ኢያሳ 8

አይ ካታማይ ጾነቴዳ

1 ጾሳይ ኢያሳ፥ "ያዮፓ፤ ህርጎፓ! ኦላንቻቱዋ ኡባ ኔናና አካደ፥ አይ ካታማ ኦላናዉ ከሳ። አይ ካታማ ካትያ፥ አ አሳ፥ አ ካታማነ አ ቢታ ታን ነ ኩሽያን አደ እማድ። 2 ኔን እያርኮ ካታማነ አ ካትያ ይሴዳዋዳን፥ ሄዋዳንካ አይ ካታማነ አ ካትያ ይሳ። ሽን፥ ቦንቄዳ ኦሞዱዋነ ድኤዳ መህያ ህንተንቶ አክተ። ካታማፐ ጉየ ባጋና ሙጊደ ናግያ ኦላንቻቱዋ ዎ" ያጌዳ።

3 ኢያሱነ ኦላንቻቱ ኡባይ አይ ካታማ ኦላናዉ ደንዴድኖ። ኢያሱ ባረ ኦላንቻቱዋ ግዶፐ ሀታሙ ሻአ ግድያ ምኖ ኦላንቻቱዋ ዶሪደ፥ ቃማን የዴዳ። 4 ኡንቱንታ ሀዋዳን ያጊደ አዛዜዳ፤ "ስስተ፥ ካታማፐ ጉየ ባጋና ሙጊደ ናግተ። ካታማፐ ሃኪደ ቦፕተ፤ ኡባይካ ጊጊደ ናግተ። 5 ታንነ ታናና ደእያ አሳይ ኡባይ ካታማኮ ሺቃና። ሄ ዎደ አይ ካታማ አሳይ ካሰዋዳንካ ኑና ኦላና ጊደ ከሳና፤ ኑን ኡንቱንቱፐ ባቃታና። 6 ካታማፐ ኡንቱንቱ ዉር ከሳና ጋካናዉ፥ ኑን ኡንቱንቶ ዎጻና፤ ያቶፐ ኡንቱንቱ፥ ‘ካሰዋዳንካ እስራኤላቱ ኑ ስንፐ ባቃቲኖ’ ያጋና። 7 ሄ ዎደ ህንተንቱ ሙጌዳ ሳኣፐ ከስነ፥ ካታማ ኦይቂ አጋና፤ ጾሳይ ህንተንቱ ጾሳይ ካታማ ህንተንቱ ኩሽያን አ እማና። 8 ካታማ ኦይቄዳዋፐ ጉይያን፥ ጾሳይ አዛዜዳዋዳን ታማን ጹግተ። ስም ታን ህንተንቶ ኦዳድ" ያጌዳ።

9 ኢያሱ ኦላንቻቱዋ የድና ኡንቱንቱ ሙግያ ሳኣ ቢደ አይ ካታማፐ አዋይ ዉልያ ባጋና ደእያ ቤቴለፐነ አይፐነ ግዱዋን ሙጊደ ናጌድኖ። ሽን ኢያሱ ሄ ጋላስ ቃማ አሳና እትፐ አቄዳ።

10 ዎንተ ጋላስ ጉራን ኢያሱ ደንዲደ፥ ኦላንቻቱዋ ሳልፕሴዳ፤ ያቲደ እነ እስራኤልያ ጭማቱነ ኦላንቻቱዋ ካለደ አይ ካታማ ቤድኖ። 11 አናና ደእያ ኦላንቻቱ ኡባይ ቢደ፥ አይ ካታማ ማቲደ ካታማፐ ሁጲሳ ባጋና ዱንካኔድኖ፤ ኡንቱንቱፐነ አይ ካታማፐነ ግዱዋን ዎምባይ ደኤ። 12 ኢያሱ እቼሹ ሻአ ኦላንቻቱዋ አፊደ፥ ካታማፐ አዋይ ዉልያ ባጋና፥ ቤቴለፐነ አይፐ ግዱዋን ሙጋናዳ ዎዳ። 13 ካታማፐ ሁጲሳ ባጋና ደእያ ኦላንቻቱዋነ ካታማፐ አዋይ ዉልያ ባጋና ሙግ ኡቴዳ ኦላንቻቱዋ ኡባ ሳኣ ኦይዳ። ሄ ጋላስ ቃማ ኢያሱ ሄ ዎምባን አቄዳ።

14 አይ ካታማ ካቲ ሄዋ በኤዳ ዎደ፥ እነ አ ኦላንቻቱነ ኡባይ ጉራን ኤሌል ደንዲደ፥ አራብያ ዱገ አፍያ ኦግያ ኦይቂደ፥ እስራኤልያ አሳና ኦላ ጋከታናዉ ዬድኖ፤ ሽን ካቲ ካታማፐ ጉየ ባጋና ሙግ ኡቴዳ ኦላንቻቱ ደእያዋ ኤርቤና። 15 ኢያሱነ እስራኤልያ ኡባይነ ጾነቴዳዋ ማላቲደ፥ ኡንቱንቱ ስንፐ ባዙዋ ስሚደ ባቃቴድኖ። 16 አይ ካታማን ደእያ አሳይ ኡባይ ኡንቱንታ የደርሳናዉ ጼገቲደ ኢያሳ የደርሲደ ካታማፐ ሃኪደ ቤድኖ። 17 አይንነ ቤቴለን ደእያ አሳይ ኡባይ እስራኤልያ አሳ የደርሳናዉ ዉር ከስ ድግና፥ ካታማይ ናግያዌ ባይናን ጮ ዶያ አቴዳ።

18 ሄዋፐ ጉይያን መና ጎዳይ ኢያሳ፥ "ነ ኩሽያን ደእያ ቶራ አይ ካታማኮ ዛራደ ደን። አያዉ ጎፐ፥ ታን አይ ካታማ ነ ኩሽያን አደ እማና" ያጌዳ። ኢያሱ ባረ ቶራ ካታማኮ ዛሪደ ደንዳ። 19 ኢያሱ ቶራ ያ ዛሪደ ደንዳ ዎደ፥ ሙግ ደእያ ኦላንቻቱ ባረንቱ ሙጌዳ ሳኣፐ ኤሌል ደንዲደ፥ ካታማ ገል አጌድኖ። ኦይቂደ፤ ኤለካ ካታማ ታማን ኦይ አጌድኖ።

20 አይ ካታማ አሳይ ጉየ ስሚደ ጼልያ ዎደ፥ ካታማ ጩዋይ ሳሉዋ ከሴዳዋ በኤድኖ፤ ሽን ያነ ሃነ ባቃታናዉ ዳንዳይበይክኖ። አያዉ ጎፐ፥ ባዙዋ ባቃቴዳ እስራኤልያ አሳይ ባረና የደርሴዳ ኡንቱንቱ ቦላ ጉየ ስሜዳ። 21 ኢያሱነ እስራኤልያ አሳይ ኡባይ ሙግ ኡቴዳ ኦላንቻቱ ካታማ ኦይቄዳዋነ ጩዋይ ሳሉዋ ከሴዳዋ በኤዳ ዎደ ጉየ ስሚደ፥ አይ ካታማ አሳ ዎድኖ። 22 ሙግ ኡቴዳ ኦላንቻቱካ ካታማፐ ኡንቱንቱ ቦላ ከሴድኖ። ያትና፥ አይ ኦላንቻቱ እስራኤልያ ኦላንቻቱዋን ላኡ ባጋና ድረቴድኖ። እት አሳይነ ፓጻ አተናን ዎይ ከስ አከናን ኡባ ዎ ዉርሴድኖ። 23 ሽን አይ ካታማ ካትያ ፓጻ ኦይቂደ፥ ኢያሱኮ አሄድኖ።

24 እስራኤልያ አሳይ አይ ካታማ አሳይ ኡንቱንታ የደርሴዳ ደምባን ቃራ ማሻን ሙሸሬ ዉርሴዳዋፐ ጉይያን፥ ኡባይካ ጉየ አይ ካታማ ስሚደ፥ ካታማን አቴዳ አሳ ኡባ ቃራ ማሻን ዎድኖ። 25 ሄ ጋላስ አይ ካታማ አሳይ አቱማዌነ ማጫዌ ኡባይ ዉር ሀይቄዳ፤ ሀይቄዳ አሳይ ኡባይ ታማነ ላኡ ሻአ። 26 ኢያሱ አይ ካታማን ደእያዋ ኡባ ሙለ ዉርሳና ጋካናዉ፥ ካታማኮ ማል ዎዳ ቶራ ዱገ ዎቤና። 27 ሽን መና ጎዳይ ኢያሳ አዛዜዳዋዳን፥ እስራኤልያ አሳይ ሄ ካታማ መህያነ ደእያባ ባረንቶ አኬድኖ። 28 ኢያሱ አይ ካታማ ጹግና ሀቼ ጋካናዉ ሹቻ ኬላ ግዲደ አት አጌዳ። 29 አይ ካታማ ካትያ ኦማርስ ጋካናዉ ም ቦላን ካቄዳ። አዋይ ዉልያ ዎደ፥ ኢያሱ አዛዝና፥ አ አሃ ካቄዳ ምፐ ዎደ ካታማ ገልያ ፐንግያን ኦሌድኖ፤ አ ቦላን ዳሮ ሹቻ ኬሌድኖ። ሹቻይ ሀቼ ጋካናዉ ሄ ሳኣን ደኤ።

ኤባላ ደርያን ህጊ ናባበቴዳ

30 ሄዋፐ ጉይያን ኢያሱ ኤባላ ግያ ደርያ ቦላን መና ጎዳዉ እስራኤልያ መና ጎዳዉ ያርሹዋ ያርሽያ ሳኣ ግምቤዳ።✝8:30-32 ዛረ. 27:2-8 31 መና ጎዳ ቆማይ ሙሴ እስራኤልያ አሳ አዛዜዳዋዳንነ ሙሴ ህግያ ማጻፋን ጎዳዉ፥ ያርሽያ ሳአይ ማሰትቤናነ ብራታይ ቦችቤና ሹቻፐ ግምበቴዳ። አን መና ጎዳዉ ጹግያ ያርሹዋነ እትፐተ ያርሹዋ ያርሼድኖ።✝8:31 ከሳ 20:25 32 ሄ ሳኣን እስራኤልያ አሳይ ጼልሽን፥ ኢያሱ ሙሴ ህግያ ዱቆዋ ሹቻ ቦላን ጻፌዳ። 33 ሄ ዎደ፥ እስራኤልያ አሳይ ኡባይ፥ እስራኤልያ ዛራቱ፥ አላጋቱ፥ ጭማቱ፥ ጋዳዋቱነ ዳናቱ ኡባይ መና ጎዳ ቃላ ጫቁዋ ታቦታ ቶኬዳ ሌዊያ ዛርያ ግድያ ቄሳቱዋ ስንን ቃላ ጫቁዋ ታቦታፐ ኡሸቻ ባጋናነ ሀድርሳ ባጋና ኤቄድኖ። ኡንቱንቱፐ ባጋ አሳይ ባረንቱ ዞኪያ ጋሪዛማ ግያ ደርያኮ ዛርና፥ ባጋ አሳይ ኤባላ ግያ ደርያኮ ዛሪደ ኤቄድኖ። ኡንቱንቱ መና ጎዳ ቆማይ ሙሴ ካሰ አዛዜዳዋዳን፥ እስራኤልያ አሳ አንጃናዉ ሄዋዳን ሀኔድኖ።✝8:33-35 ዛረ. 11:29፤ 27:11-14 34 ሄዋፐ ጉይያን ህግያ ማጻፋን ጻፈቶዋዳን፥ ኢያሱ ህግያ ቃላ ኡባ፥ አንጁዋካ ሸቃካ ናባቤዳ። 35 ሙሴ አዛዜዳዋ ኡባፐ ኢያሱ ናባበናን አጌዳ እት ቃላይካ ባዋ። ኩመን እስራኤልያ ሺቆ፥ ማጫ አሳዉ፥ ናናቶ፥ ኡንቱንቱ ግዶን ደእያ አላጋቱዋናካ ኡባዉ ናባቤዳ።