1 Mu Ikɔniyɔ Ɔpɔlu mbala Obanaba o ka mu udaba uwu uwu Azhu ta bɔkɔ o koko o wo awu. Mɔmɔ o siso ɔnyɛ akwɛyi Azhu mbala umba bɔkɔ akwu Azhu mo o kwidu o fulo mu Ɔzhizɔsi. 2 Azhu umba bɔkɔ o kwidu fulo mo awu, o za la enzu umba bɔkɔ akwu Azhu mo te lo nyama la iso ɛnyi mo, kwuwo kwɔngu enzu umba bɔkɔ akwu Azhu mo umbafo o wamba mbala wa mbwalu Ɔzhizɔsi mɔmɔ. 3 Ɔpɔlu mbala Obanaba o to kwuye gyɔɔ mɔmɔ mu iso iyi Ɔzhizɔsi isomo gedegede. Ukpo e shi mbo ekpasu kaa lo wo apula iyi amɛ. E wo ɛlɛ te kaa la zɔ enzu te iso iyi bɔkɔ wa zɛ ilɔ o so awu , te gba iyi le. 4 Enzu umba kwuse Ikɔniyɔ kwɔngu o ka epo: umbafo o mbwalu Azhu, umbafo ba o mbwalu wa zɛ ilɔ. 5 Enzu umba bɔkɔ akwu Azhu mo mbala Azhu o wo okwura mbala watokeyi mba kaa lo kpa mba ekyi lo ngbɛ ma. 6 Ɔpɔlu mbala Obanaba ba o pwa yi akwɛyi o rima o ka mu Olisitira mbala Odebi ese iyi Olikoniya mbala ese iyi bɔkɔ i fula yi ma, 7 O kpakpɛ mu anu itama iyi Ɔzhizɔsi mɔmɔ.

8 Onzu ukpɛnyi mu Olisitira mɔmɔ uwu bɔkɔ alɛ wu i kɔma, o mba wu la kinyɛ ba a da zɛma dɛ mo. 9 Onzu ele a ngbalu kwuyengwu Ɔpɔlu e yi mu iso isomo iyi Ɔzhizɔsi. Ɔpɔlu a bɔ wu eyi shii akwɛyi a ma te onzu ele a nyama te, Ɔzhizɔsi e do wu ofya ibomo mo 10 akwɛyi Ɔpɔlu a ya wu ma mu opwu uwɔkɔɔ te, <<Umɛza mi yimo ka rima!>> Mu kwotota kwɔngu e yimo a la kwuzhoto akwɛyi e le mu luzɛ.

11 Tabɔkɔ riba ingyi enzu mbamba o ma ingyi bɔkɔ Ɔpɔlu e wole, o ta opwu okpaa mu ɔnyɛ imuma la isomo mu kenzu unga Olikoniya te, <<Ukpo a vindɔ onzu e bo munyi nzu!>> 12 O ya Obanaba te Ɔzayɔ, Ɔpɔlu ba o ya wu te ɛmɛsi kwuwongu uwu gba akwu u to keyi uwu iso isomo le. 13 Akwɛyi obwoshi uwu eshi iyi Ɔzayɔ, uwu bɔkɔ kunu ungwu eshi wu ku yi kɛlɛ mbala kwuse awu, e bo la endo mbala edodo mu kenzu unga ɔbɛ kwuwongu uwu mbala riba ingyi enzu mbamba o gyi te lo wo isabɔ la Ɔpɔlu mbala Obanaba.

14 Tabɔkɔ Obanaba mbala Ɔpɔlu o pwa ɛlɛ o tara ekpayi mba ma o renya o fye mɛmi iyi enzu mbamba la isomo mu opwu uwɔkwu. 15 O zɔ te, <<Ɛmɛza mi kimbe ki shi bɔkɔ lu wo ɛlɛ? Kinzu tete ki kwu enzu kyamate lunyi te. Ki ka yi la ilɔ iyesheshi, kaa la lu lafya la apula iyi umbwa ɛlɛ kaa la lu mbwalu Ukpo uwu e ye la reyi uwu e wo oshi mbala ɛzhi mbala risu mbala apula lɛɛbi iyi bɔkɔ iyi mɛmi yi. 16 Mu ɔyi uwu ekyi, e shi enzu umba kwudu kwɔlɛ bi kaa lo mbwalu ɔgwuzɛ uwu bɔkɔ u she mbo. 17 Tetete Ukpo a zɔ enzu lɛɛbi te uwu gba e shi nzu apula iyeshi iyinayina le: Uwu gba e shi embyi umboshi le, uwu gba e shi ewiri iyi utu i wɔma, i bwulɔma akwɛyi ii mbomo le; e shi yi kiya ingyirimo kaa lu ri, e shi yi ɔkpara uwu ɛnwu kaa la lu mu ɔnyɛ.>> 18 Kyo la isomo iyi Ɔpɔlu mbala Obanaba ɛlɛ lala, o kiri ngbɛɛ de gba o nyi enzu mbɔlɛ isabɔ iwomo la mba le.

19 Akwɛyi wa to keyi umba Azhu umbafo o wɔ mu Atiyɔki mbala Ikɔniyɔ akwɛyi o za mba te iso iyi bɔkɔ Ɔpɔlu e so awu akwu iso iyira. O kpa Ɔpɔlu ekyi akwɛyi o pyipyi wu o wawu ma mu kwuse, o mate naa e kpomoo ŋa. 20 Akwɛyi wa mbwalu mbamba o bo o fula wu ma, akwɛyi e yimo a gba e fye mu kwuse yimo a gba e fye mu kwuse. Eyi i lama Ɔpɔlu mbala Obanaba o lafya la kwuse kwɔngu o ka mu Odebi.

21 Ɔpɔlu mbala Obanaba o tanu iyi ilɔ iyesheshi mu kwuse kwɔngu akwɛyi o fya wa mbwalu gyɔɔ. Akwɛyi o gba o ka mu Olisitira, Ikɔniyɔ mbala Atiyɔki, 22 Onzu uwunawuna uwu bɔkɔ a mbwalu, mega a ma inyashi gyɔɔ mu kwudu kwɔlɛ kaa la mu ɔnyɛ mu ɛsu irimo iyi Ukpo moshi.>> 23 Mu Ɔshɔshi uwunawuna, Ɔpɔlu mbala Obanaba o ŋa mba enzumbakɔ, o lɛ Ukpo, o wo kenyo akwɛyi o ra mba o lo Ukpo uwu bɔkɔ umba o kwidu o fulo ma wu awu mɔwu. 24 Mizhikembo iyi bɔkɔ Ɔpɔlu mbala Obanaba o zɛ mu Opisidiya, akwɛyi o ka mu Opafiliya, 25 O tanu iyi iso iyi Ukpo mu Opega, akwɛyi o ka Ataliya.

26 O wɔ mu Ataliya o fye mu kwoda ungwu embyi akwɛyi o gba o ka mu Atiyɔki mbaa bɔkɔ o lɛ mba Ukpo kaa esheshi iyi Ukpo li yi mbala mba kwuwongu ɛduma iyi bɔkɔ o mbwa yi iwomo awu. 27 Tabɔkɔ o bo mu Atiyɔki, o kpala wa mbwalu ɛlu akwɛyi o ba mba ɛza iyi kiya lɛɛbi ingyi bɔkɔ Ukpo e shi mbo ekpasu bo wo, e kyo e shi enzu umba bɔkɔ akwu Azhu mo o na rɛnu ingyi Ɔzhizɔsi. 28 Akwɛyi o wo afyi gyɔɔ mbala wa mbwalu mɔmɔ.