1 Oba von de Tieden un Stunden, Breeda, hab jie nich needich, daut ekj junt schriew. 2 Wiels jie selfst weeten jeneiw, daut däm Harn sien Dach soo kjemt aus een Deef enne Nacht. 3 Wiels wan see woaren sajen: Fräd un Sechaheit! Dan kjemt een plazeljet Vedoawen äwa äant, jrod soo aus de Jeburts-Weedoag äwa eene schwangre Fru; un see woaren nich utkleiwen. 4 Oba jie, Breeda, sent nich en Diestanis, daut junt de Dach aus een Deef jript. 5 Wiels jie aula sent Kjinja vom Licht un Kjinja vom Dach. Wie sent nich von de Nacht, uk nich von de Diestanis.