1 Mizhikembo iyi ki wo esu ungbo awu, ki fye mu kwoda ungwu embyi ki to ɔgwuzɛ uwu Ɔkɔsi. Eyi ilama ki ka mu Orodesi akwɛyi ki lafya la mɔmɔ ki ka mu Opatara. 2 Ki du kwoda ungwu embyi ungwu kwu sheye mu Ofonishiya, ki fye mangwu akwɛyi kwu fulomo. 3 Tabɔkɔ ki bo mbaa ki ma Ɔsapurɔ, akwɛyi ki mu isama ki sheyi mbaa okanga uwu ɔnu kwoto akwɛyi ki to Ɔgwuzɛ uwu Osiriya. Ki ka mu Otaya mbaa bɔkɔ kwoda kwu kala ewulo mo. 4 Bɔkɔ ki fye wa mbwalu Ɔzhizɔsi ma mɔmɔ, ki ŋɔ mbala mba afyi erewo. Mu iwomo iyi Kwundu uwu Ukpo a kpa Ɔpɔlu ɛshɛku te le so mu Ɔzhɛrusalɛ mo. 5 Tabɔkɔ kwuyengwu iyimo nzu ku wo mo, ki yimo akwɛyi ki to Ɔgwuzɛ nzu. Wambwalu Ɔzhizɔsi lɛɛbi la eko la umba o fye nzu mo o ka nzu mu kenzu unga risu, akwɛyi ki kwumo ki lɛ Ukpo. 6 Tabɔkɔ ki wo esu ungbo, ki fye mu kwoda ungwu embyi umba ba o gba o kama mogba.

7 Mu Otaya ki le mu luzɛ nzu mu embyi nzhii ki ka mu Opitolemaya, mɔmɔ ki gbɛlɛ wa mbwalu Ɔzhizɔsi ɛnyi akwɛyi ki ŋɔ mbala mba kwɔfyi kwunyi. 8 Eyi i lama ki yimo ki ka mu Oseseriya akwɛyi ki kpo mu kwogba ungwu Ofilipi u tanu iyi Ɔzhizɔsi, akwu onzu ukpɛnyi mekeka iyi werewo mbamba. 9 Ofilipu e yi emoko wendo umba bɔkɔ akwu anukenzu.

10 Mizhikembo iyi ki ŋɔ mɔmɔ afyi gyɔɔ akwɛyi anukenzu uwufo uwu o ya wu te Agabu a wɔ mu Ozhudiya e bo munɛ. 11 E bo munyi nzu, e to kwumamuzhi ungwu Ɔpɔlu akwɛyi a ma ewo mbala alɛ wu ma akwɛyi a zɔ te, <<Kwundu uwu Ukpo a zɔ te, <Te gba Azhu umba Ɔzhɛrusalɛ oo ma ada uwu kwumamuzhi kwɔlɛ ma le akwɛyi oo rawu oo shi enzu umba bɔkɔ akwu Azhu mo.> >>

12 Tabɔkɔ ki pwa ɛlɛ, kinzu mbala enzu umba bɔkɔ o yi mɔmɔ awu ki kpa Ɔpɔlu ɛshɛku te le so mu Ɔzhɛrusalɛ mo. 13 Akwɛyi Ɔpɔlu a gba nzu opwu te, <<Kimbe ki shi ba lu loga ba lu tutu mi egbo mo te. Imi mi nyama te lo ta mi mu ugu ugyi mu Ɔzhɛrusalɛ lo kyo lo ngbɛ mi ma kwuwo ungwu ɛnyi iyi Ɔkwu Ɔzhizɔsi.>> 14 Bɔkɔ ki ma te ki do wu egbo ifulomo mo, akwɛyi ki fu ewo mɛzhi akwɛyi ki zɔ te, <<Iyi bɔkɔ Ukpo a gyi awu gba li wo li.>>

15 Mizhikembo iyi ɛlɛ, ki yi ɛnwu ma akwɛyi ki to ɔgwuzɛ uwu Ɔzhɛrusalɛ. 16 Enzu wa mbwalu umbafo umba Oseseriya o fye nzu mo o ka nzu mu kwogba ungwu Ominaso, uwu gba a ŋegbo onzu riyi oga le. Onzu ele a wɔ mu kwuse ungwu Ɔsapurɔ ba akwu enzu umba kwonze umba bɔkɔ o na rɛnu ingyi Ukpo.

17 Bɔkɔ ki kama mu Ɔzhɛrusalɛ, enzu wa mbwalu o ba nzu ma ɔnyɛnyɛ. 18 Eyi ilama Ɔpɔlu mbala umba bɔkɔ ki shimo ki ka mu ɔgba uwu Ozhemisi, enzu umbakɔ umba Ɔshɔshi lɛɛbi o yi mɔmɔ. 19 Ɔpɔlu a gbɛlɛ mba ɛnyi akwɛyi a zɛ mba ilɔ lɛɛbi iyi bɔkɔ Ukpo e wo mekeka iyi ekeshi kwongwu ɛduma iyi bɔkɔ e wo.

20 Tabɔkɔ o pwa ɛlɛ, o gbo oya la Ukpo. Akwɛyi o za la Ɔpɔlu te: <<Umɛnɛ, yese, Azhu riba akwu wa mbwalu, kpɛkpɛ mba mba ba akwu enzu wa bɔ kushi mu ɛrɛma iyi Omosisi. 21 O ba mba ɛza te uŋɔ ŋɔ zɔ Azhu umba bɔkɔ o yi mbala enzu ekeshi lo shi egbo mu ɛrɛma iyi Omosisi mo, lo zɛ ɛmɛ mba ɛsɔ ba lo mbwalu iwomo iyi ɛdɔ nzu mo. 22 Ki wo te kekelele? Moo mega o pwa yi te ŋɔ bo munɛ, 23 kwuwo ngwɔlɛ, wo iyi bɔkɔ ki so ŋɔ. Anzɔnu wendo o yi mbala nzu umba bɔkɔ o bɔ ɛmba kepo mu idu. 24 Uŋɔ mbala enzu mbɔlɛ la lu so kaa lu wo ɔpɛriri, shi rigbɛ ingyi ɛduma mba kaa lo gbɛ mba inyi ma. Akwɛyi ɛlɛ ishi onzu uwunawuna e yitu te ongbulolo e yi mekeka iyi ewa iyaŋa bɔkɔ o lo le mo, uŋɔ lala ŋɔ yi mu ɛrɛma ɛlɛ imbwaluma. 25 Mu iso iyi enzu umba bɔkɔ akwu Azhu mo umba bɔkɔ akwu wa mbwalu, ki ka mba kwupu dɛ-ɛ iyi bɔkɔ ki nyama la yi te, lo rima mbaa ewiri iyi bɔkɔ o wo yi isabɔ la eshi, lo kwu ɛnzhi mo, mbala ivye iyi izɔfyi uwu bɔkɔ o fu ɛnzhi ba lo yama mo.>>

26 Bɔkɔ eyi ilama Ɔpɔlu mbala enzu wendo mbamba o ka o ko wo ɛmba ɔpɛriri. Akwɛyi a ka mu ɔtɛpu kaa le so mbo kwɔfyi ungwu bɔkɔ ɔpɛriri iwomo kwubo mo akwɛyi o wo rɛshi kwuwo mbo.

27 Bɔkɔ afyi erewo i nda la inyɔlɔma fo, Azhu umbafo umba bɔkɔ o wɔ mu ɛzhi iyi Eshiya o ma Ɔpɔlu mu ɔtɛpu akwɛyi o lo enzu atiti akwɛyi o yi Ɔpɔlu ma,

28 o le mu uzhi iwomo te, <<Enzu umba Izirɛ, la lu mbwa nzu ma! Ele gba akwu onzu uwu a zɔ enzu lɛɛbi munamuna te lo zhi enzu nzu mo, lo lomo la ɛrɛma iyi Omosisi mo mbala ɔtɛpu nzu ele. Akwu ɛlɛ kɛɛkyi mo, e bo la enzu umba bɔkɔ akwu Azhu mo mu ɔtɛpu mɛmi, e fo ɛrɛma iyi kizɛ kɛ kɛrikɛri ngyɛlɛ ma.>> 29 Mu afyi ɛnyi o ma Otirofimu, onzu uwu Ɛfɛsɔ mu kwuse mbala Ɔpɔlu akwɛyi o byi egbo te Ɔpɔlu lala a kawa mɛmi iyi ɔtɛpu.

30 Akwɛyi enzu umba kwuse kpɛkpɛ mba o le mu ovyo iwomo, enzu o wɔ munamuna o bo, akwɛyi o yi Ɔpɔlu ma, o pyipyi wu o wawu kwudu mu ɔtɛpu, akwɛyi o koko iku iyi ɔtɛpu ma efyefya. 31 Tabɔkɔ enzu mbamba o yi mu iwomo te lɔ ngbɛ wuma, akwɛyi ɛza ɛlɛ i ka mu alu iyi u to keyi uwu Asozha uwu Oroma te kwuse kpɛkpɛngwu kwu yi mu ovyo iwomo. 32 Kɛlɛlɛ akwɛyi u to keyi uwu asozha akwu umbakɔ mbala umbɛri akwɛyi o ri ɛnya o ka mɔmɔ mba ovyo awu. Tabɔkɔ wawo ovyo mbamba o ma u to keyi uwu Asozha mbala Asozha wu, akwɛyi o lafya Ɔpɔlu ɛmu ikpama.

33 U to keyi uwu Asozha e bo akwɛyi e yi Ɔpɔlu ma akwɛyi e shi ɔkpa te lo gbawakyi mu akwuta epo. Akwɛyi e yo Ɔpɔlu kwuyo te u wu akwu uwe dɛ, kimbe ba e wo dɛ. 34 Enzu mbafo mɛmi iyi riba ingyi enzu ngyɛngyi o le mu ovyo iwomo, umbafo o so kiya ngyɛlɛ umbafo ba o so ngyewa, akwɛyi u to keyi uwu Asozha le e do te a zɔngɔma ongbulolo iyi iso ɛlɛ mo kwongwu ovyo, akwɛyi e shi ɔkpa te Ɔpɔlu lo sowo mu mɛmi iyi obaraki uwu asozha. 35 Tabɔkɔ Ɔpɔlu e bo mba embu iyi ɔgwuzɛ, akwɛyi asozha o to wu mo mu ingari kwuwongu ovyo uwu enzu mbamba e yi gyɔɔ. 36 Riba ingyi enzu umba bɔkɔ o mbwalu awu o so wu mu uzhi iwomo te, <<Lo sheyimo la onzu ele!>>

37 Tabɔkɔ asozha o gyi te lo so la Ɔpɔlu mu mɛmi iyi obaraki uwu asozha akwɛyi e yo u to keyi uwu asozha awu kwuyo te, <<Ŋɔ nyama te la mi so ŋɔ iso?>>

a gba wu opwu te, <<Ŋɔ so Ogiriki kego?>> 38 <<Akwu ŋɔ gba ŋɔ kwu onzu uwu Izhipiti uwu bɔkɔ e shi enzu o wo ovyo mbala ogomineti akwɛyi ŋɔ kwu enzu umbira edubu endo mu afyi ɛnyi ŋɔ kamba mu ɔsɛ le mo re?>> 39 Ɔpɔlu a gba mba wu opwu te, <<Ayimo. Imi mi kwu Azhu, mi wɔ mu Otasu mu ɛzhi iyi Osilisiya, mi kwu umɛ uwu kwuse ungwɔkuu. Shɔɔkɔ la lu shi mi kapa kaa la mi siso mbala enzu mbɔlɛ.>>

40 Tabɔkɔ u to keyi uwu asozha e shi wu kapa, akwɛyi Ɔpɔlu e yimo a ri mu embu iyi iyama mu ɔgwuzɛ akwɛyi e wo enzu ewo te lo kpala kenzu mo. Tabɔkɔ kizɛ ki gbo ndii, akwɛyi e so mbo iso mu kenzu unga Iburu: