ኢያሳ 3

እስራኤልያ አሳይ ዮርዳኖሳ ሻፋ ፕኔዳ

1 ኢያሱነ እስራኤልያ አሳይ ዎንታ ጉራን ደንዴድኖ። ኡንቱንቱ ሺጽማ ጌተትያ ሳኣፐ ደንዲደ፥ ዮርዳኖሳ ሻፋኮ ቢደ ፕነናን ያን ጋምኤድኖ። 2 ሄዙ ጋላሳፐ ጉይያን፥ ካፓቱ ኡንቱንቱ ዱንካኔዳ ሳኣን ስመረቴድኖ። 3 አሳ ሀዋዳን ያጊደ አዛዜድኖ፤ "ጾሳ ህንተንቱ ጾሳ ቃላ ጫቁዋ ታቦታነ አ ቶኬዳ ሌዊያ ዛረ ቄሳቱ ዋ በእያ ዎደ፥ ህንተንቱ ዱንካኔዳ ሳኣፐ ደንዲደ፥ ኡንቱንታ ካልተ። 4 ህንተንቱ ካሰ ሀ ኦግያና ብ ኤረና ድራዉ፥ ህንተንቱ ባና ኦግያ ኡንቱንቱ ህንተንታ በሳና። ሽን ቃላ ጫቁዋ ታቦታኮ ሺቆፕተ፤ ቃላ ጫቁዋ ታቦታፐ ላኡ ሻአ ዋ ግድያዋ ኬሻ ሃኩዋን ኤቂተ" ያጌድኖ።

5 ኢያሱ አሳ፥ "ህንተንቱ ሁጲያዉ ጌይተ፤ አያዉ ጎፐ፥ ጾሳይ ዎንት ህንተንቱ ግዶን ማላልስያባ ኦናዋ" ያጌዳ። 6 ቃይ ኢያሱ ቄሳቱ ዋ፥ "ቃላ ጫቁዋ ታቦታ ቶኪደ፥ አሳፐ ስንዉ አተ" ያጊደ ኦዴዳ። ቃላ ጫቁዋ ታቦታ ቶኪደ፥ አሳፐ ስንዉ አድኖ።

7 ጾሳይ ኢያሳ፥ "ታን ሙሴና ግዴዳዋዳን፥ ኔናና ግዳናዋ እስራኤልያ አሳይ ኡባይ ኤራና ማላ፥ ሀቼ ኡንቱንቱ ስንን ታን ኔና ቁ ቁ ኦናዉ ዶማና። 8 ኔን ቃላ ጫቁዋ ታቦታ ቶክያ ቄሳቱ ዋ፥ ‘ዮርዳኖሳ ሻፋ ዶናዉ ጋክያ ዎደ፥ ሃን ገሊደ ኤቂተ’ ያጋደ አዛዛ" ያጌዳ።

9 ኢያሱ እስራኤልያ አሳ፥ "ሃ ዪተ፤ ጾሳ ህንተንቱ ጾሳ ቃላ ስስተ። 10 ደኡዋ ጾሳይ ህንተንቱ ግዶን ደእያዋነ እ ቱሙፐ ካናነቱዋ፥ ሂተቱዋ፥ ሂዌቱዋ፥ ፓርዘቱዋ፥ ገርጌሰቱዋ፥ አሞረቱዋነ ያቡሳቱዋ ህንተንቱ ስንፐ ከሳናዋ ህንተንቱ ኤራናዌ፥ 11 ሳኣ ኡባ ጎዳ ቃላ ጫቁዋ ታቦታይ ህንተፐ ስንቲደ፥ ዮርዳኖሳ ሻፋ ፕንያ ዎድያና። 12 ሀእ እስራኤልያ ዛራቱዋፐ ታማነ ላኡ አሳቱዋ ዶርተ፤ እት እት ዛርያፐ እት እት አሳ ግዶ። 13 ሳኣ ኡባ ጎዳ፥ ጾሳ ቃላ ጫቁዋ ታቦታ ቶኬዳ ቄሳቱዋ ገዲ ዮርዳኖሳ ሃ ቦችያ ዎደ፥ ቆሞፐ ዱገ ጎግያ ዮርዳኖሳ ሃይ ኤቃና፤ እት ሳኣ ሺቂደ ዶረታና" ያጌዳ።

14 አሳይ ዮርዳኖሳ ሻፋ ፕናናዉ ባረንቱ ዱንካንያፐ ከሴዳ ዎደ፥ ቃላ ጫቁዋ ታቦታ ቶኬዳ ቄሳቱ አሳፐ ስንን ሀመቴድኖ። 15 ካ ጫክያ ዎድያን ኡባን ዮርዳኖሳ ሻፋይ ኩንዳ። ግዶፐነ፥ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ጋክና፥ ኡንቱንቱ ገዲ ሃ ጋጻ የዳ ዎደ፥ 16 ቆሞፐ ዱገ ጎግያ ሃይ ኤቂ አጌዳ፤ ህን ዳርስ ሃኮ ሳን፥ ጻርታና ግያ ሳን ደእያ አዳማ ጌተትያ ካታማን እት ሳኣ ሺቂደ ዶረቴዳ። ዱገ አራባ ጋን ደእያ ማጽነ አባዉ ጎግያ ሃይ ቃይ ኡባይ ዱጺደ አት ባሼዳ። ያትና፥ አሳይ ያርኮ ካታማ ሄፍን ፕኔዳ። 17 እስራኤልያ አሳይ መላ ጋድያ የደ ፕንያ ዎደ፥ አሳይ ኡባይ ፕኒደ ዉራና ጋካናዉ ጾሳ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶን መላ ቢታን ኤቄድኖ።