1 Mu ɔshɔshi uwu Atiyɔki, Anukenzu mbala wa zɔ enzu iso iyi Ɔzhizɔsi o yi mɔmɔ: O ya mba te, Obanaba, Ɔsamɔ uwu o ya wu Onazha, Ɔlushiyɔ uwu Osarini, Ɔmaniyɛ (uwu bɔkɔ o yi wu mba ɔsu Ɛrɔdu) mbala Ɔsɔlu. 2 Tabɔkɔ o yi mu Ukpo ilɛma mbala kenyo irima, akwɛyi Kwundu uwu Ukpo a za mba te, <<La lu ŋa Ɔsɔlu mbala Obanaba kaa lo wo ɛduma iyi bɔkɔ mi ya mba te wo.>> 3 Tabɔkɔ o mbwa kenyo irima mbala Ukpo ilɛma, o fulo mbo ewo mu reshi akwɛyi o za mba te lo sheyimo.

4 Mizhikembo iyi Kwundu uwu Ukpo a lɔ Obanaba mbala Ɔsɔlu kaa lo tanu iyi Ɔzhizɔsi, wepepo mbo o to ɔgwuzɛ o ka mu Ɔsɛlusiya akwɛyi o wɔ mɔmɔ o zɛ mu kwoda ungwembyi o ka mu Ɔsapurɔ. 5 kwuyengwu bɔkɔ o bo mu Osalamisi, o tanu iyi iso Ukpo mu idaba iyi Azhu. Ɔzhɔnu ba e yi mbala mba e ye mbo mu imbwama.

6 O fulama mu kutashi kwɔngu lɛɛbi nzhii ba o bo mu Ɔpafɔsi. O du onzu uwu Azhu uwu bɔkɔ akwu uwo emondo mbala anukenzu uwu angba uwu bɔkɔ o ya wu te Obari-Ɔzhizɔsi mɔmɔ. 7 Uwu ele, akwu umɛza uwu Ogomina uwu kutashi kwɔngu, uwu o ya wu te Ɔsagiyɔ Ɔpɔlu, uwu ba akwu onzu uwu amasa, a lɔma laa Obanaba mbala Ɔsɔlu kwuwongu a gyi te la pwa iso iyi Ukpo. 8 Uwo emondo ele, uwu bɔkɔ ɛnyi wu o ya wu tee, Ɛlimasi mu kenzu unga Ogiriki awu, e kiri kaa le fulo egbo iyi ogomina ma kaa la na iso iyi Ɔzhizɔsi mo. 9 Akwɛyi Ɔsɔlu uwu bɔ o ya wu te Ɔpɔlu uwu bɔkɔ Kwundu uwu Ukpo e yi mbala wu awu, a bɔ wu eyeshii akwɛyi a za wu te, 10 <<Uŋɔ ŋɔ kwu umɛ uwu onzu uwoyi mbala ogewa uwu kiya ingyinangyina ingyi bɔkɔ akwu ingyɛshi! Kwukyoro mbala ira i nyɔlɔ ŋɔ egbo mo. Ŋɔ lafya la ɔgwuzɛ uwu ongbulolo uwu Ukpo itutumo mo? 11 Ŋɔ ma kwuwongu Ɔkwu kekelele, ŋɔɔ peyi, akwɛyi i gyi i to kwuye ŋɔ ma ɛbɛ mo.>>

Mu kwotota kwɔngu ibumburu mbala ipwu i kpo ma wu akwɛyi e le mu i gɔma yaa a gagyi onzu uwu bɔkɔ e yi wu mu kwuwo. 12 Tabɔkɔ ogomina a ma iyi bɔkɔ i du uwo emondo ele, izele i yi wu mo akwɛyi a nyama a mbwalu Ɔkwu.

13 Mizhikembo iyi ɛnyi Ɔpɔlu mbala enzu wu o fye mu kwoda i wɔ mu Ɔpafɔsi o ka mu Opega mu Opafiliya, mbaa bɔkɔ Ɔzhɔnu a lu mba afyima akwɛyi a gbama a ka mu Ɔzhɛrusalɛ. 14 O wɔ mu Opega o ka mu Atiyɔki iyi Opisidiya. Mu kwɔfyi ungwu ɛnwu igbomo o fye mu idaba iyi Azhu akwɛyi o ŋɔma. 15 Mizhikembo iyi bɔkɔ o mbwa ɛzu iwama mu ɛrama iyi Omosisi mbala ɛzu iyi bɔkɔ anukenzu o ka, akwɛyi wa to keyi umba udaba uwu Azhu o lɔma la mba o zɔ te, <<Ɛmɛnɛ mi, shi lu yi ɛlɔgbulɔ iyi ɛnwu ɛɛkɔ la enzu mbɔlɛ, shɔkɔ la lu so.>>

16 Akwɛyi Ɔpɔlu e yimo a rima, e wo mbo ewo akwɛyi a zɔ te: <<Ɛmɛ umba Izirɛ mbala lunyi umba bɔkɔ lu kwu Azhu mo bɔkɔ lu mbwalu Ukpo: la lu ngbalu kaa lu pwa! 17 Ukpo uwu enzu umba Izirɛ a ŋa umba asɔkwu nzu akwɛyi e shi riba mba ri kyomo gyɔɔ kwuyengwu bɔkɔ umba o yi mu Izhipiti, a wa mba ma mu kwuwo ungwu ekpasu wu mɛzhi ɛnyi, 18 Ukpo e yi idu mbala mba mu ɛzhi ɛngbarara nzhii ba lɔri uwekpendo, 19 Ukpo a ra laa ese erewo mo mu Okena akwɛyi a ra yi e shi mbo kaa lakwu ɛzhi mba. 20 Ɛlɛ i to mbo lɔri ederi endo la uwɛkpɛlɔ (450).

<< Mizhikembo iyɛlɛ Ukpo e shi mbo wa zɔ ombu nzhii ba kwuye ungwu anukenzu Ɔsamuwɛ. 21 Akwɛyi enzu mbamba o nda te le shi mbo ɔsu mba akwɛyi Ukpo e shi mbo Ɔsɔlu umɛ uwu Okishi, uwu ɛdɔ iyi Obezhami, uwu bɔkɔ e rɛsu lɔri uwekpendo. 22 Mizhikembo iyi bɔkɔ Ukpo a lu Ɔsɔlu ma mu ɛsu akwɛyi E to Odevidi ɛsu. Ukpo e so iso iyesheshi wu te: <Mi fya Odevidi umɛ uwu Ozhese onzu uwu idu mi, ee wo ingyinangyina ingyi bɔkɔ mi gyi te le wo.>

23 <<Akwu mu ɛdɔ iyi onzu ele gba Ukpo a kala Izirɛ Ɔzhizɔsi u sa enzu le , mate bɔkɔ e so mbo e shi mɛzhi tayi. 24 Ɔzhɔnu uwo obatisima a tanu iyi ikwu ira ɔsu la enzu umba Izirɛ lɛɛbi dɛ gba Ɔzhizɔsi e bo le. 25 Tabɔkɔ Ɔzhɔnu e yi mu ɛduma wu imbwama akwɛyi e yo mbo te <Lunyi lu ma te mi kwu uwe? Akwu mi gba mi kwu Usama le mo. Onzu uwu bɔkɔ e yi mu inyɔma mu kembo mi le, ekyikyi iyi ekpoyata wu lala mi do yi ivuvuma mo.>

26 <<Ɛmɛnɛ mi, ɛmɛ umba Aburamu, mbala umba bɔkɔ akwu Azhu mo umba bɔkɔ o wo iyi iyi Ukpo, kinzu gba o lɔ ɛlɔgbulɔ iyi isama o ka nzu le. 27 Enzu umba Ɔzhɛrusalɛ mbala wa to keyi ba o nyama te Ɔzhizɔsi gba Ukpo a lɔ wu kaa la sa mba ma le mo, o zɔngɔma iso iyi bɔkɔ anukenzu o ka. Tetete lukwu undu bɔkɔ o ngbɛ wu akwu inyɔlɔma iyi iso iyi bɔkɔ anukenzu o so iyi bɔkɔ o wayi iyɔkpɔɔ ɔnu uwu kwɔfyi ungwu ɛnwu igbomo. 28 O fya kwuyi ungwu o ngbɛ wu ma mo, tetete o za la Opayileti te la ngbɛ wu ma. 29 Mizhikembo iyi bɔkɔ o mbwa iyinayina iyi bɔkɔ o ka mu reshi wu awu ma, o kala wu ma mu kwuwɛyi akwɛyi o pwu wu mo mu kuvɔ. 30 Ukpo ba e yi wu mo mu kwuvɔ, 31 akwɛyi mu afyi gyɔɔ a zɔ ɛnwu wu ma mba enzu umba bɔkɔ o wɔ mu Ogalili o zɛ mbala wu o ka mu Ɔzhɛrusalɛ. Umba gba akwu azɔgɔ wu le kekelele .

32 << Kekelele ki ka yi la iso iyesheshi iyi bɔkɔ Ukpo e so e shi mɛzhi la umba asɔkwu nzu, 33 akwɛyi a nyɔlɔ yi ma, Ukpo e shi nzu Ɔzhizɔsi kinzu eye, kyamate bɔkɔ o ka yi mu kwokpo ungwu Usamu ungwopo te: << <Ŋɔ kwu umɛ mi;

ɔnɛnɛ mi kwu Ada ŋa. 34 Ongbulolo uwu iso gba e yi te Ukpo e yi wu mo mu kwuvɔ, e shi wu kaa la gba le kpomo fo, Ukpo e so yi e shi mɛzhi te:

<< <Mi mbwa yi ma lunyi enzu mi kyamate mi so mi shi mɛzhi la Odevidi tayi.>

35 Te gba o ka yi ma mu riyi ingyi fo mu kwokpo ungwu amwu le te:

<< <Ŋɔ lafya la onzu Ɔkɛrikɛri ŋɔ kaa le kpomo mo.>

36 kwuyengwu bɔkɔ Odevidi a mbwa ɛduma iyi Ukpo mo mu ɔyi wu akwɛyi Ukpo a na wu kwunyɔ ma, o pwu wu mo mbala umba asɔkwu wu akwɛyi ɛnwu wu i vama. 37 Ukpo e yi Ɔzhizɔsi ma mu kwuvɔ, akwɛyi e kpomo fo ɛnwu ba i vama mo.

38 <<Kwuwo kwɔngu ɛmɛnɛ mi, Mi gyi te la mi so yi te akwu mu ɛnyi iyi Ɔzhizɔsi gba o gbɔ nzu ingbomo nzu ma le. 39 Kwuwongwu kiya ingyi Ɔzhizɔsi e wo le Ukpo e yese onzu uwunawuna uwu bɔkɔ e kwidu e fulo mu Ɔzhizɔsi te e yi ingbomo fo. 40 La lu ngbɛndu kaa iso iyi bɔkɔ anukenzu o so awu li wɔ ma yi mo.

41 O zɔ te, La lu Yese lunyi wazhi iso iyi Ukpo mo,

lu ya kenzu ngbɛɛ nzhii ba lu kpomo,

mo mi wo kiya ingyi izele mu kwuye yi

iyi bɔkɔ gba o so yi lala lunyi lu nyama mo.

42 Tabɔkɔ Ɔpɔlu mbala Obanaba o lafya la udaba uwu uwu Azhu, enzu mbamba o za mba te lo gba lo bo kpɔ kaa lo siso ɛlɛ lo kyo ɔnu uwu kwɔfyi ungwu ɛnwu igbomo. 43 Mizhikembo iyi bɔkɔ enzu mbamba o kama, Azhu gyɔɔ mbala umba bɔkɔ akwu Azhu mo umba bɔkɔ o mbwalu Ɔzhizɔsi mo, o mbwalu Ɔpɔlu mbala Obanaba. Umba ba o so mbo iso o ka mba ɛnwu ma, o za mba te lo rima kpakiri mu Ukpo imbwalu ma.

44 Ɔnu uwu kwɔfyi ungwu ɛnwu igbomo i shi te enzu umba kwuse kwɔngu ndii gba o kpala ɛlu te lo pwa iso iyi Ɔkwu le.

45 Tabɔkɔ Azhu o ma enzu gyɔɔ, akwɛyi o wo rise ingyi Ɔpɔlu mbala Obanaba akwɛyi o zɔ te iso iyi bɔkɔ Ɔpɔlu e yi mu isomo awu akwu angba akwɛyi o kpa mba ari. 46 Akwɛyi Ɔpɔlu mbala Obanaba o gba mba opwu gedegede te: <<Lunyi gba ki so yi iso iyi Ukpo keyi le, ta bɔkɔ lu to yi mo awu lu zɔ te lu fa la kwunyɔ ungwɔkpɔ mo, inyi gba i shi ki fulo ki ka mbaa enzu umba bɔkɔ akwu Azhu mo le. 47 Ada Ɔsu Ukpo gba a ta nzu ɔkpa le tee .> >>

Mi lɔ yi ma la enzu umba bɔkɔ akwu Azhu mo kaa la lu so mbo rɛnu mi. Lunyi lu kwu kyamate ɛbɛ tayi,

kaa lo sa enzu mba kwudu kwɔlɛ ma lɛɛ .

48 Tabɔkɔ enzu umba bɔkɔ akwu Azhu mo o pwa iso ɛlɛ, o mwu ɔnyɛ akwɛyi ɔ zɔ te iso iyi Ukpo ɛlɛ akwu iso iyeshi; akwɛyi enzu umba bɔkɔ akwu Azhu mo lɛɛbi umba bɔkɔ Ukpo a ŋa mba kaa lo fya kwunyɔ ungwɔkpɔ o kwidu o fulo mu Ɔzhizɔsi. 49 Iso iyi Ukpo i fulama munamuna mu ɛzhi ɛnyi lɛɛbi. 50 Watokeyi umba Azhu ba o lo eko umba o yi kwuwo, umba o wuyi iyi Ukpo mbala enzu umbakɔ umba kwuse atiti akwɛyi o yimo la ovyo mbala Ɔpɔlu mbala Obanaba akwɛyi o ra mba ma mu ɛzhi mba. 51 Ɔpɔlu mbala Obanaba ba o bulɔ kwumburu ungwu alɛ mba ma akwɛyi o lafya la kwuse kwɔngu o ka mu Ikɔniyɔ. 52 Enzu wa mbwalu mu Atiyɔki ba o yi mbala ɔnyɛ mbala Kwundu uwu Ukpo kwuyengwunanguna.