ዶላሃፐ ዬዳ ያራቱ ባረንቱ ሳኣ ስሙሳ
(22:1-34)
1 ሄዋፐ ጉይያን ኢያሱ ሮቤላ ዘረ፥ ጋደ ዛራቱዋነ ምናሰ ዛራቱዋፐ ባጋቱዋ ጼጊደ: 2 "መና ጎዳ ቆማይ ሙሴ ህንተንታ አዛዜዳ ኡባ ፖሌድታ፤ ቃይ ታዉካ ኡባባን አዛዘቴድታ።22:2 ፓይ. 32:20-32፤ ኢያሳ 1:12-15 3 ዳሮ ዎድያፐ ሀቼ ጋካናዉ፥ ህንተንቱ ህንተንቱ እሻቱዋ ባሽበይክታ፤ መና ጎዳይ ህንተንቱ ጾሳይ ህንተዉ እሜዳ ሀዳራ ፖሌድታ። 4 ስም መና ጎዳይ ህንተንቱ ጾሳይ ኡንቱንቶ ጌዳ ቃላዳን፥ ህንተንቱ እሻቱዋ ሸምፕሴዳ። ሄዋ ድራዉ፥ መና ጎዳ ቆማይ ሙሴ ህንተንቶ ዮርዳኖሳ ሻፋፐ ሄፍን ባጋና እሜዳ ላታ ጋድያን ደእያ ህንተንቱ ሶ ሶ ስምተ። 5 መና ጎዳ ቆማይ ሙሴ ህንተንታ አዛዜዳ አዛዙዋነ ዎጋ ሎይ ናግተ። መና ጎዳ ህንተንቱ ጾሳ ሲቅተ፤ አ ኦግያ ኡባን ሀመትተ፤ አ አዛዙዋ አዛዘትተ፤ አናና ምን ኦይቀትተ፤ ህንተንቱ ኩመን ዎዛናፐነ ኩመን ሸምፑዋፐ አዉ ኦተ" ያጌዳ።
6-8 ኢያሱ ኡንቱንታ አንጅ የዲደ፤ "በእተ፥ ህንተንቱ ሀእ ዳሮ መህያ፥ ብራ፥ ዎርቃ፥ ናሃስያ፥ ብራታነ ዳሮ ማዩዋ አኪደ ዱረቲደ፥ ህንተንቱ ጋድያ ስማና ሀኒታ። ሄዋ ድራዉ ህንተንቱ ሞርከቱዋፐ ኦሞዴዳዋ፥ ህንተንቱ እሻቱዋና ግሽ አክተ" ያጌዳ። ሄዋፐ ጉይያን ኡንቱንቱ ባረንቱ ሶ ሶ ቤድኖ።
ሙሴ ምናሰ ዛራቱዋፐ ባጋቶ ባሳነን ጋድያ እም ዎዳ፤ ሽን አቴዳ ምናሰ ዛራቱዋ ባጋቶ ኢያሱ ዮርዳኖሳ ሻፋፐ አዋይ ዉልያ ባጋን ሀራ ዛራቱዋና እትፐ ላትያ ቢታ እሜዳ።
9 ሮቤላ ዛራቱ፥ ጋደ ዛራቱነ ምናሰ ዛራቱዋ ባጋቱ ባረንቱ ላታ ጋድያ ስሚደ ቤድኖ። ጾሳይ ሙሴ ባጋና አዛዝና ላቴዳ ጋላኣደ ጋድያ ባናዉ፥ ካናነ ጋድያን ሴሎን ደእያ እስራኤልያ አሳፐ ሻከቴድኖ።
ዮርዳኖሳ ሻፋ ማታን ግምቤዳ ያርሹዋ ሳኣ
10 ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ዮርዳኖሳ ሻፋ ማታን ካናነ ጋድያን ደእያ ጋልሎታ ዬዳ ዎደ፥ ሻፋ ማታን ያርሹዋ ያርሽያ ዎልቃማ ሳኣ 11 ግምቢና፥ "ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ዮርዳኖሳ ማታን፥ ጋልሎታን፥ ካናነ ዛዋን፥ እስራኤላቱ ባጋና ያርሹዋ ሳኣ ግምቤድኖ" ግያዋ እስራኤላቱ ስሴድኖ። 12 ኩመን እስራኤልያ አሳ ያአይ ኡንቱንቱ ኦላናዉ ባናዉ ሴሎ ግያ ሳን እትፐ ሺቄዳ።
13 እስራኤልያ አሳይ ቄስያ ኤልኣዛራ ናኣ ፒንሃሳ፥ ጋላኣደ ጋድያን ደእያ ሮቤላ ዛራቱዋኮ፥ ጋደ ዛራቱዋኮነ ምናሰ ዛራቱዋፐ ባጋቱዋኮ ኪቴዳ። 14 እት እት ዛሪ ባረ ያራቱ ካፓቱዋፐ እት እት አሳ ዶሪደ፥ ታሙ አሳ ፒንሃሳና የዴዳ።
15 ኡንቱንቱ ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ደእያ ጋላኣደ ጋድያ ቢደ ኡንቱንታ፥ 16 "መና ጎዳ አሳይ ኩመን ያአይ ህንተንታ ሀዋዳን ያጌ፤ ‘እስራኤልያ ጾሳ ቦላ አያዉ ሀዋ ማላ ኢታባ ኦድቴ? ዋኒደ ጎፐ፥ ህንተንቱ ሀራ ያርሹዋ ሳኣ ህንተንቶ ግምቢደ፥ መና ጎዳ ቦላ ማካሌድታ! አ ካልያዋካ አጌዲታ!22:16 ዛረ. 12:13-14 17 ፓኦራን ኑን ኦዳ ናጋራይ ኑዉ ግደኔ? እስራኤልያ ሽቁዋ ቦላ ቦሻይ ዎዳዋ ግዶፐነ፥ ሀቼ ጋካናዉካ ኑን ሄ ናጋራፐ ጌይቦኮ።22:17 ፓይ. 25:1-9 18 መና ጎዳ ካልያዋፐ ሀችካ ዎራ ስማነየ?
" ‘ህንተ ሀቼ መና ጎዳ ቦላ ማካሎፐ፥ መና ጎዳይ ዎንት ኩመን እስራኤልያ ሽቁዋ ሀንቀታናዋ። 19 ህንተንቱ ደእያ ጋዲ ቱኔዳዋ ግዶፐ፥ መና ጎዳ ዱንካኒ ኤቄዳ ጋድያ ሃ ዪደ፥ ኑናና ጋድያ ሻክተ። ሽን ካሰፐ ደእያ መና ጎዳ ኑ ጾሳ ያርሹዋ ሳአፐ ሀራ ያርሹዋ ሳኣ ግምቢደ፥ መና ጎዳ ቦላ ማካሎፕተ፤ ዎይ ኑናካ ማካላንቻ ከሶፕተ። 20 ዛራሀ ዛረ አካን ናጋራ ግዶዋፐ አኪደ፥ ናጋራ ኦዳ ድራዉ፥ ኩመን እስራኤልያ ሽቁዋ ቦላ ጾሳ ሀንቁ ዎቤኔ? ባረ ናጋራ ጋሱዋን ሀይቄዳዌ አ ጻላላ ግደና’ ያጌ" ያጌድኖ።22:20 ኢያሳ 7:1-26
21 ሄዋፐ ጉየ ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ እስራኤልያ ያራቱ ካፓቶ ሀዋዳን ያጊደ ዛሬድኖ፤ 22 "ዎልቃማይ መና ጎዳ ጾሳ! ዎልቃማይ መና ጎዳ ጾሳ! ኑን ሀዋ አያዉ ኦደንቶ እ ኤሬዳ! ኑን አያዉ ኦደንቶ ህንተንቱካ ኤራናዳን ኮዬቶ። ኑን መና ጎዳ ቦላን ማካሌዳዋነ አዛዘተናን እጼዳዋ ግዶፐ፥ ሀቼ ኑና ፓጻ ዎፕተ። 23 ኑን መና ጎዳ ካልያዋ አጊደ፥ ጹግያ ያርሹዋ፥ ካ ያርሹዋነ እትፐተ ያርሹዋ ያርሻናዉነ ያርሽያ ሳኣ ግምቤዳዋ ግዶፐ፥ መና ጎዳይ ኑና ሄ ኦሶ ኦቾ። 24 ኑን ሄዎ ግምቢቦኮ፤ ኑን ያርሹዋ ሳኣ ግምቤዳዌ፥ ስንፐ ያና ላይን ህንተንቱ ናናይ ኑ ናና፥ ‘ህንተና መና ጎዳን እስራኤልያ ጾሳን አዬ ጋያዌ? 25 ህንተንቶ፥ ሮቤላነ ጋደ ዛረቶ፥ መና ጎዳይ ኑ ግዶንነ ህንተንቱ ግዶን ዮርዳኖሳ ሻፋ ዛዋዬዳ። መና ጎዳን ህንተንታ ጋያዌ ባዋ’ ያጋነንቶነ ጊደ ህርጌዳ ድራሳ። ሄዋዳን ኦደ፥ ህንተንቱ ዛራቱ ኑ ዘረ መና ጎዳዉ ጎይነናዳን ተኤናን አግክኖ።
26 "ሄዋ ድራዉ ኑን ኑ ግዶን ያርሹዋ ሳኣ አነ ግምቦይተ ገዳ፤ ሽን ጹግያ ያርሹዋ ሳኣ ዎይ ሀራ ያርሹዋ ሳኣ ግደና። 27 ኑን ያርሹዋ ሳኣ ግምቤዳዌ ጹግያ ያርሹዋ፥ እትፐተ ያርሹዋነ ሀራ ያርሹዋ ያርሺደ፥ መና ጎዳዉ አ ዱንካንያን ጎይናና ማላ፥ ሀዌ ኑ ግዱዋንነ ህንተንቱ ግዱዋን፥ ቃይ ኑ ካልያ የለታ ግዱዋን ማርካ ግዳናሳ። ዎደፐ ህንተንቱ ዛራቱ ኑ ዘረ፥ ‘ህንተና መና ጎዳን ጋያዌ አያይነ ባዋ’ ጋናዉ ዳንዳይክኖ። 28 ኡንቱንቱ ጌላዳን ኑና ዎይ ኑ የለታ ዎድያፐ ሄዋዳን ጎፐ፥ ኑን ኡንቱንቶ ዛሪደ፥ ‘ጾሳዉ ያርሽያ ሳኣ ሌምሱዋ ሀዋ በእተ። ሀዋ ኑ አዎቱ ጹግያ ያርሹዋነ ሀራ ያርሹዋ ያርሻናሳ ግደናን፥ ህንተፐነ ኑፐነ ግዱዋን ማርካ ግዳና ማላ ግምቤድኖ’ ያጋና። 29 መና ጎዳ ቦላ ማካላናዌ ኑፐ ሃኮ! መና ጎዳ ኑ ጾሳ ዱንካንያ ስንን ኤቄዳ ያርሹዋ ሳፐ ሀራ፥ ጹግያ ያርሹዋ፥ ካ ያርሹዋነ ሀራ ያርሹዋ ያርሽያ ሳኣ ግምቢደ፥ ሀቼ ዎራ ስምበይኮ" ያጊደ ዛሬድኖ።
30 ቄስያ ፒንሃስነ አናና ደእያ እስራኤልያ ያራቱ ካፓቱ፥ ሮቤላ፥ ጋዳነ ምናሰ ዛራቱ ኦዴዳዋ ስሲደ፥ ሎይ ናሸቴድኖ። 31 ቄስያ ኤልኣዛራ ናአይ ፒንሃስ ሮቤላ፥ ጋዳነ ምናሰ ዛረቶ፥ "መና ጎዳይ ኑ ግዶን ደእያዋ ኑን ሀቼ ኤሬዶ፤ አያዉ ጎፐ፥ ሀ የዉዋ ህንተንቱ መና ጎዳ ቦላ ማካላናዉ ኦበይክታ። ህንተንቱ ሀእ መና ጎዳ ሙራፐ እስራኤልያ አሳ አሼድታ" ያጌዳ።
32 ሄዋፐ ጉይያን ቄስያ ኤልኣዛራ ናአይ ፒንሃስነ ካፓቱ ጋላኣደን ደእያ ሮቤላነ ጋደ ዛራቱዋ ማታፐ ካናነን ደእያ እስራኤልያ አሳኮ ስሚደ ሀኔዳባ ኡንቱንቶ ኦዴድኖ። 33 እስራኤልያ አሳይ ናሸቻን፥ ጾሳ ጋላቴድኖ። ቃይ ሮቤላ አሳቱነ ጋደ አሳቱ ደእያ ጋድያ ኦለቲደ ባይዛናዉ ባናዉ ሃሳይያዋካ አጌድኖ።
34 ሮቤላነ ጋደ ዛራቱ፥ "ሀ ያርሹዋ ሳአይ ጾሳ ጻላላይ ጾሳ ግድያዎ ኑ ኡባፐ ግዱዋን ማርካ ግዳናዋ" ያጌድኖ፤ ሄ ያርሹዋ ሳኣ ማርካ ሱንድኖ።