ኢያሳ 2

ኢያሱ ጌድያዋንታ ያርኮ ኪቴዳ

1 ነዌ ናአይ ኢያሱ ጋድያ ጌድያ ላኡ አሳቱዋ ሺጽማ ጌተትያ ሳኣፐ ቆሱዋን ኪቲደ ኡንቱንታ፥ "ቢተ፤ ጋድያ ጌድተ፤ ያርኮ ካታማ ቃይ ዱማ ጌድተ" ያጌዳ።

ሄዋፐ ኡንቱንቱ ቢደ፥ ራኣቦ ጌተትያ ሻርሙጻት ሶ አቃናዉ ገሌድኖ።✝2:1 እብራ. 11:31፤ ያቆባ 2:25 2 ያርኮ ካቲ፥ "እስራኤልያ አሳፐ ኪተቴዳዋንቱ ሀ ጋድያ ጌዳናዉ ቃማ ዬድኖ" ግያ ኦዱዋ ስሴዳ።

3 ያርኮ ካቲ ራኣብዉ ሀዋዳን ያጊደ ኪቴዳ፤ "ነ ሶ ዪደ ገሌዳ አሳቱዋ ከሳደ እማ። አያዉ ጎፐ፥ ኡንቱንቱ ጋድያ ኡባ ጌዳናዉ ዬድኖ" ያጌዳ።

4 ሽን ምሽራታ ሄ ላኡ አሳቱዋ ቆሳ ድጋደ፥ ሀዋዳን ያጋዱ፤ "ኤ አሳቱ ታኮ ዬድኖ፤ ሽን ኡንቱንቱ ሀቃፐ ዬደንቶነ ታን ኤራበይከ። 5 ኦማርስ ካታማ ፐንግያ ጎርዳና ሀንያ ዎደ፥ ኡንቱንቱ ከሲደ ቤድኖ፤ ኡንቱንቱ ሀቃ ቤድኖንቶ ታን ኤርከ። ኤሌል ካልያዋ ግዶፐ፥ ህንተንቱ ኡንቱንታ ኦይቃንታ" ያጋዱ። 6 ሽን ራኣባ አሳቱዋ ጎልያ ቦላን ደምባዪደ ኦዳ ሳኣ ከሳደ፥ ሱፍያ ጌተትያ ማዩዋ ከስያ ታልባ ዳላ ዶርያ ግዶን ኡንቱንታ ቆሳ ዎዱ። 7 ያትና፥ አሳቱ ጌድያዋንታ ኮያናዉ ከሲደ፥ ዮርዳኖሳ ሻፋ ፕኑዋ አፍያ ኦግያ ኦይቂደ ቤድኖ። ኮይያዋንቱ ካታማፐ ከሶንን፥ ካታማ ፐንጊ ጎርደቴዳ።

8 ጌድያዋንቱ ገምእሻናፐ ካሰታደ፥ አ ኡንቱንቱኮ ፑደ ከሳደ፥ ኡንቱንታ ሀዋዳን ያጋዱ፤ 9 "ጾሳይ ሀ ጋድያ ህንተንቶ እሜዳዌ፥ ህንተንቱ ኑና ዎልቃማ ያሻ ያሽያዋነ ሀ ጋድያን ደእያ አሳይ ኡባይ ህንተንቶ ህርጋ ሀይቂያዋ ታን ኤራይ። 10 አያዉ ጎፐ፥ ግብጼ ጋድያፐ ህንተንቱ ከሴዳ ዎደ፥ ህንተንቱ ስንን ዞኦ አባ ጾሳይ ዎት መልሴደንቶነ ኑን ስሴዶ። ቃይ ዮርዳኖሳ ሻፋፐ አዋይ ዶልያ ባጋና ደእያ አሞረ ጋድያ ካተቱዋ ላአቱዋ፥ ስሆናነ ኦጋነ ህንተንቱ ዎት ኡባና ይሴደንቶነ ስሴዶ።✝2:10 ከሳ 14:21፤ ፓይ. 21:21-35 11 ኑን ሄዋ ስሴዳ ዎደ፥ ኑ ዎዛናይ ኮልዴዳ፤ አሳይ ኡባይ ህንተንቶ ጻልያዋ አግ ባሼዳ። አያዉ ጎፐ፥ ጾሳይ ህንተንቱ ጾሳይ ቦላ ሳሉዋንካ ጋርሳ ሳኣንካ ጾሳ። 12 ሄዋ ድራዉ፥ ታን ህንተንቶ ኬኬዳዋዳን፥ ህንተንቱካ ታ አዉዋ ጎልያ አሳዉ ኬካናዳን ታዉ ጾሳን ሄዋዉካ አማንያ ማላታ እምተ። 13 ታ አዉዋነ ታ ዳዮ፥ ታ እሻቱዋነ ታ ምቼቱዋ ኡንቱንቱሳ ግዴዳዋ ኡባ ፓጻ አግተ፤ ኑና ሀይቁዋፐ አሽተ" ያጋዱ።

14 ሄ አሳቱ፥ "ኑን ኦዳዋ ኔን ኦደናን አግና፥ ኑን ነዉ ጫቄዳ ጫቁዋ ፖላና ዮፐ፥ ጾሳይ ኑና ዎ! ጾሳይ ሀ ጋድያ ኑዉ እምያ ዎደ፥ ኑን ነዉ አማነታናነ ኬካና" ያጌድኖ።

15 ራኣባ ደእያ ኬይ ካታማ ድርሳና ኦይቀቲደ ኬጸት ኡቴዳ ድራዉ፥ ማስኮትያና ዎዶሩዋ ዱገ የዳደ፥ አን ዱገ ዎዱ። 16 ራኣባ ኡንቱንታ፥ "ህንተና ኮይያዋንቱ ደመና ማላ፥ ደርያ ቢደ ኡንቱንቱ ስማና ጋካናዉ፥ ያን ሄዙ ጋላሳ ቆሰትሽተ። ሄዋፐ ጉይያን ህንተንቱ ብያሳኣ ቢተ" ያጋዱ።

17,18 አሳቱ እዞ፥ "ኑን ነ ጋድያ ገልያ ዎደ፥ ሀ ዞኦ ዎዶሩዋ ኔን ኑና ከሴዳ ማስኮትያን ቃቻና ዮፐነ ነ አዉዋ፥ ነ ዳዮ፥ ነ እሻቱዋነ ነ ሶ አሳ ኡባ ኔኮ ሶ አሀና ዮፐ፥ ኔን ኑና ጫቂሴዳ ጫቁ ኑዉ ጎመተና። 19 ኦንነ ነ ሶፐ ካረ ኦግያ ከሲደ ሀይቂንቶ፥ ሄዌ አ ጎመ፤ ኑን ሄዋን ኦሸቶኮ። ኔናና ሶን እትፐ ደእያዌ ኩሽያን ቦሸቶፐ፥ አ ሱ ጎሚ ኑና ጋኮ። 20 ሽን ኑን ኦዳዋ ኔን ኦዶፐ፥ ኔን ኑና ጫቀዳ ጫቁ ኑዉ ጎመተና" ያጌድኖ።

21 ሄዋፐ ጉየ እዛ፥ "ህንተንቱ ጌዳዋዳን ሀኖ" ጋደ፥ ኡንቱንታ ሞይዛዱ። ኡንቱንቱ ቤዳዋፐ ጉይያን፥ ሄ ዞኦ ዎዶሩዋ ማስኮትያን ቃቻዱ።

22 ኡንቱንቱ ፑደ ገዝያ ቢደ፥ ያን ቆሰቴድኖ፤ የደርስያዋንቱ ያርኮ ስማና ጋካናዉ፥ ኡንቱንቱ ያን ሄዙ ጋላሳ ጋምኤድኖ። የደርስያዋንቱ ኦግያ ኡባን ኮዬድኖ፤ ሽን ኡንቱንታ ደምቤይክኖ። 23 ሄዋፐ ጉይያን ሄ ላኡ አሳቱ ደርያፐ ዎደ፥ ዮርዳኖሳ ሻፋካ ፕኒደ፥ ነዌ ናኣ ኢያሱኮ ስሚደ ዬድኖ። ባረና ጋኬዳዋ ኡባ አዉ ኦዴድኖ። 24 ኡንቱንቱ ኢያሳ፥ "ጾሳይ ቱሙ ቢታ ኡባ ኑዉ አ እሜዳ። ቃይ ጋድያን ደእያ አሳይ ኡባይ ኑዉ ያሻ ኮልዴዳ" ያጌድኖ።