ላኤንዋ መቴዳ ማሰቴዳ ሹቻቱዋ
(ዛረ. 10:1-5)
1 መና ጎዳይ ሙሳ ሀዋዳን ያጌዳ፤ "ኮይሮዋንታ ማላትያ ላኡ ሹቻቱዋ ማሳደ ጊግሳ፤ ያቶፐ ታን ሄ ማሰቴዳ ሹቻቱዋ ቦላ ካሰ ኔን መንዳ ሹቻቱዋ ቦላን ደእያ ቃላቱዋ ጻፋና። 2 ዎንታ ዎንታ ፑደ ሲና ደርያ ከሳናዉ ጊጋ፤ ያታደ ታና ያን ደርያ ሁጲያን ኤቃ ናጋ። 3 ኔናና ኦንነ ከሶፖ፤ ዎይ ደርያ ቦላ ሀቃንካ ቤቶፖ፤ ሀራይ አቶ ዶርሳ ዉዲ ዎይ መህያ ዉዲካ ደርያ ስንን ሄመቶፖ" ያጌዳ።
4 ሄዋ ድራዉ፥ ሙሴ ኮይሮ ሹቻቱዋ ማላትያ ላኡ ሹቻቱዋ ማሲደ መና ጎዳይ አዛዜዳዋዳን፥ ሹቻቱዋ ባረ ኩሽያን ኦይቂደ፥ ዎንታ ጉራና ፑደ ሲና ደርያ ከሴዳ። 5 መና ጎዳይ ሻርያን ዱገ ዎደ፥ አናና ያን ኤቄዳ፤ "ታን መና ጎዳ" ያጊደ ባረ ሱን አዋዬዳ። 6 መና ጎዳይ ሙሴ ስንና ሀዋዳን ያጊደ አዋዪደ አዳ፤ "ታን መና ጎዳ፤ ታን መና ጎዳ፤ ቃረታይነ ማሮተይ ኩሜዳ ጾሳ፥ ዳንዳያንቻ፥ አገና ሲቁ ዳሬዳዋነ ዳሪ አማነትያዋ።34:6 ከሳ 20:5-6፤ ፓይ. 14:18፤ ዛረ. 5:9-10፤ 7:9-10 7 ታን ታ አገና ሲቁዋ ሻአቶ ናግያዋ፤ ኢታተ፥ ማካላነ ናጋራ አቶ ያግያዋ። ግዶፐካ፥ ባይዞዋ ሙረናን አገናዋ፤ አዎቱዋ ናጋራ ድራዉ ናናነ ናናቱዋ ናና፥ ሄዘን የለታነ ኦይደን የለታ ጋካናዉ ሙርያዋ" ያጊደ አዋዬዳ።
8 ሄዋፐ ጉየ ሙሴ ኤለካ ቢታን ጉፋኒደ ጎይኔዳ፤ 9 "አቤት ጎዳዉ፥ ኔን ታናን ናሸቴዳዋ ግዶፐ፥ ኑናና እትፐ ደንዳ። ሀዌ አሳይ ሞርጊ ሌፋቴዳዋ ግዶፐነ፥ ኑ ኢታተነ ኑ ናጋራ አቶ ያጋደ፥ ኑና ነ አሳ ኦ" ያጌዳ።
ቃላ ጫቁ ኦራጼዳ
(ከሳ 23:14-19፤ ዛረ. 7:1-5፤ 16:1-17)
10 ያትና መና ጎዳይ ሀዋዳን ያጌዳ፤ "ታን ህንተናና ቃላ ጫቁዋ ገላድ፤ ሀዋፐ ካሰ ሳኣ ኡባን ደእያ ካዉተ ኡባን ሀን ኤረና ማላልስያባ ነ አሳ ኡባ ስንን ኦና፤ ታን መና ጎዳይ፥ ህንተንቶ ኦያ ኪታይ አይ ኬሻ ማላልስያበንቶ ኔን ኡንቱንቱ ግዶን ደእያ አሳይ ኡባይ በአና። 11 ሀቼ ታን ህንተንታ አዛዝያ አዛዙዋ ናግተ፤ ህንተንቱ ስንፐ አሞረቱዋ፥ ካናነቱዋ፥ ሂተቱዋ፥ ፓርዘቱዋ፥ ሂዌቱዋነ ያቡሳቱዋ ታን የደርሳና። 12 ኡንቱንቱ ህንተንቶ ጲረ ግደና ማላ፥ ህንተንቱ ብያ ጋድያን ደእያ አሳና ቃላ ጫቁዋ ገሎፕተ። 13 ኡንቱንቱ ያርሽያ ሳኣ ኮልተ፤ ኡንቱንቱ ጎይንያ ሹቻቱዋካ መንሬተ፤ ቃይ አሼሮ ጌተትያ ኡንቱንቱ ማጫ ጾሳት ካሻ ቃንጸሬ ኦልተ።34:13 ዛረ. 16:21 14 ታን መና ጎዳይ ቃናትያ ጾሳ ግድያ ድራዉ፥ ታፐ ሀራ ጾሳቶ ጎይኖፕተ።
15 "ሄ ጋድያን ደእያ አሳቱዋና አያ ቃላ ጫቁዋካ ገሎፕተ፤ አያዉ ጎፐ፥ ኡንቱንቱ ታናን አማነተናን እጺደ ባረንቱ ጾሳቱዋ ካልያ ዎደነ ኡንቱንቶ ያርሽያ ዎደ፥ ኡንቱንቱ ህንተናካ ሾባና፤ ህንተንቱ ኡንቱንቱ ያርሾቱዋ ማና። 16 ቃይ ህንተንቱ ኡንቱንቱ ማጫ ናናቱዋፐ ዶሪደ፥ ህንተንቱ አቱማ ናናቶ እማና፤ ሄ ዎደ ሄ ማጫ ናናይ ታናን አማነተናን እጺደ፥ ባረንቱ ጾሳቱዋ ካሊደ፥ ህንተንቱ አቱማ ናናካ ባረንቱዋዳን ኦስሳናዋንታ።
17 "ህንተንቶ ጎይንያ ጾሳቱዋ አያፐካ ሲልሲደ መፕተ።34:17 ከሳ 20:4፤ ዎጋ 19:4፤ ዛረ. 5:8፤ 27:15
18 "ማጋገ ኡክ ባላ ቦንችተ፤ ታን ህንተንታ አዛዜዳዋዳን፥ ላፑን ጋላሳዉ እርሹ ገለናን ኡከቴዳ ኡክ ሚተ፤ ሄዋካ ህንተንቱ ግብጼፐ ከሴዳ አቢባ አግናን ኦተ።34:18 ከሳ 12:14-20፤ ዎጋ 23:6-8፤ ፓይ. 28:16-25
19 "አት ኡሉዋፐ ባይራ የለትያ አቱማ ናኣ ኡባይ ታዋ፤ ህንተንቱ መህያ ኡባፐ ቦራ ግድና፥ ዎይ ዶርሳ ግድና፥ ባይራይ ታዋ፤34:19 ከሳ 13:2 20 ኮይሮ የለቴዳ ሀርያ ማራ ዶርሳ ማራና ላማደ ዎዛ፤ ዎዛና ዮፐ፥ አ ቆያ መንደ ዎ። ነ ናናቱዋፐ ባይራ የለቴዳ አቱማ ናኣ ኡባ ዎዛ።34:20 ከሳ 13:13
"ኦንነ እምያዋ ኦይቀናን፥ መላ ኩሽያና ታ ስንን ቤቶፖ።
21 "ኡሱፑን ጋላሳ ኦተ፤ ሽን ላፑን ጋላሳን ሸምፕተ፤ ጎሽያ ዎድያን ቃይ ካ ጫክያ ዎድያን ላፑን ጋላሳን ሸምፕተ።34:21 ከሳ 20:9-10፤ 23:12፤ 31:15፤ 35:2፤ ዎጋ 23:3፤ ዛረ. 5:13-14
22 "ባይራ ዘረቴዳ ዛርጋ ህንተንቱ ጫክያ ዎደ፥ ሳምንታቱዋ ባላ ቦንችተ፤ ላይ ዉርሰ ካ ሺሽያ ዎደካ፥ ሺሹዋ ባላ ቦንችተ።34:22 ዎጋ 23:15-21፤ ፓይ. 28:26-31 23 ላይን ሄዙ ገደ እስራኤልያ አቱማ አሳይ ኡባይ ኡባ ሞድያ ጾሳ፥ እስራኤልያ መና ጎዳ ስንን ቤትኖ። 24 ካዉተቱዋ ታን ህንተንቱ ስንፐ የደርሳደ ከሳና፤ ያታደ ህንተንቱ ዛዋ ታን አሳና። መና ጎዳ ህንተንቱ ጾሳ ስንን ህንተንቱ ላይን ሄዙ ገደ ቤታናዉ ፑደ ከስያ ዎደ፥ ኦንነ ህንተንቱ ጋድያ አሞተና።
25 "ህንተንቱ ታዉ ሱ ያርሹዋ ያርሽያ ዎደ፥ እርሹዋ የጊደ ኡኬዳ ኡክና ያርሾፕተ። ፓስጋ ቦንችያ ጋላሳዉ ያርሼዳ ያርሹዋፐ ዎንትዉ አያይነ አቶፖ።34:25 ከሳ 12:10
26 "ህንተንቱ ጋደን ባይራ ካኤዳ ካፐ ኮይሮ ሙሩታ መና ጎዳ ህንተንቱ ጾሳ ጎልያ አህተ።34:26 ዛረ. 24:21፤ 26:2
"ዴሻ ማራ አ አት ማን ዶይሶፕተ" ያጌዳ።
27 መና ጎዳይ ሙሳ፥ "ታን ኔናናነ እስራኤልያ አሳና ቃላ ጫቁዋ ገልያዌ ሀ ቃላቱ ግያ ማራና ግድያ ድራዉ፥ ሀ ቃላቱዋ ጻፋ" ያጌዳ። 28 ሙሴ ቁማ ሜናንነ ሃ ኡሸናን፥ ኦይታሙ ጋላሳነ ኦይታሙ ቃማ መና ጎዳና ያን ጋምኤዳ፤ ቃላ ጫቁዋ ቃላቱዋ፥ ታሙ አዛዙዋ ማሰቴዳ ሹቻን ጻፌዳ።
ሙሴ ሶምእ ፖኤዳ
29 ሙሴ ጾሳና ሃሳዪደ ጋምኤዳ ድራዉ፥ ሄ ላኡ ማርካተ ሹቻቱዋ እ ባረ ኩሽያን ኦይቂደ ሲና ደርያፐ ዱገ ዎዳ ዎደ፥ አ ሶምኢ ፖኤዳ፤ ሽን እ ሄዋ ኤርቤና።34:29-35 2 ቆሮ. 3:7-16 30 አሮነነ እስራኤልያ አሳይ ኡባይ ሙሳ ጼሊደ፥ አ ሶምኢ ጶልያዋ በኤድኖ፤ ኡንቱንቱ አኮ ሺቃናዉ ያዬድኖ። 31 ሽን ሙሴ ኡንቱንታ ጼስና አሮነነ ሽቁዋ ካለያ ካፓቱ ኡባይ አኮ ስሜድኖ፤ እ ኡንቱንታ ሃሳይሴዳ። 32 ሄዋፐ ጉይያን እስራኤልያ አሳይ ኡባይ አኮ ሺቅና መና ጎዳይ አዉ ሲና ደርያን እሜዳ አዛዙዋ ኡባ እ ኡንቱንቶ እሜዳ።
33 ሙሴ ኡንቱንቶ ኦድያዋ ዉርሴዳ ዎደ፥ ባረ ዴሙዋ ናጻላን ካሜዳ። 34 ሽን ሙሴ መና ጎዳ ስን አናና ሃሳያናዉ ገልያ ዎደ አዉደነ ከሳና ጋካናዉ፥ ናጻላ ባረ ሶምኡዋፐ ቃር ድጌ። ሄዋፐ ከሲደ፥ መና ጎዳይ አዛዜዳዋ እስራኤልያ አሳዉ ኦዴ። 35 ኦድያ ዎደ፥ ኡንቱንቱ አ ሶምኢ ጶልያዋ በኤድኖ። ሄዋ ድራዉ፥ ሙሴ መና ጎዳና ሃሳያናዉ ባና ጋካናዉ፥ ባረ ዴሙዋ ዛረደካ ናጻላን ካሜ።