1 Bila de ni minya: Mirikisi ki ntani yi na ka? Yi e ma yomuna ba! E ni ni ma nseminji Izireyila la, juriya Abireyi, dege arishiya ni Benjamin. 2 Mirikisi ki ntani yi, de e zabi tun pari ba. Ku shina mbode takada Mirikisi pala yiride anebi Iliya yi lepa a kiya ni Izireyila nkye: 3 <<Obagizi, su kisa nsu anebi ke su kwa juru anya munka sedeka ke; E ni dandaa na ni rigye, su kwa bila de su kisa ni.>> 4 Mina ma keleba de Mirikisi yi anebi Iliya nkye kona? E keleba nkye, <<Ntani dupu bokwe na e ni Mirikisi ni sa su a keteri worede su dure bowuta obagizi ni Baa ba.>> 5 Yomuna, A kwanki mu Mirikisi e rigye worosu ntani de e zabi te anya ni aniyeri yi. 6 Zabi Mirikisi e ma te anya aniyeri la, e ma te turiki ANKI de nsebeki yi na bo; sobon nde zabi ni Mirikisi e ma sobon ANKI ni ntani na, aniyeri mu e ma aniyeri gaskye na gagaba.

7 Mina mua pala? Mbode ntani Izireyila sua bila su samu ba, sede worosu su piri de Mirikisi zabi kin na su samu. Ririgye su yi tori kiya. 8 Kankye yiride e ma a rubutu a siki beta Mirikisi nkye,

<<Mirikisi ba su aworo rishi shina,

su ma ni ndani sede su ma geni ba

su ma ni kuni sede su ma zi beta ba,

ari kuzukam.>>

9 E shiya sa anebi Dowuda nkye,

<<Bila de buki su ema toroko ba su;

e ma mbo sa su puari nja e sa de su yi su poro!

10 Bila de ndani su e yi makapi de su geni anya ba,

e sa su tonkori sobon ngala a kwanki guru.>>

11 Ni kwa minya: De ntani Izireyila yi lepi ari su pauri mu sua sakye dege kuma ba naka? Yi! E ma yomuna ba, sobon lepi ntani Izireyila, sa Mirikisi sila worede su ma Yawudawa ba de e sa ntani Izireyila su yi sihinwuta su. 12 Sede nde lepi de ntani Izireyila yi zo ni anabirika nyowa a durinya, pauri su zo ni anabirika nyowa ba worede su ma Yawudawa ba, yaya na yaa karikye nde guru ntani Izireyila su juyi zo anya Mirikisi!

13 Kuzukam mmayi beta nja ku de kuma Yawudawa ba. Tunde Eni ni ma yaamanki Yesu na te nja worede su ma Yawudawa ba, Na dege dolo ni ANKI na de Mirikisi ba ni. 14 Ni yi yomuna ko na yi yaa sa ntani Izireyila su zi anwashi a siki dishiya su ari Mirikisi e sila ni worosu asu. 15 Sobon nde ki de Mirikisi yi ntani Izireyila ma turiki ni shiri na de ntani su juyi biya Mirikisi de su ma oboki yi. Yaya na yaama, kwanki de Mirikisi keleba su, yaama kankye nsude muntu e kwa dege nleyi naka bo? 16 Nde keteri buredi ni mbosi bikiya ni pari ki munka yi ba Mirikisi, se guru mbosi e ma na yi na du; yomuna nde ku munka Mirikisi ririnya ntasi, guru yaya nani ntasi sua ma na yi.

17 Ntani Izireyila su ma kankye ntasi zetu de nsu bikiya nunkwa, sede Mirikisi sala nani ntasi zetu ni sanwa, e domuna su amere. Oku worede kuma Yawudawa ba kuma kankye yaya nani ntasi zetu ni sanwa la, oku na Mirikisi gama ku nja tutiri ntasi mu worede dege anya su na kwa samu anabirika ntani Mirikisi. 18 Sobon yomu, kede ku dege dolo nkye ku pi worede su ma Yawudawa. Nde kuma dege dolo, se ku shina nkye: Tutiri ntasi na e ma keleba mbosi anya yaya nani ntasi ba, sede yaya nani ntasi na su ma keleba mbosi anya tutiri ntasi. 19 Kwa yi yaa pala nkye, <<Mirikisi sala yaya nani ntasi ni na de e yada Ni nja tutiri ni.>> 20 Ku pala gaskye. Sede sobon su ki beigaskye la Mirikisi butu su bila siki tutiri ni, oku kuma te anya beigaskye nja Kiristi la Mirikisi gama ku nja tutiri ni. Sobon yomu kede ku dege dolo, sede ku yi womba. 21 Sobon nde Mirikisi bila yaya nani ntasi ni de osu na su ma aseli tutiri mu ba, oku du Mirikisi yaa bila ku ba.

22 Sobon yomuna mu shina nkye Mirikisi ma nsu aniyeri nja nsu poro ntani la: Mirikisi poro Yawudawa de su ki beigaskye, sede e nana ku aniyeriyi, nde ku sigeba ni zunwa a siki aniyeriyi. Sede nde ku sigeba a siki aniyeri Mirikisi ba, oku ma du yaa butu ku bila siki tutiri ni. 23 Nde ntani Izireyila su sigeba ki beigaskye su nja Yesu Kiristi ba, Mirikisi yaa gama su nja tutiri ni, sobon Mirikisi e man sori de yaa sakye kuma nsu gama nja tutiri ni. 24 Oku worede kuma Yawudawa ba, Kuma kankye yaya nani ntasi zetu ni sanwa, de nsu bikiya sala e yi se e domuna yi amere nja kutiri ntasi zetu de nsu bikiya ni nunkwa, Mirikisi yi yomuna kode nkye tutiri ntasi ni e ma na ku aba, tunde Izireyila osu na su ma kankye tutiri ni ntasi de nsu bikiya nunkwa, yaama ni soki de Mirikisi e kuma yaya nani ntasi ni de e sala a siki kutiri ntasi zetu ni!

25 Yayuwa na, mma bila de ku shina gaskye mbode ma a boyi, de kede ku la kiya ku kuma nsu simi na ba: Ntani Izireyila su yi tori kiya su ki beigaskye ari guru worede su ma Yawudawa ba su beigaskye nja Yesu. 26 Yomuna Mirikisi yaa sila ni guru ntani Izireyila, yiride e ma a rubutu a siki beta Mirikisi nkye:

<<Nsu sila yaa zo dege Siyona;

yaa juyi guru ntani juriya Yakubu dege lepi su.

27 Da mu e shiya ma seda na nja su

a kwanki de Ni yape lepi su.>>

28 Ntani Izireyila su ma oboki geba Mirikisi, sobon su ki keleba nabari kyakyawu ni Mirikisi e ma sobon moriya ku la; sede a kiya ni zabi de Mirikisi yi, su ma worede Mirikisi yaa so la sobon ni nsu adaatolo asu, 29 sobon kyawuta ni Mirikisi yaa taba shenja dishiya yi a kiya worede e zabi nja worede e sa su anabirika. 30 A kwanki de bise oku worede kuma Yawudawa ba, ku yi tori kiya nja Mirikisi; sede kuzukam ku samu aniyeri Mirikisi sobon tori kiya ni Yawudawa. 31 Yomuna Yawudawa su ma nsu tori kiya kuzukam du de osu ma su samu aniyeri Mirikisi de e nana ku nshi du. 32 Mirikisi sa guru ntani su ma kankye yaya jaru sobon tori kiya su Mirikisi yi yomuna de e nana aniyeriyi ba su guru.

33 Mina mua gonta yi nja ondum ni yowa simi Mirikisi nja shina yi!

ondum shina Mirikisi nseda yaa shina yi guru ba,

nseda yaa yi yaa pala mbode Mirikisi yaa yi guru ba!

34 Beta Mirikisi pala nkye, <<Waa shina dishiya Obagizi?

Waa yaa yiya beyi showura?>>

35 <<Waa taba ba Mirikisi mbodaa,

de Mirikisi e kuma yi nshi?>>

36 Sobon Mirikisi na ki la guru mbo yomuna guru mbo su ma sobon ni Mirikisi la.

Bila de yobo nja girima su te nja Mirikisi ari gbogbogbo! Ema yomu.