1 Onzu uwufo uwu o ya wu te Ananayasi mbala oko wu, Osafira, umba tete o ya kizɛ mba ingyifo ma. 2 Mu nyama iyi oko wu akwɛyi eduwo a gyi yi ma e she la ɛnwu akwɛyi e to iyi bɔkɔ ishimo a ka la Wa zɛ ilɔ.

3 Akwɛyi Opita a za wu te <<Ananayasi, ŋɔ wo la bɔkɔ ŋɔ nyama onzu uwoyi a nyɔlɔ ŋɔ egbo mo bɔkɔ ŋɔ kyoro Kwundu uwu Ukpo ma akwɛyi ŋɔ shi eduwo iyifo mo la ɛŋɔ meka iyi eduwo iyi ŋɔ ya ɛzhi ma ŋa? 4 Kizɛ ngyɛngyi akwu ingya ŋa gba ŋɔ ya ngyi ma le mo re? Bɔkɔ ŋɔ ya ngyi ma awu, eduwo akwu iyaŋa mo re? Kimbe ki shi ŋɔ bi egbo iyi kiya ngyɛlɛ te iwomo? Ukpo gba ŋɔ kyoro wu mo le, mo akwu onzu mo.>>

5 Tabɔkɔ Ananayasi a pwa iso ɛlɛ, akwɛyi e lo wɔrɔ mɛzhi akwɛyi e kpomo. Enzu lɛɛbi umba bɔkɔ ɔ pwa kiya ingyi ki wole, iyi iyɛku i wombo mo. 6 Akwɛyi abulɛgɔ alugbaga o bo to ukpɛzhi ma, o wuwu mo, akwɛyi o to wu o kawa kwudu o ko kpa wu ami. 7 Mizhikembo iyi awa ɛla akwɛyi oko wu Osafira e ngyi; e yitu kiya ingyi ki wo ɔnu wu mo. 8 Opita e yo wu te, << So mi, ɛlɛ gba akwu abwa iyi kizɛ ingyi uŋɔ mbala ɔnu ŋɔ lu ya ngyi ma le?>>

A zɔ te, <<Ee eduwo ngyi gba i ŋawu.>>

9 Akwɛyi Opita a za wu te, <<Lu wo la ba lu nyama kaa lu pwa Kwundu uwu Ukpo ma te? Yese! Enzu umba bɔkɔ o kpa ɔnu ŋɔ ami awu ɔ ŋɔ le mu kenzugwu; uŋɔ tete abulɛgɔ o to ŋɔ oo wa ŋa kwudu.>>

10 Mɔmɔɔmɔ e lo wɔrɔ mɛzhi mu idu iyi Opita e kpomo. Akwɛyi abulɛgɔ mbɔlɛ bɔkɔ o fyemo o du wu ukpɛzhi, o to wu o kawakwudu akwɛyi o pwuwu mo kɛlɛ mbala ɔnu wu. 11 Iyi iyɛku i yi wa mbwalu lɛɛbi ma mbala enzu umba o pwa apula iyi i wo le.

12 Wa zɛ ilɔ o wo apula iyi amɛ mbala iyi izele gyɔɔ mba enzu. Wambwalu lɛɛbi o koko o kpala ɛlu mu ɔtɛpu uwu e yi mu okepe uwu Ɔsɔlɔmɔ awu. 13 Enzu gyɔɔ umba bɔkɔ akwu wa mbwalu mo o wuyi iyi ikyo mbala Wa zɛ ilɔ , tetete Wa zɛ ilɔ o yi igba mu eyi mbo. 14 Tetete eko mbala anzɔnu gyɔɔ o nyama o mbwalu Ɔkwu akwɛyi riba ingyi wa mbwalu ri kyomo. 15 Kwuwongwu apula iyi wa zɛ ilɔ o wo, enzu o bo la enzu umba efya o shi mbo mu ɛkyɔ, o shi mbo mu ɛgwuzɛ kaa gba Opita a kaka, kwundu wu kwu zɛ ma mba kaa kwu bo mbo enzu efya ma. 16 Enzu gyɔɔ umba o wɔ mu ese ɛkɛlɛkɛlɛ mbala Ɔzhɛrusalɛ o bo la enzu umba efya mbala umba o yi ɛndu iyira akwɛyi kpɛkpɛ mba efya mba i bomo.

17 Akwɛyi obwoshi uwakɔ mbala enzu wu lɛɛbi umba o yi mu odudu uwu Asadusi o wo rise ingyi Wa zɛ ilɔ . 18 O yi Wa zɛ ilɔ ma akwɛyi o fu mbo mu ugu ugyi. 19 Mutu ɔnwu ba ɔlɔgbulɔ uwu Ukpo a wu ikwu iyi ugu ugyi awu ma akwɛyi a wala wa zɛ ilɔ kwudu. 20 Ɔlɔgbulɔ uwu Ukpo awu a za mba te <<La lu so mu ɔtɛpu kaa lu so enzu iso iyi kwunyɔ ungwepo ngwɔlɛ.>>

21 Tabɔkɔ eyi i lama, akwɛyi o fye mu ɔtɛpu, o kwo mu enzu ɛzu izɔma mate bɔkɔ Ɔlɔgbulɔ uwu Ukpo e so mbo awu.

Kwuye ungwu obwoshi uwakɔ mbala enzu wu o bo mo, o ya odudu uwu wa to keyi umba Azhu mbala Wa to keyi umba Izirɛ ma lɛɛbi. Akwɛyi o lɔma o ka mu Ugugyi te lo so lo ngyela Wa zɛ ilɔ mbamba kaa lo yo mbo eyo. 22 Tabɔkɔ adakari umba o lɔ mba ma o kama, o du wa zɛ ilɔ mbamba mu ugu ugyi mo. Akwɛyi o gba o kama o ko fu oga te, 23 <<Ki ka ki du Ugugyi te o lowu mo la wa gbomo te o rima mu lunzugu mu igbomo. Tabɔkɔ ki wu riku mo, ki du onzu ukpukpɛnyi te mɛmi mo.>> 24 Tabɔkɔ u to keyi uwu wagbomo umba ɔtɛpu mbala u to keyi uwu ebwoshi o pwa ɛlɛ, amasa mba ikpashaa akwɛyi o le mu egbo ibyima iyi i bi nyɔ mizhikembo iyi ɛlɛ.

25 Akwɛyi onzu uwufo e bo a za mba te, <<La lu yese! Enzu umba lu fu mbo mu ugu ugyi awu ɔ ri mu Ɔtɛpu mu enzu ɛzu izɔma.>> 26 Tabɔkɔ ɔ pwa ɛlɛ, u to keyi uwu wagbomo mbala enzu wu o ko ngye la Wa zɛ ilɔ mbamba. Ɔ kpa mba mɛga mo kwuwongu o wiyi te enzu o bo kpamba ekyi.

27 Tabɔkɔ o bo mbo mo, o shi mbo o rima mu idu iyi wa to keyi umba Azhu kaa obwoshi uwakɔ le yo mbo eyo. 28 A za mba te <<Ki shi yi ɛrama te la lu zɔ ɛzu mu ɛnyi ɛlɛ fo,>> lunyi ba lu pwa iso nzu mo, lu fula Ɔzhɛrusalɛ ma lɛɛbi mbala iso iyi onzu ele. Lu gyite enzu lɔ ma ungwoyi nzu meka iyi lukwu undu onzu ele.>>

29 Akwɛyi Opita mbala wa zɛ ilɔ umbafo o gba opwu te: <<Ukpo gba akwu mɛga kaa la ki pwa iya wu le, akwu onzu mo! 30 Ukpo uwu asɔkwu nzu e yi Ɔzhizɔsi ma mu lukwu, uwu bɔkɔ lu sa wu karende mu kwuwɛyi ngwu lukwu akwɛyi lu ngbɛ wu ma. 31 Ukpo e shi Ɔzhizɔsi inzumbɛku kaa la ŋɔma mu kwuwo ngwungyi wu te akwu umɛ uwu ɔsu mbala Usama, kaa le shi Izirɛ lo kwu ira ɔsu kaa lo fya igbɔma iyi ingbomo mbo. 32 Kinzu ki kwu azɔgɔ iyi apula ɛlɛ, ikyo Kwundu uwu Ukpo tete, iyi bɔkɔ Ukpo e shi enzu umba bɔkɔ o mbwalu iso wu.>>

33 Tabɔkɔ odudu uwakɔ uwu wa to keyi umba Azhu o pwa ɛlɛ, amba o wombo mo akwɛyi ɔ gyite lɔ ngbɛ wa zɛ ilɔ ma. 34 Akwɛyi Ofarisi uwufo uwu o ya wu te Ɔgamaliyɛ, u zɔ ɛzu iyi ɛrama iyi Omosisi, uwu enzu lɛɛbi o lowu mo awu, e yimo a rima mu idu iyi odudu uwu wa to keyi umba Azhu akwɛyi a zɔ te lo wala wa zɛ ilɔ mbamba kwudu kaa lo shimbo kwuye bwɛɛ dɛ. 35 Akwɛyi a za la odudu uwakɔ uwu wa to keyi umba Azhu te: << Enzu umba Izirɛ, la lu ngbɛndu mu kiya ingyi lu gyite la lu wo enzu mbɔlɛ le. 36 Mu afyi iyi kembo Otewudasi a wɔ, e to ɛnwu te akwu kiya, enzu umba bɔkɔ o mbwalu wu o yi ederi endo mo. Bɔkɔ ɔ ngbɛ wu ma enzu umba o mbwalu wu lɛɛbi o rima akwɛyi ɔ pwa akpa mba fo. 37 Mizhikembo wu, Ozhuda uwu Ogalili a wɔ tete mu afyi iyi enzu iwama.Uwu akwu u to keyi uwu enzu umba o wo ovyo mbala watekeyi. Uwu tete o ngbɛ wu ma akwɛyi enzu umba ɔ mbwalu wu lɛɛbi ɔ kpashaa. 38 Kwuwongwu ɔlɛ mu iso ɛlɛ, Imi mi ta yi amasa te: La lu shi enzu mbɔlɛ bi! La lu lu mba afyima lo sheyimo! Mo gba iwomo iyamba ɛlɛ a kwiyi onzu, i shirimo mewo. 39 Ishi gba i ngyi mba Ukpo, lu do te lu nyi enzu mbɔlɛ ma mo; de ba lu ŋu kiri ewa mbala Ukpo!>>

wa to keyi mbamba o nyama la iso iyi Ɔgamaliyɛ. 40 O ya wa zɛ ilɔ ma akwɛyi ɔ kpa mba ikpa. O shi mbo ɛrama te lo so iso mu ɛnyi iyi Ɔzhizɔsi fo akwɛyi o lu mba afyima ɔ ka ma.

41 Wa zɛ ilɔ o lafya la odudu uwakɔ uwu wa to keyi umba Azhu, la ɔnyɛ imuma te umba Ukpo kyo o wamba tete mu inyashi imama kwuwongu ɛnyi iyi Ɔzhizɔsi. 42 Kwɔfyi kwɔfyi wa zɛ ilɔ o kpakpɛ mu ɛzu izɔma mbala anu itama iyi ɛza iyesheshi mu ɔtɛpu mbala agba agba te Ɔzhizɔsi gba akwu usama le.