ኢያሳ 13

ዮርዳኖሳፐ ዶላሃ ባጋና ደእያ ቢታ

1 ኢያሱ ጭሚደ፥ ላይ ሎይ ሱጌዳ ዎደ፥ መና ጎዳይ አዉ፥ "ኔን ጭማዳ፤ ላይካ ሎይ ሱጋዳ። ሽን ኦይቀተናን አቴዳ ዳሮ ቢታይ ብሮ ደኤ። 2 ኦይቀትቤና ቢታቱ ሀዋንታ: ፕልስጼማቱዋ ጋድያነ ጋሹራቱዋ ጋድያ ኡባ። 3 ግብጼፐ አዋይ ዶልያ ባጋና ደእያ ሽሆራ ሻፋፐ ዶሚደ፥ ሁጲሳ ባጋና ደእያ ኤቅሮና ጋድያ ጋካናዉ ደእያ ቢታቱ ኡባይ ካናነ ጋድያን ፓይደቲኖ። እቼሹ ፕልስጼማ ካተቱ ሞድያ ካታማቱ ጋዛ፥ አሽዶዳ፥ አስቃሎና፥ ጋታነ ኤቅሮና ጌተትያ። አዎቱዋ ቢታይካ ብሮ ኦይቀትቤና። 4 ገድሳ ባጋና ካናነቱ ቢታይ ኡባይ፥ ሲዶናቶ ደእያ ማኣራ ግያ ሳፐ ደንዲደ ቢደ፥ አሞራዋናቱዋ ጋድያን ደእያ አፌቃ ካታማ ጋካናስካ ኦይቀትቤና። 5 ገባላቱ ቢታይ አዋይ ዶልያ ባጋና ሊባኖሳ ቢታይ ኡባይ፥ ሄርሞነ ደርያፐ ጋርሳ ባጋና ደእያ ባኣል-ጋዳ ካታማፐ ቢደ፥ ሀማታ ፕኑዋ ጋካናዉ ብሮ ኦይቀትቤና። 6 ሊባኖሳፐ ቢደ ምስራፎታ-ማይማ ጋካናዉ ደእያ ገዝያን ደእያ ሲዶናቱዋ ቢታይካ ኦይቀትቤና። ታን ታ ሁጲያዉ እስራኤልያ አሳ ስንፐ ኡንቱንታ ላጋደ ከሳና። ታን ኔና አዛዜዳዋዳን፥ ኔን ሀ ቢታቱዋ እስራኤልያ አሳዉ ጋደ ኦደ ሻካ።✝13:6 ፓይ. 33:54 7 ሀእ ኔን ሀ ጋድያ ኡዱፑን ዛረቶነ ምናሰ ዛራቱዋፐ ባጋዉ ሻካ" ያጌዳ።

ዮርዳኖሳ ሻፋፐ አዋይ ዶልያ ባጋ ቢታ ሻኩዋ

8 ምናሰ ዛራቱዋፐ ባጋቱ፥ ሮቤላ ዛራቱነ ጋደ ዛራቱ መና ጎዳ ቆማይ ሙሴ ዮርዳኖሳ ሻፋፐ ሄፍን አዋይ ዶልያ ባጋና ኡንቱንቶ ግሽ ዎዳ ጋድያ አኬድኖ።✝13:8 ፓይ. 32:33፤ ዛረ. 3:12 9 ኡንቱንቱ ቢታይ አርኖና ዛንጋራ ጋርሳን ደእያ አሮኤራ ካታማፐ ደንዲደ፥ ሄ ዛንጋራ ግዶን ደእያ ካታማ ኦይቂደ፥ መዳባ ግያ ገዝያ አ ቢደ፥ ድቦና ጋኬ። 10 ቃይ ሀሰቦናን ኡቲደ ሞድያ አሞራዋናቱዋ ካትያ ስሆና ካታማቱዋ ኡባ ኦይቂ ቢደ፥ አሞናቱዋ ዛዋ ጋኬ። 11 ሄዋዳንካ፥ ቃይ ጋላኣደ ጋድያ፥ ጋሹራቱዋ ጋድያ፥ ማእካቱዋ ጋድያ፥ ሄርሞነ ደርያ ኡባነ ሳላካ ጋካናዉ ደእያ ባሳነ ጋድያ ጋኬ። 12 አስታሮታ ካታማንነ ኤድራአ ካታማን ደኢደ ሞድያ፥ ራፋየቱዋ ዛርያፐ ዉርሰን አቴዳ ባሳነ ካትያ ኦጋ ጋድያ ኡባ ኦይቄዳ። ሙሴ ሄ አሳ ኡባ ጾኒደ፥ ኡንቱንቱ ጋድያፐ ላጊደ ከሴዳ። 13 ሽን እስራኤልያ አሳይ ጋሹራ አሳነ ማእካ አሳ ጋድያፐ ከስበይክኖ፤ ሄዋ ድራዉ ኡንቱንቱ ሀቼ ጋካናዉ እስራኤልያ አሳ ግዶን ደኢኖ።

14 ሙሴ ሌዊያ ዛራቱዋ ጻላላዉ ላትያ ጋድያ እምቤና። መና ጎዳይ ሙሴዉ ጌዳዋዳን፥ መና ጎዳይ እስራኤልያ ጾሳዉ ታማን ጹግያ ያርሹዋ ያርሽያዌ ኡንቱንቶ ላታ።✝13:14 ዛረ. 18:1

ግሹዋን ሮቤላ ዘረ ጋኬዳ ቢታ

15 ሙሴ ሮቤላ ዛረቶ ኡንቱንቱ ያራን ያራን ጋድያ ሻክ እሜዳ። 16 ኡንቱንቱ ቢታይ አርኖና ዛንጋራ ጋጻን ደእያ አሮኤራ ካታማፐ ደንዲደ፥ ሄ ዛንጋራ ግዶን ደእያ ካታማ ኦይቂደ፥ መዳባ ገዝያ ጋኬ። 17 ቃይ ሀሰቦና፥ ገዝያን ደእያ ካታማቱዋ፥ ድቦና፥ ባሞት-ባኣላ፥ ቤትባኣል-መኦና፥ 18 ያሃጻ፥ ቅደሞታ፥ መፋኣታ፥ 19 ቅርያታይማ፥ ሲብማ፥ ዛንጋራ ግዶን ደእያ ደርያ ቦላ ደእያ ጼረታ-ሻሀራ፥ 20 ቤት-ፓኦራ፥ ፕስጋ ደርያፐ ጋርሳና ደእያ ጋድያነ ቤት-ያሽሞታ ጌተትያ ካታማቱዋ ኡባ ጋኬ። 21 ሄዋዳንካ፥ ቃይ ገዝያን ደእያ ካታማቱዋነ ሀሰቦና ካታማ ሞዴዳ አሞራዋናቱዋ ካትያ ስሆና ጋድያ ኡባ ጋኬ። ሙሴ ካትያ ስሆናነ ምድያማቱዋ ካፓቱዋ ኤዋ፥ ረቄማ፥ ጹራ፥ ሁራነ ረባአ ጾኔዳ፤ ሀዋንቱ ስሆናፐ ጋርሳና ሄ ጋድያ ሞድያዋንታ። 22 እስራኤልያ አሳይ ኦላን ዎዳ አሳፐ ሀራ፥ ሻሬቹዋ፥ ባኦራ ናኣ ባላኣማካ ማሻን ዎድኖ። 23 ሮቤላ ዛራቱዋ ዛዋይ ዮርዳኖሳ ሻፋ። ሀ ካታማቱነ ኡንቱንቱ ሄራን ደእያ ሞቱ፤ ሮቤላ ዘረ ኡንቱንቱ ያራን ያራን ጋኬዳዋንታ።

ግሹዋን ጋደ ዘረ ጋኬዳ ቢታ

24 ሙሴ ጋደ ዛረቶ ኡንቱንቱ ያራን ያራን ጋድያ ሻክ እሜዳ። 25 ኡንቱንቱ ጋዲ ያእዜራ፥ ጋላኣደን ደእያ ካታማቱዋ ኡባነ አሞናቱዋ ጋድያፐ ባጋ አኪደ፥ ራባፐ አዋይ ዶልያ ባጋና ደእያ አሮኤራ ጋኬ። 26 ሄዋዳንካ፥ ሀሰቦናፐ ደንዲደ፥ ራሞታ-ምጽጳነ በጾኒማ ጋኬ፤ ቃይ ማህናይማፐ ደንድ ቢደ፥ ሎዳባራ ዛዋ ጋኬ። 27 ዮርዳኖሳ ዎምባዉ ግዱዋን ሀሰቦና ካትያ ስሆና ካዉተፐ አቴዳዉንታ፥ ቤት-ሀራማ፥ ቤት-ኒምራ፥ ሱኮታነ ጻፎና ጌተትያ ካታማቱዋ አኬዳ። አዋይ ዶልያ ባጋና ኡንቱንቱ ዛዋይ ዮርዳኖሳ ሻፋ ግዲደ ቢደ፥ ጋሊላ አባ ጋኬ። 28 ሄ ካታማቱነ ኡንቱንቱ ሄራን ደእያ ሞቱ ጋደ ዛረቶ ኡንቱንቱ ያራን ያራን ጋኬዳዋንታ።

ግሹዋን ምናሰ ዛራቱዋፐ ባጋ ጋኬዳ ቢታ

29 ሙሴ ምናሰ ዛራቱዋፐ ባካዉ ኡንቱንቱ ያራን ያራን ጋድያ ሻክ እሜዳ። 30 ኡንቱንቱ ቢታይ ማህናይማነ ባሳነ ጋድያ ኡባ ጻጽ ዋጼ፤ ባሳነ ካትያ ኦጋ ካዉተ ኡባነ ባሳነን ደእያ ኡሱፑን ታሙ ያኢራ ካታማቱዋ ኦይቄ። 31 ቃይ ጋላኣደፐ ባካነ ባሳነን ኦጋ ካዉተይ ሁጰ ግዴዳ አስታሮታነ ኤድራአ ጌተትያ ካታማቱዋ ጋኬ። ሄ ኡባይ ምናሰ ናኣ ማኪና ዛራቱዋፐ ባጋቶ፥ ኡንቱንቱ ያራን ያራን ጋኬዳዋ።

32 ዮርዳኖሳፐ ሄፍንና፥ ያርኮፐ አዋይ ዶልያ ባጋና ደእያ ሞኣበ ደምባን ደኢደ ሙሴ ሻክ እሜዳ ጋዲ ሀዋ። 33 ሽን ሙሴ ሌዊያ ዛረቶ ላትያ ጋድያ እምቤና፤ ካሰ መና ጎዳይ ኡንቱንቶ ጌዳዋዳን፥ መና ጎዳይ እስራኤልያ ጾሳይ ኡንቱንቱ ላታ።✝13:33 ፓይ. 18:20፤ ዛረ. 18:2