1 Mu kwuye kwɔngu riba ingyi wa mbwalu ri kwo mu ikyomo. Akwɛyi Azhu umba bɔkɔ o so kenzu unga Ogiriki o le mu anu izɔma mu reshi ingyi Azhu umba bɔkɔ o so kenzu unga Iburu. O za anu te eko wakpanuma ma umba Ogiriki o wo mbo iwomo kwuyengwu ewiri ikama. 2 Kwuwongwu ɔlɛ, wa zɛ ilɔ wewo la wepo mbɔlɛ o kpala wambwulu lɛɛbi ɛlu akwɛyi o za mba te << I sheshi te ki lafya la anu itama iyi iso iyi Ukpo kaa la ki wo ɛduma iyi ewiri ikama mo. 3 Ɛmɛnɛ mi, la lu ŋa enzu werewo umba ilukwu umba bɔkɔ Kwundu uwu Ukpo e yi mbala mba akwɛyi ki shi mbo ɛduma iyi ewiri ikama. 4 akwɛyi ki shi kwuye nzu mu Ukpo ilɛma mbala anu itama iyi rɛnu ingyi Ukpo.>>

5 Amasa ɛlɛ i fye enzu lɛɛbi ma, akwɛyi o ŋa Ositivi uwu e yi ikwu idu lu fulo mbala Kwundu uwu Ukpo , ikyo Ofilipu mbala Oporokorusi mbala Onikano mbala Otimo mbala Ɔpamɛnasi mbala Onikolasi uwu bɔkɔ a wɔ mu Atiyɔki, uwu ba akwu u mbwalu Ukpo uwu Azhu. 6 Wambalu o ka la enzu mbɔlɛ mba wa zɛ ilɔ umba Ɔzhizɔsi akwɛyi o fulo mbo ewo reshi, o lɛ Ukpo.

7 Akwɛyi iso iyi Ukpo i le mu iyama. Riba ingyi wa mbwalu mu Ɔzhɛrusalɛ ri kwo mu ikyomo gyɔɔ akwɛyi ebwoshi umba Ukpo o nya la ikwu idu lu fulo.

8 Ukpo e shi Ositivi Esheshi gyɔɔ mbala ekpasu iyɛkwu iyi ɛduma iwomo akwɛyi e wo apula iyi izele mbala amɛ gyɔɔ mba enzu. 9 Akwɛyi agewa wu o wɔ mɛmi iyi enzu umba odudu uwu Udaba uwu ɛlu ikpalama uwu Azhu uwu enye umba Ekyi (mo tayi gba o ya mba le.) Enzu mbɔlɛ akwu Azhu umba Osarini mbala Alɛkizandariya ikyo mbala ɛzhi iyi Osilisiya mbala Eshiya o le mu kambwu irimo mbala Ositivi. 10 Kwuwongwu ilukwu mbala Kwundu uwu Ukpo e yi mbala Ositivi, umba ba ɔ fawa la ibyima.

11 Akwɛyi o lo enzu umbafo mu ubwu kyokyo ka lɔ zɔ te, << Kinzu ki pwa Ositivi e so iso iyi ɔya mu reshi ingyi Omosisi mbala Ukpo.>>

12 O shi egbo iyi enzu lɛɛbi, ikyo watekeyi mbala wazɔ ɛrama iyi Omosisi i yimo. O yi Ositivi o ka wu mu udaba uwakɔ uwu wa to keyi umba Azhu. 13 O wa la azɔgɔ umba angba akwɛyi o zɔ te, <<Onzu ele e so iso iyi ira iyɔkpɔɔ mekeka iyi Ɔtɛpu ele mbala ɛrama iyi Omosisi.

14 Ki pwa wu a zɔ te Ɔzhizɔsi uwu Ɔnazarɛti ele e shiri Ɔtɛpu ele ma akwɛyi a ŋanga ukwu uwu Omosisi e shi nzu awu.>>

15 Kpɛkpɛ mba umba o ŋɔ mu odudu uwakɔ uwu wa to keyi umba Azhu awu o bɔ Ositivi eyi shii akwɛyi o ma ureyi wu u lemo u yi mate uwu ɔlɔgbulɔ uwu Ukpo tayi.