1 परमेश्वर येशू ख्रीष्टहे उ बहुत्ते गोप्य बात देखैलिन जोन झत्तेहेँ हुइहीँ, ताकि ऊ अपन सेबकहुँक्रिहिन्हे यी बात देखाई सेकिँत। ओकर पाछे येशू अपन सेबक यूहन्नाहे यी बात देखाइक लग अपन स्वर्गदूतहे पठैलाँ।

2 यूहन्ना अपन देख्लक सक्कु बात लिखल, अथवा परमेश्वरके थेनसे अइलक सन्देश और येशू ख्रीष्टके कलक सक्कु बात।

3 यी भविष्यवाणी दोसुर जहनके लग पह्रुइया सक्कु जहनहे परमेश्वर आशिष दिहीँ। और ऊ हरेक मनैनहे आशिष दिहीँ, जेने यिहिहे सुन्थाँ और यकर पालन करथाँ। काकरेकी यी बात झत्तेहेँ हुइहीँ।

4 यी चिट्ठी मै यूहन्ना, एशिया प्रान्तमे रहल सातथो मण्डलीक तुहुरे विश्वासीनहे लिखतुँ। मै प्राथना करतुँ कि तुहुरे परमेश्वरके सातथो आत्मनसे* अनुग्रह और शान्ति भेटाई सेको। ऊ वहे परमेश्वर हुइँत जे समयक सुरुवातसे लेके अबसम और सदामानके लग नै बदल्थाँ।

5 येशू ख्रीष्ट हम्रिहिन्हे माया करथाँ, और ऊ हम्रिहिन्हे बँचैथाँ। ऊ अपन खुनसे हम्रिहिन्हे हमार पापमेसे बँचैथाँ। 6 ऊ हम्रिहिन्हे एकथो असिन जाति बनैलाँ जेनके संग परमेश्वर ओइन्के रज्वक रुपमे बताँ। और ऊ हम्रिहिन्हे हुँकार बाबा परमेश्वरके लग पुजारी बनैलाँ। येशू ख्रीष्टहे महिमा और शक्ति हरदम और हर समय मिल्ती रहिन। आमेन! (यकर मतलब हुइत, अस्तेहेँ होए।)

7 ध्यान देके सुनो, ख्रीष्ट बद्रिक संग आइक लग बताँ; और सक्कु मनै हुँकिन्हे देख्हीँ, हुँकिन्हे बर्छालेके गोझके मरुइयन फेन हुँकिन्हे फेनदोस्रे आइत देख्हीँ। और पृथ्वीमे रहल सक्कु मनै जोर-जोरसे रुइहीँ, जब ओइने हुँकिन्हे देख्हीँ। हाँ, अस्तेहेँ हुई। आमेन।

8 परमप्रभु परमेश्वर कहतताँ, "सक्कु चिजके सुरुवात करुइया महिँ हुइतुँ, और मै वहे हुइतुँ जे सक्कु चिजके अन्त्य कराई। मै वहे परमेश्वर हुइतुँ जे समयक सुरुवातसे लेके अबसम बतुँ, और जे सदामानके लग नै बदल्थुँ, और जे आब आइक लग बतुँ, मै सर्वशक्तिमान परमेश्वर हुइतुँ।"

9 मै यूहन्ना, तुहुरिन्के विश्वासी संघरिया, हम्रे सक्कु जाने येशू ख्रीष्टके राज्यक नागरिक हुइती। और हम्रे सक्कु जाने दुःखकष्ट सहथी, और हम्रिहिन्हे येशूक लग धीरजतासे सहे परना बा। रोमी अगुवनके कारण एकथो कैदिक रुपमे मै पत्मोस* कना टापुमे पठागिनु। काकरेकी मै परमेश्वरके वचन प्रचार करल रहुँ, और येशूक बारेमे गवाही देले रहुँ।

10 येशूक मुके फेनदोस्रे जिउठ्लक दिन पवित्र आत्मा मोरिक उप्पर आइल। और मै तुरहीक आवाज हस एकथो जोरसे आवाज सुन्नु, जोन आवाज मोरिक पाछेसे असिके कहतेहे।

11 "तुँ ज्या देखतो, उ एकथो कागजमे लिखो। और यिहिहे उ सातथो मण्डलीमे पठाऊ, जोन मण्डली यहे शहरमे बताँ। एफिसस शहर, स्मुर्ना शहर, पर्गामम शहर, थिआटिरा शहर, सार्डिस शहर, फिलाडेल्फिया शहर और लाउडिकिया शहर।"

12 महिन्से के बत्वाइता कहिके हेरक लग मै पाछे घुम्नु ते मै दिया धारल सातथो सोनक दिउँत देख्नु।

13 और उ दिउँतके बिच्चेम जे मनैयक छावक हस देखाइतेहे, ऊ झोहर लुग्गा घल्ले रहे, जोन लुग्गा ओकर गोरासम पुगल रहिस। ऊ अपन छातीमे सोनक पटका बाँधल रहे।

14 हुँकार कपारिक भुट्ला उज्जर रुवा हस अथवा हिउँ हस उज्जर रहिन; और हुँकार आँखी आगिक मोँजा हस रहिन।

15 हुँकार गोरा आगिक भट्ठीमे धिकैती रहल काँस हस चम्कतिहिन। जब ऊ बोल्लाँ ते हुँकार आवाज बरवार झरनक आवाज हस सुनजाइतिहिन।

16 ऊ अपन दाहिन हाँथेम सातथो तोरैयाँ लेले रहिँत। और हुँकार मुहेँमेसे दुनु ओहोँर चोखुर रहल तरवाल निक्रल रहिन। हुँकार अनुहार दुपहरके दिन हस चम्कतिहिन।

17 जब मै हुँकिन्हे देख्नु, तब मै तुरुन्ते हुँकार गोरामे गिरगिनु। मै एकथो मुअल मनैया हस होगिनु। पर ऊ अपन दाहिन हाँथ मोरिक उप्पर धारके असिके कलाँ, "ना डराऊ, सक्कु चिजके सुरुवात करुइया महिँ हुइतुँ। और मै वहे हुइतुँ, जे सक्कु चिजके अन्त्य कराई।

18 और मै वहे हुइतुँ, जे जीवन देहत। मै एकचो मुगिल रहुँ। पर आब मै जित्ती बतुँ, और मै सदादिनके लग जित्ती पलिरहम! और मोरिक थेन मृत्युक उप्पर अधिकार बा। और मोरिक थेन उ चाभी बा, जे महिन्हे उ ठाउँहे खोल्ना शक्ति देहत, जहाँ मुअल मनै बताँ। और ओइन्हे फेनदोस्रे जित्ती करैना फेन शक्ति देहत।

19 तुँ अब्बे ज्या देखतो, और उ बात फेन लिखो जोन बात भविष्यमे पक्कै हुई।

20 आब मै सातथो सोनक दियक मतलब का हो और मोरिक दाहिन हाँथेमनिक सातथो तोरैयँनके मतलब का हो कहिके बतैम, जोन बात पहिले किहुहे फेन पता नै रहिन। यकर मतलब हो: सातथो दिउँतमे रहल दिया सातथो मण्डली हुइँत, और उ सातथो तोरैयाँ वहे सातथो मण्डलीक स्वर्गदूत हुइँत।"