ጾሳይ ኢያሳ አዛዜዳ
1 ጾሳ ቆማይ ሙሴ ሀይቄዳዋፐ ጉይያን፥ ጾሳይ ሙሳ ማድያ ነዌ ናኣ ኢያሳ፥ ሀዋዳን ያጌዳ፤ 2 "ታ ቆማይ ሙሴ ሀይቄዳ። ሄዋ ድራዉ ኔንነ ሀ አሳይ ኡባይ ደንዲደ ታን እስራኤልያ አሳዉ እምያ ጋድያ ገላናዉ ሀዋ ዮርዳኖሳ ሻፋ ፕንተ። 3 ታን ሙሴዉ ኦዴዳዋዳን፥ ህንተንቱ ገዲ የያ ሳኣ ኡባ ታን ህንተንቶ እማድ።1:3-5 ዛረ. 11:24-25 4 ህንተንቱ ዛዋይ ኔጌባ ባዙዋፐ ደንዲደ፥ ሊባኖሳ ደርያ ጋካናሳ፤ ኤፍራጺሳ ጌተትያ ዎጋ ሻፋፐ ደንዲደ፥ ሂተቱዋ ጋድያ ኡባና ጉጂደ፥ አዋይ ዉልያ ባጋና ደእያ ሜድትራነ አባ ጋካናሳ። 5 ኔን ደኤዳ ላይ ኡባን አይ አሳይነ ኔና ኦለቲደ ተኤና። ታን ሙሴና ግዴዳዋዳን፥ ኔናናካ ግዳና፤ ታን ኔና ኡባካ የግከነ አግከ።1:5 ዛረ. 31:6፣ 8፤ እብራ. 13:5 6 ምና፤ ጻላ! አያዉ ጎፐ፥ ታን ኡንቱንቱ ማይዛ አዋቶ እማና ጋደ ጫቄዳ ጋድያ ኔን ሀ አሳ ላትሳናሳ።1:6 ዛረ. 31:6፣ 7፣ 23 7 ምና፤ ሎይ ጻላ! ታ ቆማይ ሙሴ ኔና አዛዜዳ ዎጋ ኡባ ምንሳደ ናጋ። ኔን ብያሳኣ ኡባን ነዉ ሱራና ማላ፥ አፐ ኡሸቻ ዎይ ሀድርሳ ቦፓ። 8 ሀ ዎጋ ማጻፋይ ነ ዶናፐ ሻከቶፖ፤ አን ጻፈቴዳዋ ኡባ ምንሳደ ናጋናዉ፥ ጋላስነ ቃማ አ ቆፓ። ያቶፐ፥ ነዉ ኡባባይካ እንጀታናነ ጊጋና። 9 ምና፤ ጻላ! ነ ብያሳኣ ኡባን ታን ጎዳይ ነ ጾሳይ ኔናና ደእያ ድራዉ፥ ያዮፓ! ህርጎፓ! ጋደ ታን ኔና አዛዛድ" ያጌዳ።