ኢያሳ 9

ጋባኦና አሳቱ ኢያሳ ጭሜድኖ

1 ዮርዳኖሳ ሻፋፐ አዋይ ዉልያ ባጋና ደእያ ካተቱ ኡባይ፥ ገዝያን ደእያዋንቱ፥ ጋን ደእያዋንቱ፥ ሜድትራነ አባ ባዙዋ ኦይቂ ቢደ ሊባኖሳ ጋካናዉ ደእያዋንቱ፥ ሂተቱዋ፥ አሞራዋናቱዋ፥ ካናነቱዋ፥ ፓርዛዋናቱዋ፥ ሂዌቱዋነ ያቡሳዋናቱዋ ካተቱ ኡባይ እስራኤልያ አሳይ ጾኔዳዋ ስሴድኖ። 2 ኢያሳነ እስራኤልያ አሳ ኦላናዉ ባናዉ እትፐ ሺቄድኖ።

3 ጋባኦና ካታማን ደእያ ሂዌቱ ኢያሱ ያርኮ ካታማንነ አይ ካታማን ኦዳዋ ስሴዳ ዎደ፥ 4 ጭማናዉ ኮዬድኖ። ኡንቱንቱ ሽንቃ ቃቺደ ጩርቃ ዶንያቱዋ ዳሳ ዎ ስኬዳ ኤሳ ኦጎሮቱዋ ሀርያን ጫኒደ፥ ኢያሱኮ ኪተቴድኖ። 5 ኪተቴዳ አሳቱ ዉሬዳ ኤጫ ማዩዋ ማዪደ፥ ዎ ስኬዳ ጫማ ባረንቱ ገድያን ዎድኖ፤ ኡንቱንቱ ሽንቃዉ ጊደ ኦይቄዳ ቁማይ ኡባይ መሌዳዋነ ፑሉሜዳዋ። 6 ሄዋፐ ጉይያን ኡንቱንቱ ኢያሱ ዱንካኔዳ ሳኣ ገልጋላ ቢደ፥ አውነ እስራኤልያ አሳዉ፥ "ኑን ሃኮ ጋድያፐ ዬዶ። ሀይ ኑናና ሳሮ ደአና ማላ ቃላ ጫቁዋ ጫቃ" ያጌድኖ።

7 እስራኤልያ አሳይ ሂዌቱዋ፥ "ህንተንቱ ኑ ጋድያን ደእያ አሰንቶነ፥ አያን ኤሪደ ህንተናና ጫቀታኔ?" ያጌዳ።

8 ሄዋፐ ጉየ ኡንቱንቱ ኢያሳ፥ "ኑን ነ ቆማቱዋ" ያጌድኖ።✝9:8 ፓይ. 21:21-35

ኢያሱ፥ "ህንተንቱ ኦኔ? ሀቃፐ ዬድቴ?" ያጊደ ኦቼዳ።

9 ሽን ኡንቱንቱ፥ "ኑን ነ ቆማቱ መና ጎዳ ነ ጾሳ ዋርያ ስሲደ፥ ዳሮ ሃኮ ጋድያፐ ዬዶ። እ ግብጼ ጋድያን ኦዳዋ ኡባ ኑን ስሴዶ። 10 ቃይ ዮርዳኖሳ ሻፋፐ ሄፍን አዋይ ዶልያ ባጋና ደእያ አሞራዋናቱዋ ካተቱዋ ላኡዋ፥ ሀሰቦና ካትያ ስሆናነ አስታሮታ ካታማን ደእያ ባሳነ ካትያ ኦጋ እ ኦዳዋካ ስሴዶ። 11 ኑ ጋደ ጭማቱነ ኑ ቢታን ደእያ አሳይ ኡባይ ኑና፥ ‘ህንተ ባና ኦግያዉ ሽንቃ ኦይቂደ፥ ቢደ ኡንቱንቱና ጋከቲደ ኡንቱንታ፥ "ኑን ህንተንቱ ቆማቱዋ፤ ህንተንቱ ኑናና ሳሮ ደአና ማላ ጫቁዋ ጫቄርክተ" ያግተ’ ያጌድኖ።

12 "ኑን ህንተንቱኮ ያናዉ ኑ ሶፐ ሽንቃ አክያ ጋላስ፥ ሀ ኡክይ ሆኡዋ፤ ሽን ሀእ መሌዳዋነ ፑሉሜዳዋ በእተ! 13 ሀዋንቱ ኤሳ ኦጎሮቱ ኑን ኩንያ ዎደ ኦራ፤ ሽን ሀእ ዳከቴዳዋ በእተ! ኦጊ ሃኮ ግዴዳዋ ጋሱዋን፥ ኑ ማዩነ ኑ ጫማይ ዉሬዳ" ያጌድኖ። 14 መና ጎዳ ኦቼናን፥ እስራኤልያ አሳይ ኡንቱንቱ ሽንቃፐ አማሬዳዋ አኬዳ። 15 ያትና፥ ኢያሱ ኡንቱንቱ ፓጻ አቲደ ባረናና ሳሮ ደአና ማላ ጫቁዋ ኡንቱንቱና ጫቀቴዳ፤ ማባራ ካለያዋንቱካ ሄ ጫቁዋ ቃላ አናዳን ጫቄድኖ።

16 ኡንቱንቱና ጫቁዋ ጫቀቴዳ ሄዘን ጋላሳፐ ጉይያን፥ ሀ አሳቱ ኡንቱንቱ ጋድያን ደእያ ሾሮ ግድያዋ እስራኤልያ አሳይ ስሴዳ። 17 እስራኤልያ አሳይ ሄዙ ጋላሳ ሀመቲደ፥ አሳቱ ደእያ ካታማቱዋ ጋኬድኖ። ኡንቱንቱ ካታማቱ ጋባኦና፥ ካፊራ፥ ባኤሮታነ ቅርያት-ይኣሪማ ጌተትኖ። 18 ሽን ማባራ ሱንቱ ኡንቱንቶ መና ጎዳ እስራኤልያ ጾሳ ሱንን ጫቄዳ ድራዉ፥ ኡንቱንታ ዎበይክኖ። ያትና፥ ኩመን ማባራይ ሱንቱዋ ቦላን ዙዙሜዳ። 19 ሽን ካፓቱ ኡባይ ሀዋዳን ያጌድኖ፤ "ኑን ኡንቱንቶ መና ጎዳ እስራኤልያ ጾሳ ሱንን ጫቄዳ ድራዉ፥ ሀእ ስም ኡንቱንታ ቦቻናዉ ዳንዳዮኮ። 20 ሽን ኑን ኡንቱንታ ሀዋዳን ኦና፤ ኑን ኡንቱንቶ ጫቄዳ ጫቁዋ ካድና ጾሳ ሀንቁ ኑ ቦላን ዎናዳን፥ ኡንቱንቱ ፓጻ ደእኖ። 21 ሽን ደኢደ ማባራዉ ኡባዉ ም ቃንጽያዋንታነ ሃ ትክያዋንታ ግድኖ" ያጌድኖ። ሄዋ ድራዉ ጋባኦናቱዋ ሱንቱ ጌዳዋዳን ሀኔድኖ።

22 ኢያሱ ጋባኦና አሳቱዋ ጼጊደ፥ "ኑ ጋድያን ደኢደ፥ ‘ኑን ዳሮ ሃኮ ጋድያፐ ዬዶ’ ጊደ፥ አያዉ ኑና ጭሜድቴ? 23 ህንተንቱ ሄዋ ሀኔዳ ድራዉ ሸቀቴድታ፤ ህንተንቱ መናዉ ታ ጾሳ ጎለን ም ቃንጽያነ ሃ ትክያ አይልያ ግዳና" ያጌዳ።

24 ኡንቱንቱ ኢያሱዉ ዛሪደ ሀዋዳን ያጌድኖ፤ "ኑን ነ ቆማቱ መና ጎዳይ ሀ ጋድያ ኡባ ህንተንቶ እማናዳንነ አን ደእያ አሳ ኡባ ህንተንቱ ስንፐ ይሳናዳን ባረ ቆማ ሙሳ አዛዜዳዋ ጌሺደ ስሴዶ። ሄዋ ድራዉ ህንተፐ ኑ ሸምፖ ዳሮ ያዪደ ሀዋ ኦዶ። 25 ሀእ ስም ኑን ነ ኩሽያን ደኤቶ። ኑና ነዉ ሎአነ ሱረ ማላት ቤቴዳዋዳን ኦ" ያጊደ ዛሬድኖ። 26 ያትና፥ ኢያሱ ኡንቱንታ እስራኤልያ አሳይ ዎናዳን አሼዳ። 27 ሄ ጋላስ ኢያሱ ጋባኦና አሳቱዋ እስራኤልያ ማባራዉነ መና ጎዳዉ ያርሽያ ሳአዉ ም ቃንጻናዳንነ ሃ ትካናዳን ኦና ኡንቱንቱ ሀቼ ጋካናዉ ጾሳይ አሳይ ባረዉ ጎይናናዳን ዶሬዳዌ ሳኣን ሀቃንነ ሄዋዳን ኦደ ደኢኖ።