Juízes 3

ኤሁዳ

12 እስራኤልያ አሳይ ዛረደካ መና ጎዳ ስንን ኢታባ ኦዳ። መና ጎዳ ስንን ኡንቱንቱ ኢታባ ኦዳ ድራዉ፥ መና ጎዳይ ሞኣበ ካትያ ኤግሎን እስራኤልያ ቦላን ዎልቃማናዳን ኦዳ። 13 ኤግሎን አሞናቱዋነ አማሌቃቱዋ ባረኮ ሺሽ ቢደ፥ እስራኤልያ አሳ ኦለቲደ ጾኔዳ፤ ዛምባ ካታማ ጌተትያ እያርኮ ካታማ ኦይቄዳ። 14 ያትና፥ እስራኤልያ አሳይ ሞኣበ ካትያ ኤግሎናዉ ታማነ ሆስፑን ላይ ሞደቴዳ።

15 ሽን እስራኤልያ አሳይ መና ጎዳዉ ዋሴዳ ዎደ፥ ኡንቱንታ አሽያ ኡራ ኪቴዳ፤ እካ ቢንያማ ዛርያፐ ጌራ ናኣ ኤሁዳ ጌተቴ፤ እ ሀድርሳ ኩሽያን ኦያ አሳ። እስራኤልያ አሳይ ኤሁዳ ሞኣበ ካትያ ኤግሎናኮ ጊራና ኪቴዳ። 16 ኤሁድ ላኡ ባጋና ቃራቴዳ እት ዋ ግዴዳ ማሻ ባረዉ ጊግሴዳ፤ ኡሸቻ ምይያ ባጋና ባረ ማዩዋ ግዶን ዳንጬዳ። 17 ሄዋፐ ጉይያን፥ ሞኣበ ካትያ ኤግሎናዉ ጊራ አክ አፊደ እሜዳ። ኤግሎን ሎይ ኦርዶ አሳ። 18 ኤሁድ ጊራ ካትያዉ እሜዳዋፐ ጉይያን፥ ጊራ ቶኪደ ቤዳ አሳቱዋ ሞይዜዳ። 19 ሽን ኤሁድ ገልጋላ ማታን ደእያ ማሰቴዳ ሹቻቱዋ ማታፐ ኤግሎናኮ ጉየ ስም ቢደ፥ "ካትያዉ፥ ታን ነዉ ጹርያባይ ደኤ" ያጌዳ።

ካቲ፥ "ጮኡ ጋ!" ያጌዳ፤ ሄዋፐ ጉይያን አ ናግያዋንቱ ኡባይ ካረ ከሴድኖ።

20 ሄ ዎደ ካቲ ፖቅያን ደእያ እት ክፍልያን ባረካ ኡት ደእሽን፥ ኤሁድ አኮ ሺቂደ፥ "ጾሳይ ነዉ ኪቴዳባይ ደኤ" ያጌዳ። ካቲ ባረ ኡቴዳ ሳኣፐ ኤቄዳ፤ 21 ኤሁድ ባረ ሀድርሳ ኩሽያ የዲደ፥ ኡሸቻ ባጋ ምይያፐ ማሻ ሾዲደ፥ ካትያዉ ኡሉዋን ድርግን አጌዳ። 22 ያትና፥ ማሻዉ ቱቲ አተናን ኡሎ ግዶ ገልና፥ ሀንዳይ ካሜዳ። ኤሁድ ማሻ ካትያ ኡሉዋፐ ሾድቤና ድራዉ፥ ዞክያና ካን ከሴዳ። 23 ሄዋፐ ጉይያን ኤሁድ ካረ ከሲደ፥ ፖቅያን ደእያ ክፍልያ ፐንግያ ጎርዲደ፥ አ ቦላ ቁልፔዳ።

24 እ ብድጎዋፐ ጉይያን፥ ቆማቱ ዪደ፥ ፐንጊ ጎርደቴዳዋ በኤድኖ፤ ግዶ ክፍልያን ኡርቃ ሼሻዉ ኡተናን አገና ያጊደ ቆፔድኖ። 25 ኡንቱንቱ ናጉ ፖካና ጋካናዉ ሎይ ናጌድኖ። ሽን ካቲ ፐንግያ ዶየናን እጽና፥ ቁልፕያ አኪደ ፐንግያ ዶዬድኖ፤ ባረንቱ ጎዳይ ሀይቂደ፥ ዉይግያን ኩንዴዳዋ በኤድኖ።

26 ኡንቱንቱ ናጊደ ጋምእ ደእሽን፥ ኤሁድ ከስ አኪደ፥ ማሰቴዳ ሹቻቱዋ አደ፥ ሳኢራ ግያ ሳኣ ባቃቴዳ። 27 ኤፍሬማ ገዝያ ጋኬዳ ዎደ፥ እስራኤልያ አሳይ ኦላዉ ሺቃናዳን ማላካታ ፑኔዳ፤ አሳይ አ ካሊደ፥ ያፐ ዱገ ዎዳ። 28 ኡንቱንታ፥ "ታና ካልተ፤ አያዉ ጎፐ፥ መና ጎዳይ ህንተንቱ ሞርከቱዋ፥ ሞኣባቱዋ ህንተንቱ ኩሽያን አደ እሜዳ" ያጌዳ። አ ካሊደ ዎደ፥ ዮርዳኖሳ ሻፋ ፕንያ ሳአቱዋ ኦይቄድኖ፤ ሞኣበ አሳፐ እት ኡራይነ ሄዋና አናዳን ተኤድኖ። 29 ሄ ዎደ ሞኣበ አሳፐ ታሙ ሻአ ግድያ ዶረቴዳ ምኖ ኦላንቻቱዋ ዎድኖ፤ እት አሳይነ ከስ አክ አትቤና። 30 ሄ ጋላስ ሞኣበ አሳይ እስራኤልያ አሳዉ ሞደቴዳ፤ ያትና ቢታይ ሆስፑን ታሙ ላይ ዎፓ ደሜዳ።