1 Mizhikembo iyi afyi ɛlɔ obwoshi uwakɔ Ananayasi a ka mu Oseseriya mbala enzu umbakɔ umbafo mbala oloya uwufo uwu bɔkɔ o ya wu te Otatulu awu. O lo ewa iyi Ɔpɔlu mu idu iyi Ogomina, Ɔfɛlisi. 2 Tabɔkɔ o ya Ɔpɔlu ma e fyemo mɛmi akwɛyi Otatulu e le mu ombu mba ifumo mu idu iyi onzu uwakwu Ɔfɛlisi. A zɔ te: <<Mu iwomo ŋɔ iyesheshi ɛlɛ gba ishi nzu ki ŋɔma mu oloto mu ɛzhi ɛlɛ le. 3 Kinzu ki na apula iyi ŋɔ wo nzu le lɛɛbi laa ɔnyɛ uwakwu. 4 Imi mi gyite kaa mi to kwuye ŋɔ gyɔɔ mo, kwuwo ngwɔlɛ mi kpa ŋa ɛshɛku kaa ŋɔma kyoo kaa pwa iso iyi bɔkɔ mi bi so bwɛɛ le.

5 <<Ki du onzu ele te akwu u ta ovyo, e lo Azhu munamuna mu kwudu kwɔlɛ atiti kaa lo wo ovyo. Akwu u to keyi uwu enzu umba bɔkɔ o ya mba te Anazarene awu. 6 A gyite le tutu ɔtɛpu ma; gba ki yi wu mo le. 7 Olayisu, u to keyi uwu asozha uwakɔ awu ba e bo akwɛyi a na wu nzu ma mega. 8 Gba ŋɔ yo wu eyo mu afyi ŋɔ, ŋɔ pwa ongbulolo uwu iso lɛɛbi iyi bɔkɔ ki so mu reshi wu.>> 9 Azhu ba o kyo o nyama mu opwu ukpɛnyi te, te gba iyi le.

10 kwuyengwu ogomina e shi wu kapa kaa le siso, akwɛyi Ɔpɔlu a zɔ te: <<Mi yitu te ŋɔ kwu u zɔ ombu mu kwuse kwɔlɛ diridiri e; kwuwongwɔlɛ mi mu ɔnyɛ kaa la mi fu ombu mi mu idu ŋɔ. 11 Uŋɔ ŋɔ do te ŋɔ yo kwuyo mafyi ŋɔ ka pwa te, i di pika afyi uwolepo mo mo bɔkɔ mi ka mu Ɔzhɛrusalɛ ka mi lɛ Ukpo. 12 Azhu mbɔlɛ o du mi te mi yi mu kambwu irimo mbala onzu ukpukpɛnyi te mu Ɔtɛpu mo, ba o du mi te mi yi mu ovyo itama mu idaba iyi ɛlu ikpalama iyi Azhu naa munamuna mu kwuse kwɔlɛ mo. 13 Umba ba o domo te o zɔ ŋɔ kiya ingyi ki zɔ te iso iyi bɔkɔ o so awu akwu ongbulolo mo. 14 Imi ba mi nyama te mi kwu u lɛ Ukpo uwu asɔkwu nzu, mu iwomo ɛlɛ te gba o zɔ te ki kwu enzu umbira le. Imi ba mi nyama la ɛrama iyi Omosisi mbala ɛzu iyi bɔkɔ anukenzu o ka awu lɛɛbi, 15 kyamate bɔkɔ enzu mbɔlɛ o nyama awu, tayigba Imi mi nyama le te Ukpo e wo ta bɔkɔ a zɔ awu te enzu umba bɔkɔ o kpomo, Ukpo a gba mba la iyimo la kwunyɔ, la enzu umba bɔkɔ o mbwalu Ukpo la enzu umba bɔkɔ o mbwalu mo. 16 Kwuwo ngwɔlɛ mi gyikpɔɔ te la mi koko mi wo kiya ingyi ki she la Ukpo mbala enzu.

17 <<Mizhikembo iyi lɔri gyɔɔ, mi gbama mi ka mu Ɔzhɛrusalɛ ka la mi shi enzu mi ayirewa rɛshi kaa la mi kyo mi wo isabɔ la Ukpo. 18 Azhu umbafo o ma mi mu Ɔtɛpu mizhikembo iyi bɔkɔ mi mbwa isabɔ iyi onzu iwuluma sɛsɛ iwomo. Mɔmɔ mi yi mbala enzu gyɔɔ mo, imi ba o du mi mu ovyo itama mo. 19 Azhu umbafo umba bɔkɔ o wɔ mu ese iyi Eshiya o yi mɔmɔ, umba gba i fate lo bo mu idu ŋɔ kaa lo fulo ata iyamba le. Gba umba o domo te o yi mi ombu ba lo so nɛ. 20 Enzu umba bɔkɔ o yi munɛ le ba lo so ira iyi bɔkɔ o du mi layi kwuyengwu mi rima mu idu iyi wa to keyi umba Azhu 21 Debate akwu iso ikpɛnyi iyi bɔkɔ mi so kwuye ungwu mi rima mekeka mba awu: <Inyi gba akwu te, mi nyama te enzu umba bɔkɔ o kpomo awu Ukpo a gba mba la iyimo mu kwuvɔ, ɛlɛ gba ishi gba o bo lo ewa mi munyi ŋɔ ɔnɛnɛ le.> >>

22 Akwɛyi Ɔfɛlisi, uwu bɔkɔ e yitu iyi ɔgwuzɛ uwu Ɔzhizɔsii mamari awu, e turu kwɔfyi ungwu ombu ɔnwu ma a gba keyi, a zɔ te, <<Ɔlasiyɔ u to keyi uwu asozha uwakɔ a nyɔ dɛ gba mi pwa ɛkwu mu iso yi le>> 23 Akwɛyi a za la u to keyi uwu asozha te lo gbala Ɔpɔlu so wo mu ugu ugyi kaa lo gbo wu mo. Uŋɔ ba kapa kaa le wo apula iyifo mafyi, ɛmɛza wu umba bɔkɔ o bo te o ma wu nya mba ma.

24 Mizhikembo iyi afyi gyɔɔ Ɔfɛlisi mbala oko wu Odurisila, uwu bɔkɔ akwu Azhu awu o gbama o bo mu Oseseriya. A lɔ la Ɔpɔlu kaa le bo le so wu iso iyi Ɔzhizɔsi. Uwu ba a ngbɛ alu mu iso iyi ikwu idu fulo mu Ɔzhizɔsi uwu bɔkɔ akwu usama nzu. 25 Tabɔkɔ Ɔpɔlu e le mu iso isomo mekeka iyi ototo, i yi ɛnwu ma mbala ombu uwu bɔkɔ u bu nyɔ awu, akwɛyi Ɔfɛlisi a wiyi akwɛyi a za la Ɔpɔlu te, <<Ikpo kya tayi ŋa! Sheyimo iyi a ŋa. Kwuye ungwu mi yi igɔ ŋɔ, Mi lɔ la ŋa.>> 26 Ɔfɛlisi ba a ma kyamate Ɔpɔlu e shi wu eduwo wɛrɛrɛ, akwɛyi e koko a lɔ la Ɔpɔlu wɔwɔ a ba ɛza mbala wu.

27 Tabɔkɔ lɔri lopo lu pika ma, akwɛyi Osiza a lu Ɔfɛlisi ma mu ogomina akwɛyi e shi yi Ɔpɔshiyɔ Ofesitu. Ɔfɛlisi ba a gyi te Azhu lo pwa wu ma, akwɛyi a lafya la Ɔpɔlu mu ugu ungyi.