ኢያሳ 11

ኢያሱ ሁጲሳ ባጋ ጋድያ ካተቱዋ ጾኔዳ

1 ሀጾራ ካታማ ካትያ ያብን እስራኤልያ አሳይ ጾኔዳዋ ስሴዳ ዎደ፥ ማዶና ካታማ ካትያ ዮባባዉ፥ ሽምሮና ካታማ ካትያዉ፥ አክሻፋ ካታማ ካትያዉ፥ 2 ሁጲሳ ባጋና ገዝያን ደእያ ካተቶ፥ ጋሊላ አባፐ ገድሳ ዮርዳኖሳ ዎምባን ደእያ ካተቶ፥ አዋይ ዉልያ ባጋና ጋን ደእያ ካተቶነ አዋይ ዉልያ ባጋና ደእያ ዶራ ካትያዉ አሳ ኪቴዳ። 3 ቃይ አዋይ ዶልያ ባጋናነ አዋይ ዉልያ ባጋና ደእያ ካናነቶ፥ አሞረቶ፥ ሂተቶ፥ ፓርዘቶ፥ ገዝያን ደእያ ያቡሳቶነ ምጽጳ ቢታን ሄርሞነ ደርያፐ ጋርሳና ደእያ ሂዌቶ ኪቴዳ። 4 ኡንቱንቱ ኡባይ ባረንቱ ኦላንቻቱዋ ደንደ፥ እስራኤልያ ኦላናዉ እትፐ ጋከቴድኖ። ሄ ኦላንቻቱ ፓራቱዋናነ ፓራ ጋረቱዋና ጋከቲደ፥ ፓይድና ዉረና አባ ዶና ሻፍያዳን ጮራቴድኖ። 5 ሄ ካተቱ ኡባይ ባረንቱ ዎልቃ እትፐ ጋደ፥ እስራኤልያ አሳ ኦላናዉ መሮማ ግያ ሃ ማታን ዱንካኔድኖ።

6 መና ጎዳይ ኢያሳ፥ "ኔን ኡንቱንቶ ያዮፓ! ታን ዎንት ሀኖደ ኡንቱንታ ኡባቱዋካ ዎደ፥ እስራኤልያ አሳዉ አደ እማና። ኔን ኡንቱንቱ ፓራቱዋ ኡባ ግልዳያና፤ ኡንቱንቱ ፓራቱዋ ጋረቱዋካ ታማን ጹጋና" ያጌዳ። 7 ኢያሱነ አ ኦላንቻቱ ኡባይ ኡንቱንቱ አኬከናን ደእሽን መሮማ ሃ ማታን ኡንቱንቱ ቦላ ፑቱ ጊደ፥ ኡንቱንታ ኦሌድኖ። 8 መና ጎዳይ ኡንቱንታ እስራኤላቱ ኩሽያን አደ እሜዳ። ኡንቱንታ ጾኒደ፥ ዎልቃማ ሲዶና ግያ ጋድያ፥ ምስራፎታ-ማይማነ አዋይ ዶልያ ባጋና ደእያ ምጽጳ ዎምባ ጋካናዉ የደርሴድኖ። ኡንቱንቱፐ እት አሳነ አሸናን ዎድኖ። 9 ኢያሱ መና ጎዳይ አ አዛዜዳዋ ኡባ ኡንቱንቱ ቦላን ፖሌዳ፤ ኡንቱንቱ ፓራቱዋካ ግልዳዬዳ፤ ፓራ ጋረቱዋካ ታማን ጹጌዳ።

10 ሄዋፐ ጉይያን ኢያሱ ጉየ ስሚደ፥ ሀጾራ ግያ ካታማ ጾኒደ ኦይቂደ ሄ ካታማ ካትያ ማሻን ዎዳ። ሄ ዎደ ሀጾራ ካታማይ ሄ ካዉተ ኡባዉ ሁጰ ካታማ። 11 እስራኤልያ አሳይ ሄ ካታማን ደእያ አሳ ኡባ ቃራ ማሻን ዎዳ። ሸምፑ ፓጻ ደእያዋ ኡባ እቱዋነ አሸናን ዉርስ ዎድኖ። ኢያሱ ሀጾራ ካታማካ ታማን ጹጌዳ።

12 መና ጎዳ ቆማይ ሙሴ አዛዜዳዋዳን፥ ኢያሱ ሄ ካተቱዋ ካታማቱዋነ ኡንቱንቱ ካተቱዋ ኡባ ኦሞዲደ አሳ ኡባ ቃራ ማሻን ዉርስ ዎዳ። 13 ግዶፐነ፥ ኢያሱ ጹጌዳ ሀጾራ ካታማፐ አትና፥ እስራኤልያ አሳይ ዞዝያ ቦላን ኬጸቴዳ ካታማቱዋ ኡባ ጹግበይክኖ። 14 እስራኤልያ አሳይ ሄ ካታማቱዋፐ ቦንቄዳ ሚሻ ኡባነ መህያ ኡባ ባረንቶ አኬድኖ። ሽን አሳ ኡባ ይሳና ጋካናዉ ቃራ ማሻን ዎድኖ፤ ፓጻ ደእያዋ አያካ አሽበይክኖ። 15 መና ጎዳይ ባረ ቆማ ሙሳ አዛዜዳዋዳን፥ ሙሴካ ኢያሳ አዛዜዳ። ኢያሱካ አዛዙዋ ፖሌዳ፤ መና ጎዳይ ሙሴዉ አዛዜዳዋ ኡባፐ እ ኦናን አጌዳባይ አያይነ ባዋ።

ኢያሱ ኦይቄዳ ጋድያ

16 ሄዋዳን ኦደ ኢያሱ ሄ ጋድያ ኡባ፥ እስራኤልያ ዞዛቱዋ፥ ኔጌባ ባዙዋ ኡባ፥ ጎሸና ግያ ጋድያ ኡባ፥ አዋይ ዉልያ ባጋና ደእያ ዛንጋራነ አራብያ ጋ አኬዳ። 17 ሄ ቢታይ ኤዶም ደእያ ሀላቃ ግያ ደርያፐ ዶም ቢደ፥ ሄርሞነ ደርያፐ ጋርሳ ባጋና ደእያ ሊባኖሳ ዎምባን ደእያ ባኣል-ጋዳ ጋካናዉ ደእያ ሳኣ ጋኬ። ኡንቱንቱ ካተቱዋ ኡባ ኢያሱ ኦሞዲደ ዎዳ። 18 ኢያሱ ዳሮ ዎድያ ሄ ካተቱዋ ኡባና ኦለቲደ ጋምኤዳ። 19 ጋባኦናን ደእያ ሂዌቱዋፐ አትና፥ ሀራ ካታማይ እቱነ እስራኤላቱዋና ሳሮ ደአና ጫቁዋ ጫቀትቤና፤ እስራኤላቱ ሄ ካታማቱዋ ኡባ ኦላን ጾኒደ ኦይቄድኖ። 20 መና ጎዳይ ሙሳ አዛዜዳዋዳን፥ ኢያሱ ኡንቱንታ ቃረት ባይናን እቱዋነ አሸናን ዉርስ ዎዳ። አያዉ ጎፐ፥ ኡንቱንቱ እስራኤላቱዋና ኦለታናዳን መና ጎዳይ ባረ ሁጲያዉ ኡንቱንቱ ዎዛና ሙምሴዳ።✝11:20 ዛረ. 7:16

21 ሄ ዎደ ኢያሱ ቢደ ገዝያን፥ ከብሮና ካታማን፥ ዳቢራ ካታማን፥ አናባ ካታማን፥ ይሁዳ ገዝያን ኡባንነ እስራኤልያ ገዝያን ኡባን ደእያ አናቀ ዘረ አዱሳቱዋ ዎ ዉርሴዳ። ኢያሱ ኡንቱንታነ ኡንቱንቱ ካታማ ኡባና ይሴዳ። 22 አናቀ ዛራቱዋፐ እስራኤልያ ጋድያን ኦንነ አትቤና፤ ሽን አማሬዳዋንቱ ጋዛ፥ ጋተነ አሽዶዳ ካታማቱዋ ጻላላን አቴድኖ። 23 መና ጎዳይ ሙሳ አዛዜዳዋዳን፥ ኢያሱ ጋድያ ኡባ ኦይቂደ እስራኤልያ አሳዉ ኡንቱንቱ ዛርያን ዛርያን ሻክ እሜዳ። ሄዋፐ ጉይያን ቢታይ ኦላፐ ሸምፔዳ።