ኢያሳ 12

ሙሴ ኦለቲደ ጾኔዳ ካተቱዋ

1 እስራኤልያ አሳይ ዮርዳኖሳ ሻፋፐ አዋይ ዶልያ ባጋና ደእያ አርኖና ዛንጋራፐ ቢደ ሄርሞነ ደርያ ጋካናዉ፥ ቃይ አዋይ ዶልያ ባጋና አራብያ ጋ ጋካናዉ ደእያ ጋድያ ካተቱዋ ኡባ ጾኒደ ዎ አኬዳ። ሄ ጾነቴዳ ካተቱ ሀዋፐ ካሊደ ጻፈቴዳዋንታ።✝12:1-5 ፓይ. 21:21-35፤ ዛረ. 2:26—3:11 2 ኡንቱንቱፐ እቱ፥ ሀሰቦና ካታማን ኡቴዳ አሞራዋናቱዋ ካትያ ስሆና። እ ሞዴዳ ሳአይ አርኖና ዛንጋራ ጋጻን ደእያ አሮኤራ ካታማፐ ደንዲደ፥ አሞናቱዋ ዛዋ ጋካናዉ ደእያ ያቦቃ ሻፋ ጋኬ፤ ሄ ሳአይ ጋላኣደ ግያ ቢታዉ ዛዋ። 3 እ ቃይ አዋይ ዶልያ ባጋና አራብያ ጋፐ ባጋ አኪደ፥ ጋሊላ አባፐ ቢደ፥ ቤት-ያሽሞታ ካታማና አደ፥ ፕስጋ ግያ ደርያፐ ጋርሳ ባጋና ደእያ ማጽነ አባ ጋካናዉ፥ ቢታቱዋ ሞዴዳ።

4 ሄዋዳንካ፥ ራፋየቱዋ ዛርያፐ ዉርሰን አቴዳ ባሳነ ጋድያ ካትያ ኦጋ ጾኔዳ። ኦግ አስታሮታ ካታማንነ ኤድራአ ካታማን ደኤዳ። 5 እ ሞዴዳ ሳአይ ሄርሞነ ደርያ፥ ሳላካ ግያ ሳኣ፥ ባሳነ ጋድያ ኡባ ቢደ ጋሹራነ ማእካ አሳቱዋ ዛዋ ጋኬ፤ ቃይ ጋላኣደ ጋድያፐ ባጋ አኪደ፥ ቢደ ሀሰቦና ካትያ ስሆና ዛዋ ጋካናዉ ደእያ ጋድያ ጋኬ።

6 መና ጎዳ ቆማይ ሙሴነ እስራኤልያ አሳይ ሀ ካተቱዋ ጾኔድኖ። መና ጎዳ ቆማይ ሙሴ ኡንቱንቱ ቢታቱዋ ሮቤላ ዛረቶ፥ ጋደ ዛረቶነ ምናሰ ዛራቱዋፐ ባጋዉ ሻክ እሜዳ።✝12:6 ፓይ. 32:33፤ ዛረ. 3:12

ኢያሱ ኦለቲደ ጾኔዳ ካተቱዋ

7 ኢያሱነ እስራኤልያ አሳይ ዮርዳኖሳ ሻፋፐ አዋይ ዉልያ ባጋ ጋድያን ደእያ ካተቱዋ ኡባ ጾኔድኖ። ሄ ቢታቱ ሊባኖሳ ዎምባን ደእያ ባኣል-ጋዳፐ ዶሚደ፥ ገድሳ ባጋና ኤዶማ ማታን ደእያ ሀላቃ ደርያ ጋኪኖ። ኢያሱ ሄ ቢታቱዋ ሻክ፥ እስራኤልያ ዛረቶ ላታ ጋደ ኦደ እሜዳ። 8 ሄ ቢታቱ፥ ገዝያ፥ አዋይ ዉልያ ባጋና ደእያ ኦላትያ፥ ዮርዳኖሳ ጋ፥ ይሁዳ ባዙዋነ ኔጌባ ባዙዋ። ሄ ቢታቱ ካሰ ሂተቱ፥ አሞራዋናቱ፥ ካናነቱ፥ ፓርዛዋናቱ፥ ሂዌቱነ ያቡሳዋናቱ ደኤዳ ሳኣ። 9 እስራኤልያ አሳይ ጾኔዳ ካተቱ ሀዋንታ፤ ያርኮ ካትያ፥ ቤቴለ ማታን ደእያ አይ ካትያ፥ 10 የሩሳላመ ካትያ፥ ከብሮና ካትያ፥ 11 ያርሙታ ካትያ፥ ላክሻ ካትያ፥ 12 ኤግሎና ካትያ፥ ገዜራ ካትያ፥ 13 ዳቢራ ካትያ፥ ገዴራ ካትያ፥ 14 ሆርማ ካትያ፥ አራዳ ካትያ፥ 15 ሊብና ካትያ፥ አዱላማ ካትያ፥ 16 ማቄዳ ካትያ፥ ቤቴለ ካትያ፥ 17 ታፑሀ ካትያ፥ ሄፌራ ካትያ፥ 18 አፌቃ ካትያ፥ ላሻሮና ካትያ፥ 19 ማዶና ካትያ፥ ሀጾራ ካትያ፥ 20 ሽምሮን-ማሮና ካትያ፥ አክሻፋ ካትያ፥ 21 ታእናካ ካትያ፥ ማግዶ ካትያ፥ 22 ቃዴሳ ካትያ፥ ቃርመሎሳን ደእያ ዮቅናኣማ ካትያ፥ 23 ዶራ ገዝያን ደእያ ዶራ ካትያ፥ ገልጋላን ደእያ ጎይማ ካትያነ 24 ትርጻ ካትያ። ኡንቱንቱ ኡባይ ሀታማነ እት ካተቱዋ።