።
ሙሴ እስራኤልያ አሳዉ ዎሴዳ
30 ዎንትሳ ጋላስ ሙሴ አሳ፥ "ህንተንቱ ዎልቃማ ናጋራ ኦድታ፤ ሽን ሀእ ታን መና ጎዳኮ ፑደ ደርያ ከሳና፤ ህንተንቱ ናጋራ ታን አቶ ጊሳንታንቶነ" ያጌዳ። 31 ያትና ሙሴ መና ጎዳኮ ስም ቢደ ሀዋዳን ያጌዳ፤ "ሀ አሳይ ዎልቃማ ናጋራ ኦዳ፤ ኡንቱንቱ ባረንቶ ዎርቃፐ ጾሳቱዋ መድኖ። 32 ሽን ሀያና፥ ሀእ ኡንቱንቱ ናጋራ አቶ ያጋ፤ ሄዌ ዮፐ፥ ኔን ጻፌዳ ማዝጎብያፐ ታና ቁጫ" ያጌዳ።32:32 ማዝ. 69:28፤ ሳፃ 3:5
33 መና ጎዳይ ዛሪደ ሙሳ፥ "ታን ታ ማዝጋባፐ ቁጫናዌ ታ ቦላ ናጋራ ኦዳ አሳቱዋ ሱን። 34 ሀእ ባደ፥ ሀ አሳ ታን ነዉ ኦዴዳ ሳኣ ካለ፤ ታ ኪታንቻይካ ኔና ካለና፤ ሽን ታን ሙራናዉ ዎዲ ጋክና፥ ኡንቱንታ ኡንቱንቱ ናጋራ ድራዉ ሙራና" ያጌዳ።
35 አሮነ ዎርቃፐ ማራ ምስልያ መናዳን አሳይ ኦዳ ድራዉ፥ መና ጎዳይ አሳ ቦላ ዎልቃማ ቦሻ የዴዳ።