Marcos 11

Jesus kjemt no Jerusalem

1 Un aus see noda no Jerusalem kjeemen, jäajen Betfage un Betanien aun dän Oliewen-Boajch, schekjt Hee twee von siene Jinja 2 un säd to äant: Got en daut Darp, daut ver junt licht; un fuaz, wan jie doa nenkomen, woa jie een Falm aunjebungen finjen, wua noch kjeen Mensch bowen jesäten haft; leest daut loos un brinjt daut häa! 3 Un wan irjentwäa to junt sajcht: Wuarom doo jie daut? Dan sajcht: De Har brukt daut; dan woat hee daut fuaz häaschekjen. 4 Un see jinjen han un fungen daut Falm aunjebungen, ver de Däa, buten wua de Wajch sikj deelt, un leesden daut loos. 5 Un atelje von dee, dee doa stunden, säden to äant: Waut doo jie, daut jie daut Falm loosleesen? 6 See oba säden äant, waut Jesus äant befolen haud, un dee leeten äant daut. 7 Un see brochten daut Falm no Jesus un läden äare Kjleeda doanopp, un Hee sad sikj doabowen dol. 8 Un väle spreeden äare Kjleeda opp dän Wajch, aundre hakten Asta von de Beem un spreeden dee opp dän Wajch. 9 Un dee doa veropp jinjen un dee doa nofoljden, schrieejen un säden: Hosiana! Jesäajent es dee, dee em Nomen vom Harn kjemt! 10 Jesäajent es daut Rikj von onsem Voda David, waut kjemt em Nomen vom Harn! Hosiana em Hechsten!

11 Un Jesus jinkj en Jerusalem nenn un en dän Tempel, un aus Hee sikj runtom aules bekjikjt haud, jinkj Hee, aus de Stund aul lot wia, met de Twalw rut no Betanien.