1 kwuye ungwu o mbwa te ki re mu Itili, akwɛyi Ɔpɔlu mbala enzu umba bɔkɔ o fu mbo mu ugu ugyi kyaa o ra mba o shi u to keyi uwu asozha uwu bɔkɔ o ya wu te Ɔzhuliyɔ awu, uwu bɔkɔ akwu u to keyi uwu asozha oderi ukpɛnyi uwu uzhi uwu Ɔgɔsutu awu. 2 Tabɔkɔ ki fye mu kwoda ungwu embyi mu Adiramitiyɔ ungwu kwu gyi te lakwu sama kwu so mɛzhi iyi Eshiya mba bɔkɔ o bɔ ada iyi embyi mɛzhi awu. Arisitaku,onzu uwu Omasedoniya uwu bɔkɔ a wɔ mu Otesalonika, e yi mbala nzu.

3 Mu eyilama, ki bo mu Ɔsayidɔ akwɛyi Ɔzhuliyɔ e wo Ɔpɔlu iyeshi akwɛyi a nya wu ma kaa le so mba ɛmɛza wu kaa lo sa wu igɔ wu ma. 4 Ki yimo mu Ɔsayidɔ mo kwokpo kwu gama mɔmɔ, ki fula nzhii ba ki bo mu kutashi ungwu Ɔsapurɔ kwongwu kwokpo ku yi mɔmɔ mo. 5 Tabɔkɔ ki sa risu ma, ki bo mu kuko ungwu Osilisiya mbala Opafiliya, akwɛyi ki kalama mu Omira mɛzhi iyi Olisiya. 6 Mɔmɔ u to keyi uwu asozha, a ma kwoda ungwu Alɛkizanda ungwu kwu sheye mu Itili akwɛyi e lo nzu ma ngwu. 7 Ki to afyi gyɔɔ ki yi mu luzɛ zee, nzhii ba ki ka kɛlɛ mbala kwuse ungwu Osinidu. Tabɔkɔ kwokpo kwu nya nzu ma mo, akwɛyi ki zɛ ki ka mu kutashi ungwu Okiriti ungwu bɔkɔ kwu shi eyi mu kwuse ungwu Ɔsalimɔ umba bɔkɔ kwokpo kwu yi mo awu. 8 Ki gbo obirigo mu kwoda ipɛma ki zɛ mɛmba iyi risu nzhii ba ki bo mu kizɛ ingyi bɔkɔ o ya ngyi te Kizɛ Ingyi isama, kɛlɛ mbala kwuse ungwu Olasiya.

9 Ki ngbɛ kwuye gyɔɔ mɔmɔ, kinzu ba ki pɛ kwoda ki ka keyi fo mo kwokpo kwu gama, kwɔfyi ungwu Odumudumu uwu Ingbomo igbɔma ba kwu pikama a, akwɛyi Ɔpɔlu e lo mbo ilutu malu, a za mba te, 10 <<Ɛmɛza mi, mi mate ki fye kumbɛ ungwɔkwu mu luzɛ ndɔlɛ gba ki bɔkushi te ki shekeyi. Ɛlɛ i nya la itomo iyi kwoda mbala ewulo mbala kwunyɔ nzu tete. 11 U to keyi uwu asozha awu ba a pwa iso iyi Ɔpɔlu mo, a mbwalu iso iyi u pɛ kwoda mbala ɔkwu uwu kwoda o so le. 12 Kwuwongu riyi ngyɛngyi ri shoshi ka kwoda la ku rima mɔmɔ kwuye ngwu kwokpo mo akwɛyi enzu gyɔ ɔ nyama te la ki sheyimo bi, o shi egbo te umba o re mu Ofenisi ka lo rima mɔmɔ nzhii ba kwuyengwu kwokpo kwu bo mo. Ofenisi akwu riyi ingyi bɔkɔ ada iyi embyi i ri mu kwuse ungwu Okiriti ungwu bɔkɔ kwu shi eyi mu okanga uwu ononoyo mbala ɔnu uwukwoto.

13 Kwuye ngwu kwokpo ungwu kwu wɔ mu ononoyo kwu kwomu itumo bɛtɛbɛtɛ, umba o ma te kiya ingyi bɔkɔ umba o gyi le, o fya ngyi ma-a, akwɛyi o to otumutu uwu kwoda ma akwɛyi o zɛ mu kwuko ungwu Okiriti. 14 I to kwuye gyɔɔ mo akwɛyi obirikizhi uwu o ya wu te <<kwokpo ungwu ononoyo,>> kwu yimo mu kwotashi kwɔngu. 15 Obirikizhi awu a kwoda nyi mba izɛma mba bɔkɔ umba o gyite lo zɛ, kwuwo kwɔngu ki shi ɔgwuzɛ akwɛyi ki mbwalu obirikizhi awu. 16 Tabɔkɔ kwoda kwu pika kutashi ungwɛri ungwu o ya ngwu te Okawuda awu ma, ki ma inyashi gyɔɔ dɛ gba ki bi rala kwoda ungwɛri ma le. 17 Mizhikembo iyi o pyipyi u kwoda ungwɛri o lo mɛmi iyi kwoda ungwɔkwu kwɔngu, akwɛyi o ma ngwu ma mu kwukiki o sa mu kwoda ungwɔku. Kwuwongu o ri iyi iyi ɔgyɛ uwu Olibiya, akwɛyi o lafya la kwoda kaa kwokpo kwu sheye ngwu mo. 18 Obirikizhi uwakwu awu a lafya mo nzhii ba eyi ilama akwɛyi o le mu ewulo ikwuma o fumo mu embyi. 19 Ɔnu kwɔfyi ungwɔla o kwo mu apula iyi kwoda iwɔma ma mafyi mba o fu mu embyi . 20 Tabɔkɔ i to afyi gyɔɔ ki ma ɔnu mo ba ki ma elovyo mo obirikizhi ba a kyakpɔ mu itumo, akwɛyi ki wala egbo mo te ki yi kwunyɔ.

21 Mizhikembo iyi enzu mbamba o to afyi gyɔɔ o ri kiya mo, akwɛyi Ɔpɔlu e yimo a rima mu keyi mbo akwɛyi a za mba te: <<Ɛmɛza mi, gba la lu pwa iyami, ki bi yimo mu kutashi ungwu Okiriti mo; itutumo mbala ishi ɛlɛ i bi du nzu mo. 22 Kekelele, mi so yi te la lu shi egbo yi mɛzhi, mo onzu ukpukpɛnyi te e tomo mo, kwoda kɛɛkyi gba kwu kpo ɛdɔ ma le. 23 Ɔlɔgbulɔ uwu Ukpo uwu bɔkɔ akwu ɔkwu mi, uwu mi gbo wu ɔya e bo munyi mi mule mutu, 24 akwɛyi a za mi te, < Ɔpɔlu, Ki riyi mo, mo mɛga ŋɔ rima mu keyi unga Osiza, Ɔsu uwu Oroma kaa fulo ata iya ŋa; kwuwo ŋɔ, Ukpo a ma inyashi iyi enzu umba bɔkɔ o yi mbala ŋa awu lɛɛbi o kpɛdɔ ma mo.> 25 Kwuwongu ɔlɛ la lu shi egbo yi mɛzhi, ɛmɛza mi, mo mi kwidu mi fulo mu Ukpo te iyi bɔkɔ e so awu e wo yi tayi lɛɛbi. 26 Tetete mɛga kwokpo kwɔngu kwu re nzu mu kutashi ungufo dɛ.>>

27 Mutu uwu uwo la uwondo, kwokpo kwu za nzu kwu ka mu risu ingyi Omeditariya, akwɛyi mutu uweka, wa pɛ kwoda o ma te o nda la ikala fo. 28 O mondo indomo iyi embyi mo, akwɛyi o fya ata oderi la uwo ekpepo. O turu o gba keyi bwɛɛ akwɛyi o gba la i mondo mo kpɔ akwɛyi o fya ata uwo ekperendo. 29 Wa pɛ kwoda o wo iyi i yi kwodakwu bu la mu ekyi, kwuwo kwɔngu, o kwu etumutu endo o za yi mu undu uwu kwoda o fu mu embyi, akwɛyi o lɛ Ukpo tee eyi li la mba ma moloto. 30 Wa pɛ kwoda ba o gyi te lo renya lo shi kwoda, akwɛyi o vuvu kwoda ungwɛri ma o ta mu embyi, o wo kuwoyo kyamate umba o ŋɔ o ma kwoda ungwɔku ma mu etumutu mu embyi tayi. 31 Akwɛyi Ɔpɔlu a za la asozha mbala u to keyi mba te, <<Gba wa pɛ kwoda mbɔlɛ o ŋɔma mu kwoda mbala nzu mo, de ba ki fulo eyi iyi isama moloto mo.>> 32 Akwɛyi asozha o kpolo ekyikyi iyi bɔkɔ i rala kwoda ungwɛri kwɔngu ma o lu ngwu afyima, embyi o ka ngu ma.

33 Mu eyi ifumo, Ɔpɔlu a za mba te lo ri kiya. <<Mo ɔnɛnɛ akwu kwɔfyi ungu uwo la endo, bɔkɔ lu yi mu eyi ifulomo ba lu du ri kiya mo. 34 kwuwo ngwɔlɛ mi kpayi ɛshɛku te la lu ri kiya kaa la lu fya ekpasu ma, mo kiya kinyinyi te ki wo onzu ukpukpɛnyi mo.>> 35 Mizhikembo iyi Ɔpɔlu e so ɛlɛ, akwɛyi e to kwoburedi akwɛyi a gbɛlɛ ɛnyi la Ukpo mu keyi mbo lɛɛbi. A mu ngwu ma akwɛyi e shimbo o le mu irimo. 36 Umba lɛɛbi ɛnwu ika mba ma akwɛyi o ri kiya. 37 Lɛɛbi nzu umba bɔkɔ ki yi mu kwoda le, ki yi enzu ederi epo la uwekperewo la ɛrɛnyi (276). 38 Tabɔkɔ lɛɛbi mba o mbwa kiya irimo, umbwu e do mbo mo, akwɛyi o kwu ewolo iyi ewiri o fu yi mo mu embyi kaa kwoda lakwu gyi ɔlu ma.

39 Tabɔkɔ eyi ilama, wapɛ kwoda o zɔngɔma ɛzhi ɛnyi ma mo, umba ba o ma ɔgyɛ e shi kwudu mu kuko ungufo, akwɛyi o ka amasa te, gba i wombo mo, umba o re la kwoda mɔmɔ. 40 O kpolo erimoki iyi etumutu mo, akwɛyi o lu yi afyima mu risu, mu kwuye kwɔngu pwa, o vuvu erimoki iyi bɔkɔ i rala kwɔsɔ le mo. O sele kwoda mba kwokpo kwu sheyimo akwɛyi kwu ka, kwu rima mu ɔgyɛ. 41 Kwoda ba kwu la mu ɔgyɛ akwɛyi kwu ka mɛzhi. Keyi unga kwoda ke lomo mɔmɔ akwɛyi kwoda kwu rima. Agba iyi embyi iyɛkuu i fya mu kwoda kwɔngu akwɛyi izhikembo iyi kwoda i shɛkɛ ma. 42 Asozha ba o gyi te lo ngbɛ enzu umba ugu ugyi umba bɔkɔ o yi mu kwoda kwɔngu ma kwuwongu o bo to embyi lo wɔ ma ka lo rima mo. 43 U to keyi uwu asozha mbamba ba a gyi te la wala Ɔpɔlu ma la reyi akwɛyi a anya ma te asozha mbamba lo ngbɛ enzu umba ugu ugyi ma mo. Uwu ba a za la enzu umba bɔkɔ o to embyi ego te lo ta membyi keyi ka lo to embyi lo wɔma. 44 Enzu mba bɔkɔ o shimo awu ba a za mba te lo yi ewo mu abɛ mbala asa iyi kwoda ka lo sama lo so mu kwudu. Mi womo ɛlɛ, onzonzu a wɔma moloto.