Josué 14

ዮርዳኖሳፐ ዉላሃ ባጋና ደእያ ቢታ

1 ቄስያ ኤልኣዛረ፥ ነዌ ናአይ ኢያሱነ እስራኤልያ ዛራቱዋ ካፓቱ፥ ካናነ ጋድያ ኡንቱንታ ያራን ያራን ሻክና፥ ኡንቱንቱ ጋኬዳ ሄራቱ ሀዋፐ ካሊደ ጻፈቴዳዋንታ። 2 መና ጎዳይ ሙሴ ባጋና አዛዜዳዋዳን፥ ኡንቱንቱ ላታ ጋዲ ኡዱፑናነ ባጋ ግድያ ዛረቶ ሳማን ሻከቴዳ።✝14:2 ፓይ. 26:52-56፤ 34:13 3 አያዉ ጎፐ፥ ሙሴ ላአነ ባጋ ግድያ ዛረቶ ዮርዳኖሳ ሻፋፐ ሄፍን አዋይ ዶልያ ባጋና ካሰ ጋድያ እም ዎዳ፤ ሽን ሌዊያ ዛረቶ ኡንቱንቱ ግዱዋን ላታ ጋድያ እምቤና። 4 ዮሴፎ ናናይ ምናሳነ ኤፍሬማ ጌተቲደ ላኡ ዛረ ግዴድኖ። ሙሴ ሌዊያ ዛረቶ ላታ ጋድያ እምቤና፤ ሽን ሄዋ ግሻዉ ኡንቱንቶ ደእያ ካታማቱዋነ ኡንቱንቱ ባረንቱ መህያ ዉድያነ ዶርሳ ዉድያ ሄምያ ሄን ጋደቱዋ እሜዳ።✝14:4 ፓይ. 32:33፤ 34:14-15፤ ዛረ. 3:12-17 5 መና ጎዳይ ሙሳ አዛዜዳዋዳን፥ እስራኤልያ አሳይ ጋድያ ሻክ አኬዳ።

ከብሮነ ካሌባዉ እመቴዳ

6 እት ጋላስ ይሁዳ አሳይ ኢያሱኮ ገልጋል ሺቄድኖ። ኡንቱንቱፐ እቱ፥ ቀኒዝያ ይፉነ ናአይ ካሌብ ኢያሳ ሀዋዳን ያጌዳ፤ "ኑን ቃዴሳ-ባርነን ደእያ ዎደ፥ መና ጎዳይ፥ ጾሳ አሳ ግድያ ሙሴዉ ነባነ ታባ ኦዴዳዋ ኤራሳ።✝14:6 ፓይ. 14:30 7 መና ጎዳ ቆማይ ሙሴ ጋድያ ዎቻደ ያናዳን፥ ቃዴሳ-ባርነፐ ታና ኪትያ ዎደ፥ ታዉ ላይይ ኦይታማ። ሄ ዎደ ታን አዉ አማነትያ ኦዱዋ አሃደ ኦዳድ።✝14:7 ፓይ. 13:1-30 8 ታን መና ጎዳ ታ ጾሳ ፖሎ ካላድ፤ ሽን ታናና ቤዳ አሳቱ አሳ ዎዛና ያሻን ኮልድሴድኖ። 9 ሄ ጋላስ ሙሴ፥ ‘ኔን መና ጎዳ ታ ጾሳ ፖሎ ካሌዳ ድራዉ፥ ነ ገዲ የዳ ቢታይ መናዉ ነዉነ ነ ዛርያዉ ላትያ ጋድያ ግዳናዋ’ ጊደ ጫቄዳ።✝14:9 ፓይ. 14:24

10 "አነ አኬካ፤ መና ጎዳይ ሀ የዉዋ ሙሴዉ ሃሳዮደፐ፥ ኦይታማነ እቼሹ ላይ ግዴዳ። ሄ ዎደፐ እስራኤልያ አሳይ ዎራን ስመረትሽን፥ ሀቼ ጋካናዉ ጾሳይ ታና ፓጻ ዎዳ። በአ፥ ሀእ ታ ላይይ ሆስፑን ታማነ እቼሻ ግዴዳ። 11 ግድናካ ሀእ ታዉ ደእያ ምኖተይ በን ሙሴ ታና ኪትያ ዎደ ደእያ ምኖተካ ማላ። ታን ሀእካ ኦለታናዉነ አያ ግዶፐነ ኦናዉ በን ሄ ዎደዋዳን ዎልቃማ። 12 ሄዋ ድራዉ፥ መና ጎዳይ ታዉ እማና ጌዳ ሀ ገዘ ጋድያ ሀእ ታዉ እማ። ሄ ዎደ፥ አናቀቱ ሄ ጋድያን ደእያዋነ ኡንቱንቱ ካታማቱካ ግታነ ግምበቴዳዋንታ ግድያዋ ኑን ሃሳይሽን ኔን ነ ሁጲያዉ ስሳዳ። ሽን መና ጎዳይ ታናና ግዶፐ፥ እ ጌዳዋዳን፥ ታን ኡንቱንታ ሄ ጋድያፐ የደርሳና" ያጌዳ።

13 ሄዋፐ ጉየ ኢያሱ ይፉነ ናኣ ካሌባ አንጂደ፥ ከብሮና አዉ ላታ ኦደ እሜዳ። 14 መና ጎዳ እስራኤልያ ጾሳ ፖሎ ካሌዳ ድራዉ፥ ከብሮና ጋዲ ሄ ዎድያፐ ሀቼ ጋካናዉ፥ ቀኒዝያ ይፉነ ናኣ ካሌባዉ ላታ ቢታ ግዴዳ። 15 ካሰ ከብሮና ሱንይ ቅርያት-አርባአ ጌተቴ፤ አርባአ ግያ ብታኒ አናቀቱዋ ኡባፐ አዳ አሳ።

ሄዋፐ ጉይያን፥ ሄ ጋዲ ኦላፐ ሸምፔዳ።