1 Ɔnu uwufo Opita mbala Ɔzhɔnu o sheye mu ɔtɛpu mu kwuyengwu Ukpo ilɛma mu ekerepe ela iyi ɔnɔnda. 2 Onzu uwufo uwu e yi ofya umbu kpokapiya o koko o shi wu mu kenzugwu unga ɔtɛpu mbaa kwoya indama mbaa enzu umba o sheye mu ɔtɛpu. Kenzugwu kanga o ya nga te kenzugwu unga woshi. 3 Tabɔkɔ a ma Opita mbala Ɔzhɔnu te o ŋɔ fye mu ɔtɛpu akwɛyi a nda mba eduwo. 4 Opita mbala Ɔzhɔnu o bɔ wu eyi shii akwɛyi Opita a za wu te, <<Yese nzu!>> 5 Akwɛyi onzu ele a bɔ mba eyi shii, a ma te a fya kiya mu ewo mbo ŋa.

6 Akwɛyi Opita a za wu te, << Imi mi yi kwosiliva mo, mi yi kwogolu mo, ingyi mi yi ngyi gba mi shi ŋɔ le. Mu ɛnyi iyi Ɔzhizɔsi Okrasi uwu Ɔnazarɛti, yimo kaa zɛma.>> 7 Akwɛyi e yi wu mu kwuwo ungwu ungyi wu e yi wu mo a rima, mɔmɔɔmɔ ata wu mbala epunu iyi alɛ wu indama. 8 A la kuzhoto akwɛyi e le mu luzɛ. Akwɛyi a mbwalu mba mu ɔtɛpu la luzɛ mbala kuzhoto ilama mbala Ukpo iduma. 9 Tabɔkɔ enzu lɛɛbi o ma wu mu luzɛ la Ukpo iduma, 10 o zɔngɔma wu ma te uwu gba e koko a ŋɔ mu kenzugwu unga ɔtɛpu unga o ya nga te kenzugwu unga woshi umba kwoya indama awu le, akwɛyi izele i wombo mo la kenzu iyama meka iyi kiya ingyi ki wo onzu ele.

11 Tabɔkɔ u nda kwoya ele a ki Opita mbala Ɔzhɔnu ma kpakiri, akwɛyi izele i yi enzu mo lɛɛbi akwɛyi o fye mu ɛnya irima o gba mu Okepe uwu Ɔsɔlɔmɔnu mbaa bɔkɔ Opita mbala Ɔzhɔnu o yi le. 12 kwuyengwu Opita a ma ɛlɛ, akwɛyi a za mba te: << Lunyi enzu umba Izirɛ, kwuwongu kwuwongumbe bɔkɔ ɛlɛ i shi yi izele te? Kimbe ki shi lu bɔ nzu eyi mate akwu mu ekpasu nzu mbala ɛsɛsɛ nzu gba ki shi onzu ele a zɛma le? 13 Ukpo uwu Aburamu mbala Aziki mbala Ɔzhɛkɔpu, Ukpo uwu asɔkwu nzu e shi umɛgba wu Ɔzhizɔsi inzumbɛku. Lunyi ba lu rawu lu shi te lɔ ngbɛ wu ma, lu towu mo mu idu iyi Opayileti kwuyengwu a gyite la lu wu afyima. 14 Lu towo Onzu Ɔkɛrikɛri mbala Onzu uwu Ototo mo akwɛyi lu zɔ te akwu onzu uwura, u ngbɛ enzu awu gba lu lu wu afyima le. 15 Lu ngbɛ ɔkwu uwu kwunyɔ ungwɔkpɔ ma, Ukpo ba a gbawa la iyimo mu kwuvɔ. Kinzu ki kwu azɔgɔ iyi ɛlɛ. 16 Akwu ikwu idu fulo mu ɛnyi iyi Ɔzhizɔsi gba onzu ele uwu lu yi wu, lu yewu mu imama gba a fya ekpasu le. Akwu ɛnyi iyi Ɔzhizɔsi mbala ikwu idu lu fulo mawu gba i shi ofya umbu onzu ele u bomo le kaa lunyi lɛɛbi la lu ma.

17 <<Ɛmɛnɛ mi, mi yitu te iyi lu wo awu, lu wo mu iyitumo, mate atekeyi yi o wo awu tete. 18 Ɛlɛ gba ba akwu ɔgwuzɛ uwu Ukpo a nyɔlɔ iso iyi anukenzu lɛɛbi bɔkɔ o so te Okrasi a ma inyashi. 19 Kuwo kwɔngu la lu ta mɛzhi, la lu mbwalu Ukpo kaa lɔ gbɔ yi ingbomo yi ma, Ukpo le shi yi ɛnwu igbomo, 20 akwɛyi a lɔ Ɔzhizɔsi Okrasti, uwu bɔkɔ Ukpo a ŋa wu kwuwo yi awu. 21 Mɛga Ɔzhizɔsi a ŋɔ moshi nzhii ba kwuyengwu Ukpo e shi te aa gba la iyinayina inɔngɔma, mate bɔkɔ anukenzu wu o so mekyi awu. 22 Mo Omosisi a zɔ te, <Ɔkwu Ukpo a wa la anukenzu mate Imi te meka iyi enzu yi; la lu pwa iyinayina iyi bɔkɔ e so yi. 23 Onzu uwunawuna uwu a pwa iso iyi anukenzu awu mo, o luwuma mu enzu umba Ukpo akwɛyi o ngbɛ wu ma.>

24 <<Anukenzu lɛɛbi, i na mu Ɔsamuwɛ nzhii ba umba bɔkɔ o bo mizhikembo wu, kpɛkpɛ mba o siso meka iyi kwuye kwɔlɛ. 25 Lunyi lu kwu ɛmɛ umba anukenzu mbɔlɛ mbala wa ri ogu uwu iso iyi Ukpo bɔkɔ e so e shi mɛzhi mbala umba eteyi. A za la Aburamu te, <Mu ɛdɔ ŋɔ, enzu umba kwudu kwɔlɛ lɛɛbi ɔ fya esheshi ma.> 26 kwuyengwu Ukpo e yi umɛgba wu ma mu kwuvɔ, a lɔ wu mba yi keyi ka la mbwa yi ma ka uwewe la lafya la ɔgwuzɛ uwu ira.>>