ኢያሳ 4

ሀሳይስያ ሹቻቱዋ ኤሴድኖ

1 አሳይ ኡባይ ዮርዳኖሳ ሻፋ ፕኒደ ዉሬዳ ዎደ፥ ጾሳይ ኢያሳ፥ 2 "እስራኤልያ አሳፐ ታማነ ላኡ አሳቱዋ ዶራ፤ እት እት ዛርያፐ እት እት አሳ ግዶ። 3 ያታደ ኡንቱንቱ፥ ‘ዮርዳኖሳ ሻፋ ግዶን ቄሳቱዋ ገዲ ኤቄዳ ሳኣፐ ታማነ ላኡ ሹቻቱዋ አክተ፤ ሄ ሹቻቱዋ ቶክ አፊደ፥ ሀቼ ቃማ ህንተንቱ አቅያ ሳኣን ዎተ’ ያጋደ አዛዛ" ያጌዳ።

4 ኢያሱ እስራኤልያ ዛርያፐ እቱዋ እቱዋ አኪደ፥ ታማነ ላኡ አሳ ዶሬዳዋንታ ጼሴዳ። 5 ኡንቱንታ፥ "ጾሳ ህንተንቱ ጾሳ ቃላ ጫቁዋ ታቦታይ ደእያ ሳኣ ጉየ ዮርዳኖሳ ሻፋ ገሊደ እስራኤልያ ዛራቱዋ ፓይዱዋን፥ ኡባይካ እት እት ሹቻ ህንተንቱ ሀሽያን ቶክተ። 6 ሀ ሹቻቱ ጾሳይ ሀቼ ኦዳዋ ህንተንታ ሀሳይስያ ማላታ ግድኖ። ዎደፐ ህንተንቱ ናናይ ህንተንታ፥ ‘ሀ ሹቻቱ አይባቤ?’ ያጊደ ኦችያ ዎደ፥ 7 ህንተንቱ፥ ጾሳ ቃላ ጫቁዋ ታቦታ ስንን ዮርዳኖሳ ሻፋይ ጎገ አጊደ ኤቄዳዋ እስራኤልያ አሳ መናዉ ሀሳይሲኖ። ቃላ ጫቁዋ ታቦታይ ፕንሽን፥ ዮርዳኖሳ ሃይ ሻከቴዳ ያጊደ ኡንቱንቶ ኦድተ" ያጌዳ።

8 እስራኤላቱ ኢያሱ አዛዜዳዋዳን ኦድኖ። ጾሳይ ኢያሶ ኦዴዳዋዳን፥ እስራኤልያ ዛራቱዋ ፓይዱዋን አሳቱ ታማነ ላኡ ሹቻቱዋ ዮርዳኖሳ ሻፋ ግዶፐ አኬድኖ፤ ቶክ አሂደ፥ ባረንቱ አቅያ ሳኣን ዎድኖ። 9 ኢያሱ ቃላ ጫቁዋ ታቦታ ቶኬዳ ቄሳቱዋ ገዲ ዮርዳኖሳ ሻፋ ግዶን ኤቄዳ ሳኣን፥ ሀራ ታማነ ላኡ ሹቻቱዋ ኤሴዳ፤ ሄ ሹቻቱ ሀቼ ጋካናዉ ያን ደኢኖ። 10 ጾሳይ ኢያሳ አዛዜዳዋ ኡባ አሳይ ፖላና ጋካናዉ፥ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶን ኤቂደ ጋምኤድኖ፤ ሙሴ ኢያሳ አዛዜዳ አዛዙካ ሄዋ።

አሳይ ኤሌሊደ ሻፋ ፕኔዳ። 11 አሳይ ኡባይ ፕኔዳዋፐ ጉይያን፥ ጾሳ ቃላ ጫቁዋ ታቦታይነ ቄሳቱ አሳይ ጼልሽን ፕኔድኖ። 12 ሙሴ አዛዜዳዋዳን፥ ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋይ ኦላ ሚሻ ኦይቂደ፥ እስራኤልያ አሳ ስንና ፕን ኡቴድኖ። 13 ኡንቱንቱ ፓይዱ ኦይታሙ ሻአ ግድያዋ። ኡንቱንቱ ጾሳ ስንን፥ ያርኮ ማታን ደእያ ደምባን ኦላዉ ሳልፔድኖ። 14 ሄ ጋላስ ጾሳይ ኢያሳ እስራኤልያ አሳ ኡባ ስንን ቁ ቁ ኦዳ። ሄዋ ድራዉ ሙሳ ቦንቼዳዋዳን ኢያሳካ አ ደኡዋ ላይ ኡባን ቦንቼድኖ።

15 ጾሳይ ካሰ ኢያሳ፥ 16 "ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋፐ ከሳናዳን አዛዛ" ያጊደ ኦድና፥ 17 ኢያሱ ቄሳቱዋ፥ "ዮርዳኖሳ ሻፋፐ ከስተ" ያጊደ አዛዜዳ። 18 ጾሳ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶፐ ከሲደ መላ ቢታ ኡንቱንቱ የዳዋን፥ ኤለካ ዮርዳኖሳ ሃይ ባረ ሳኣ ስሚደ ካሰ ጎግያዋዳን ጋጻ ጋካናዉ ኩሚደ፥ ጎገ ዶሜዳ።

19 አሳይ ኮይሮ አግናን ሄ አግናዉ ታማን ጋላሳን ዮርዳኖሳ ሻፋ ፕኒደ፥ ያርኮና አዋይ ዶልያ ባጋን ዛዋትያ ገልጋላን ዱንካኔድኖ። 20 ኢያሱ ዮርዳኖሳ ሻፋፐ አየቴዳ ታማነ ላኡ ሹቻቱዋ ገልጋላን ኤሴዳ። 21 እስራኤልያ አሳ ሀዋዳን ያጌዳ፤ "ዎደፐ ህንተንቱ ዛራቱ ባረንቱ አዎቱዋ፥ ‘ሀ ሹቻቱ አይባቤ?’ ያጊደ ኦችያ ዎደ፥ 22 ‘እስራኤልያ አሳይ ዮርዳኖሳ ሻፋ መላ ቢታ የደ ፕኔዳዋ ሀሳይስያዋንታ’ ያጊደ ኦድተ። 23 ኑን ፕናና ጋካናዉ፥ ጾሳይ ኑ ጾሳይ ዞኦ አባ ካሰ ኑ ስንን መልሴዳዋዳን፥ ህንተንቱካ ፕናና ጋካናዉ፥ ጾሳይ ህንተንቱ ጾሳይ ዮርዳኖሳ ሻፋ ህንተንቱ ስንን መልሴዳ። 24 ሄዋ እ ኦዳዌ ሳኣን ደእያ አሳይ ኡባይ ጾሳ ዎልቃይ አይ ኬሻ ግተንቶ ኤራናዳንነ ህንተንቱካ ጾሳዉ፥ ህንተንቱ ጾሳዉ፥ መናዉ ያያናዳና" ያጌዳ።