1 ሄዋፐ ጉይያን ሌዊያ ዛራቱዋ ያራቱ ካፓቱ ቄስያ ኤልኣዛራኮ፥ ነዌ ናኣ ኢያሱኮነ እስራኤልያ አሳ ዛረቶ ያራቱ ካፓቱዋኮ ሺቄድኖ። 2 ሄዋን ካናነ ጋድያን ደእያ ሴሎን ኡንቱንቱ ሀዋዳን ያጌድኖ፤ "ኑን ደአና ካታማቱዋነ ኑ መህያዉ ሄን ጋደቱዋ ኔን ኑ እማና ማላ መና ጎዳይ ሙሴ ባጋና አዛዜዳ" ያጌድኖ።✝ 3 ሄዋፐ ጉየ መና ጎዳይ አዛዜዳዋዳን፥ እስራኤልያ አሳይ ሌዊያ ዛረቶ ሀ ካታማቱዋነ ሄን ጋደቱዋ ባረንቱ ጋድያፐ ግሺደ ኡንቱንቶ እሜድኖ።

4 ኮይሮ ሳማይ ቃሃታ ያራቶ ከሴዳ። ቄስያ አሮና ዛርያ ሌዋቱ ይሁዳ ዛራቱዋፐ፥ ስሞና ዛራቱዋፐነ ቢንያማ ዛራቱዋፐ ታማነ ሄዙ ካታማቱዋ ሳማን አኬድኖ። 5 አቴዳ ቃሃቱዋ ያራቱ ኤፍሬማ ዛራቱዋፐ፥ ዳና ዛራቱዋፐነ ምናሰ ዛራቱዋ ባጋፐ ታሙ ካታማቱዋ ሳማን አኬድኖ።

6 ገርሾና ያራቱ ይሳኮራ ዛራቱዋፐ፥ አሴራ ዛራቱዋፐ፥ ንፍታሌማ ዛራቱዋፐነ ባሳነን ደእያ ምናሰ ዛራቱዋ ባጋፐ ታማነ ሄዙ ካታማቱዋ ሳማን አኬድኖ።

7 ማራራ ያራቱ ሮቤላ ዛራቱዋፐ፥ ጋደ ዛራቱዋፐነ ዛብሎና ዛራቱዋፐ ታማነ ላኡ ካታማቱዋ አኬድኖ።

8 መና ጎዳይ ሙሴ ባጋና አዛዜዳዋዳን፥ እስራኤልያ አሳይ ሀ ካታማቱዋነ ኡንቱንቱ ሄን ጋደቱዋ ሌዋቶ ሳማን ሻክ እሜድኖ።

9 ይሁዳ ዛራቱዋፐነ ስሞና ዛራቱዋፐ እስራኤልያ አሳይ አኪደ እሜዳ ካታማቱዋ ሱንይ ሀዋፐ ካሊደ ጻፈቴዳ። 10 ኮይሮ ሳማይ ሌዊያ ዛራቱዋፐ የለቲደ፥ ቃሃታ ያራ ግዴዳ አሮና ዛረቶ ከስና፥ ኡንቱንቶ እሜዳ ካታማቱ ሀዋንታ: 11 እስራኤልያ አሳይ ይሁዳ ገዝያን ደእያ ቅርያት-አርባአ ዎይ ከብሮናነ አ ዩሹዋን ደእያ ሄን ጋደቱዋ ኡንቱንቶ እሜድኖ። (አርባእ አናቀ አዉዋ።) 12 ሽን ሄ ካታማ ዩሹዋን ደእያ ጋደቱዋነ ሞቱዋ ይፉነ ናኣ ካሌባዉ ላታ ኦደ እሜድኖ። 13 ቄስያ አሮና ዛረቶ አሳ ዎዳ አሳይ ባቃት ቢደ አትያ ከብሮነ ካታማነ አ ሄን ጋደቱዋ፥ ሊብናነ አ ሄን ጋደቱዋ፥ 14 ያትራነ አ ሄን ጋደቱዋ፥ ኤሽታሞአነ አ ሄን ጋደቱዋ፥ 15 ሆሎናነ አ ሄን ጋደቱዋ፥ ዳቢራነ አ ሄን ጋደቱዋ፥ 16 አይናነ አ ሄን ጋደቱዋ፥ ዩጻነ አ ሄን ጋደቱዋነ ቤት-ሸመሻነ አ ሄን ጋደቱዋ፥ ኡባና ኡዱፑን ካታማቱዋ ይሁዳ ዛራቱዋፐነ ስሞና ዛራቱዋፐ አኪደ እሜድኖ። 17 ቢንያማ ዛራቱዋፐ ጋባኦናነ አ ሄን ጋደቱዋ፥ ገባአነ አ ሄን ጋደቱዋ፥ 18 አናቶታነ አ ሄን ጋደቱዋነ አልሞናነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 19 አሮና ዛርያ ቄሳቱዋ ካታማቱነ ኡንቱንቱ ሄን ጋደቱ ኡባና ታማነ ሄዛ።

20 አቴዳ ቃሃታ ያራቱ፥ ሌዊያ ዛረ ግድያዋንቱ ኤፍሬማ ዛራቱዋ ካታማቱዋፐ ሻክና አኬድኖ። 21 ኡንቱንቶ ኤፍሬማ ገዝያን ደእያ፥ አሳ ዎዳ አሳይ ባቃት ቢደ አትያ ሰኬማነ አ ሄን ጋደቱዋ፥ ገዜራነ አ ሄን ጋደቱዋ፥ 22 ቅብጻይማነ አ ሄን ጋደቱዋነ ቤት-ሆሮናነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 23 ዳና ዛራቱዋፐ ኤልታቀነ አ ሄን ጋደቱዋ፥ ግባቶናነ አ ሄን ጋደቱዋ፥ 24 አያሎናነ አ ሄን ጋደቱዋነ ጋተ-ርሞናነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 25 ምናሰ ዛራቱዋ ባጋቱዋፐ ታእናካነ አ ሄን ጋደቱዋነ ጋተ-ርሞናነ አ ሄን ጋደቱዋ፥ ኡባና ላኡ ካታማቱዋ አኪደ እሜድኖ። 26 አቴዳ ቃሃታ ያራቱ ካታማቱነ ኡንቱንቱ ሄን ጋደቱ ኡባና ታማ።

27 ምናሰ ዛራቱዋ ባጋቱዋፐ አሳ ዎዳ አሳይ ባቃት ቢደ አትያ፥ ባሳነን ደእያ ጎላና ካታማነ አ ሄን ጋደቱዋነ ባኤሽታራነ አ ሄን ጋደቱዋ፥ ኡባና ላኡ ካታማቱዋ አኪደ፥ ገርሾና ያራ ግድያ ሀራ ሌዋቶ እሜድኖ። 28 ይሳኮራ ዛራቱዋፐ ቅሽዮናነ አ ሄን ጋደቱዋ፥ ዳብራታነ አ ሄን ጋደቱዋ፥ 29 ያርሙታነ አ ሄን ጋደቱዋነ ኤንጋኒማነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 30 አሴራ ዛራቱዋፐ ምሽኣላነ አ ሄን ጋደቱዋ፥ አብዶናነ አ ሄን ጋደቱዋ፥ 31 ሄልቃታነ አ ሄን ጋደቱዋነ ራሆባነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 32 ሄዋዳንካ ንፍታሌማ ዛራቱዋፐ አሳ ዎዳ አሳይ ባቃት ቢደ አትያ ጋሊላን ደእያ ቀዴሻነ አ ሄን ጋደቱዋ፥ ሀሞታነ አ ሄን ጋደቱዋ፥ ዶራነ አ ሄን ጋደቱዋነ ቃርታናነ አ ሄን ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 33 ገርሾና ያራቱ ካታማቱነ ኡንቱንቱ አ ሄን ጋደቱ ኡባና ታማነ ሄዛ።

34,35 አቴዳ ማራራ ያራ ግድያ ሌዋቶ ዛብሎና ዛራቱዋፐ አሳ ዎዳ አሳይ ባቃት ቢደ አትያ ዮቅናኣማነ አ ሄን ጋደቱዋ፥ ቃርታነ አ ሄን ጋደቱዋ፥ ዲምናነ አ ሄን ጋደቱዋነ ናህላላነ አ ሄን ጋደቱዋ፥ ኡባና ኦይዱ ካታማቱዋ አኪደ እሜድኖ። 36 ሮቤላ ዛራቱዋፐ ቤጸራነ አ ሄን ጋደቱዋ፥ ያሃጻነ አ ሄን ጋደቱዋ፥ 37 ቅደሞታነ አ ሄን ጋደቱዋነ መፋኣታነ አ ሄን ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 38 ቃይ ጋደ ዛራቱዋፐ አሳ ዎዳ አሳይ ባቃት ቢደ አትያ፥ ጋላኣደን ደእያ ራሞታነ አ ሄን ጋደቱዋ፥ ማህናይማነ አ ሄን ጋደቱዋ፥ 39 ሀሰቦናነ አ ሄን ጋደቱዋነ ያእዜራነ አ ሄን ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 40 ማራራ ያራ ግድያ ሀራ ሌዋቶ ሻክና ጋኬዳ ካታማቱ ኡባና ታማነ ላአ።

41 እስራኤልያ አሳይ ላቴዳ ጋድያን ደእያ ሌዋቶ ኡባና ኦይታማነ ሆስፑን ካታማቱ ኡንቱንቱ ሄን ጋደቱዋና ደኢኖ። 42 ሄ ካታማቱዋ ኡባ ዩሹዋን ሄን ጋደቱ ደኢኖ።

43 ሄዋዳን ኦደ፥ መና ጎዳይ ኡንቱንቱ አዋቶ እማናዉ ጫቄዳ ጋድያ ኡባ እስራኤልያ አሳዉ እምና ኡንቱንቱ ላቲደ፥ ያን ደኤድኖ። 44 መና ጎዳይ ኡንቱንቱ አዋቶ ጫቄዳዋዳን፥ ኡንቱንቱ ኡባ ባጋናካ ሸምፕሴዳ። መና ጎዳይ ኡንቱንቱ ሞርከቱዋ ኡባ ኡንቱንቶ አ እሜዳ ድራዉ፥ ኡንቱንቱ ሞርከቱዋፐ እቱነ ኡንቱንቱና ኤቀታናዉ ዳንዳይቤና። 45 መና ጎዳይ እስራኤልያ አሳዉ እማና ጌዳ ሎኦ ቃላ ኡባ ፖሌዳፐ አትን እቱነ ሳኣን አትቤና።