1 Kaatii Ooziyaane hayk’k’eedda laytsi Goday bollaninne d’ok’k’a araatan utteeddawaa be’aad; Aa mayuu Geeshsha Golliyaa kumeedda.✝ 2 Suraafeela geetettiyaa kiitanchchatuu aappe bollaanna de’iino; itti itti suraafeeliyaw usuppun k’efetuu de’iino; laa"u k’efetuwaan bare som"uwaa kammee; laa"u k’efetuwaan bare gediyaa kammee; laa"u k’efetuwaan paallee. 3 Ittuu ittuwaanna, «Geeshshay, geeshshay, geeshshay Ubbaappe Wolk’k’aama Med’inaa Godaa! Sa’aa ubbay Aa bonchchuwaan kumeedda» yaagiide s’eesetteeddino.✝ 4 Unttunttu s’eessaa kooshshaan Geeshsha Golliyaa baasuu k’aas’s’eedda; k’ay Geeshsha Gollii c’uwaan kumeedda.✝

5 Yaatina, taani, «Taw aayye ana! Taani bayaad; ayaw gooppe, taani doonay tuneedda asaa; k’ay doonay tuneedda asatuwaa giddon de’ay; taani Kaatiyaa, Ubbaappe Wolk’k’aama Med’inaa Godaa ta ayifiyaan be’aad» yaagaad.

6 Suraafeelatuwaappe ittuu yarshshiyaa sa’aappe k’ap’eedda tamaa bonk’k’uwaa akkiide paalliidde, taakko yeedda. 7 Tamaa bonk’k’uwaan ta doonaa bochchiide, «Be’a; ha tamaa bonk’k’uu ne doonaa bochcheedda; Ne bayzzuu neeppe kichcheedda; ne nagaraykka atto geetetteedda» yaageedda.

8 Hewaappe guyyiyaan Goday, «Oona kiittoo? Nuw oonee baanawe?» yaagishin sisaad. Hewekka, «Hekko, taana kiitta» yaagaad.

9 Goday hawaadan yaageedda; «Ba; ha asaw, ‹Hintte sissaa sisiita; shin hinttenttoo gelenna; s’eeluwaakka s’eelliita; shin be’ikkita› yaagaade oda.✝ 10 Ha asaa wozanaa donc’c’illissa; unttunttu haytsaakka tullissa; unttunttu ayfiyaakka k’ook’issa; hewe d’ayooppe, unttunttu barenttu ayifiyaan be’ana; barenttu haytsaan sisana; barenttu wozanaankka akeekana; yaatiide unttunttu taakko simmananne pas’ana» yaageedda.

11 Yaatina, taani, «Abeet Godaw! Hawe ayide gakkanaasee?» yaagaad.

I zaaretsiide, «Katamatuu de’iyaa asaa d’ayiide, kolettana gakkanaasa, golletuukka onana gakkanawunne biittaykka ubbaanna mela gidana gakkanaasa. 12 Taani Med’inaa Goday asaa haassana; biittaakka mela kessana. 13 Tammu asaappe itti Asay gadiyaa bolla attooppe, ikka d’ayana; k’ans’s’i diggina atteeda wolaa durumaa mala gidanawaa; he durumay geeshsha zeretsaa gidanawaa» yaageedda.