1 Amoos’a na’aa Isiyaasaw S’oossay Baabloonewaa k’onc’c’issina be’eeddawe hawaa.✝13:1—14:23 Isa. 47:1-15; Erm. 50:1—51:64

2 Mela deriyaa bolla banddiraa essite; hintte k’aalaa d’ok’k’u ootsiide, unttunttoo waassite; unttunttu kaappatuwaa penggiyaanna gelana mala, wuttite. 3 Taani hank’k’etteeddawantta murana mala, ta geeshshatuwaa azazaad; taani s’ooniyaawaan nashetiyaa ta wolk’k’aama tooranchchatuwaakka s’eesaad.

4 C’ora Asay c’abbottiyaawaadan, deriyaa huup’iyaan c’abbottiyaa walassaa sisite! K’ay kawutetsatuu ittippe shiik’iide shabbirettiyaa walassaa sisite! Ubbaappe Wolk’k’aama Med’inaa Goday tooranchchatuwaa olaw salppissee. 5 Med’inaa Godaynne I bare hank’k’uwaa polissanaw go’ettiyaa miishshatuu biittaa ubbaa d’ayissanaw, haako gadiyaappe, salotuwaa gas’aappe yiino.

6 Med’inaa Godaa gallassay mateedda diraw yeekkite! He gallassay Ubbaappe Wolk’k’aama S’oossaa mataappe bashshaadan yaana.✝13:6 Iyu. 1:15 7 Hewaa diraw, kushiyaa ubbay hilssi gaana; asaa ubbaa wozanaykka siilana. 8 Unttunttu dagammana; oytsaynne yeellay unttuntta oyk’k’ana. Yeluu oyk’k’eedda mishirattiidan, unttunttu oyk’etana. Unttunttu dagammiide, ittuu ittuwaa s’eelana; unttunttu som"iikka dagamaan boos’s’ana. 9 Be’ite; mek’etsaa iisiide, yiluwaaninne suulo hank’k’uwaan gadiyaa mela kessanawunne aan de’iyaa nagaranchchatuwaa d’ayissanaw, Med’inaa Godaa gallassay yee. 10 Saluwaa s’oolinttetuunne s’oolinttetuwaa c’itatuu barenttu poo’uwaa immennan is’s’ana; awa ayfii doliide d’umana; aginayikka poo’ennan aggana.✝13:10 Hiz. 32:7; Mat. 24:29; Mar. 13:24-25; Luk'. 21:25; Sas'. 6:12-13

11 S’oossay hawaadan yaagee, «Taani ha sa’aa Aa iitatetsaa diraw, iitatuwaakka unttunttu nagaraa diraw murana. Taani otoranchchatoo otoruwaa diggana; mek’etsaa iitatuwaa otoruwaakka kawushshana. 12 Atteeda Asay al"o work’k’aappe aad’d’iide al"ana; Ofiira work’k’aappekka aad’d’iide al"ana. 13 Hewaa diraw, Ubbaappe Wolk’k’aama Med’inaa Godaa hank’k’uwaan, Aa hank’k’uwaa suuluwaa gallassi taani salotuwaa kokkorssana; sa’aykka bare de’iyaasaappe kaas’s’ana» yaagee.

14 Shankkaappe bak’atiyaa gaaraadan, woy heemmiyaa Asay bayinna dorssaa wudiyaadan, Asay ubbay bare asaakko asaakko simmana; ubbaykka bare biittaa bak’atana. 15 Beetteeddawe ooninne c’adettana; oyk’k’etteeddawe ooninne mashshaan hayk’k’ana. 16 Unttunttu guutsaa naanay unttunttu sintsan busakettana; unttunttu golletuukka bonk’k’ettanawaa; unttunttu mac’c’a asatuwaannakka wolk’k’an hara attuma asatuu gakettana.

17 Be’ite, biraa koyenna, work’k’aankka nashettena Meedoona gadiyaa asatuwaa taani unttunttu bollan dentsana. 18 Unttunttu wonddaafetuu wodallatuwaa wod’iino; guutsa naanatuwaakka yeddi maarikkino; unttunttu ayfii purgga"iyaa naanatookka k’arettenna. 19 Kawutetsatoo bonchchuwaa, k’ay Baabloone asawukka alleek’k’onne aw gideedda Baabloone gadiyaa S’oossay Sodoomadaaninne Gamooradan aatsi yeggana.✝13:19 Dom. 19:24 20 He gadiyaan mulekka Asay uttenna; woy yeletaappe yeletaa gakkanawukka yan Asay de’enna; Araba asaykka yan bare dunkkaaniyaa tolenna; dorssaa wudiyaa heemmiyaawanttukka yan barenttu wudiyaa allas’s’issiino. 21 Shin yan bazzuwaa do’atuu allas’s’ana. Worakanatuu unttunttu golliyaa kumana; gutattuu hewan de’ana; bazzuwaa deeshshatuu hewan guppana.✝13:21 Isa. 34:14; Sof. 2:14; Sas'. 18:2 22 Unttunttu golletuwaan babark’k’ii waassana; unttunttu bonchcho kaatiyaa golletuwaankka worakanay boc’c’anna. Aa wodii matatteedda; gallassaykka gam"enna.