1 Yayiwa na, e ke de ka yi nseda taala? Ki ma yi mbodaa de ka pala ba, e ke ki ma waana. sobon nde ka yi nseda shiriya, se ka yi mbode nse ni mayi. ka yi kiya ke taala du naka. 2 Mu shina nkye taala Mirikisi ema gaskye la nde e te yi ntani worede su yi yiri mbo mu shiriya. 3 Sede e ke, Oboki na, ka yi mbode ka yi ntani shiriya a kiya e yi! ka yi tunani nkye ka sila dege taala Mirikisi? 4 Ko ku nene totolo toseyi Mirikisi, nja rishi anwashi yi, nja ankuri. Ku shina Mirikisi ma nsu kadishiya la, sobon yaa kokori de ku juyi bila lepi. 5 Sede sobon lesa zi ke, ki ma tala nkyake totolo anwashi Mirikisi nja gangasi ni taala yi yaa pelesa. 6 Sobon Mirikisi Yaa ba kowoni nse nani wuta mbode e yi. 7 Worosu su ntani su sigeba ni yi mbo kyakyawu, sua bila dereja, girima, nja leyi; Mirikisi yaa ba su leyi ni gbogbo. 8 Sede woron su ntani sua so nkisu nja sua ki mbode ema gaskye, sua yi mbode yi kyawu ba, a kiya su Mirikisi yaa yi anwashi soseyi. 9 Genbeki nja ngala yaa ma guru worede su yi mbo mumungu ko ema Yawudawa su ma ni pari tukuna worede su shina Mirikisi ba. 10 Sede Mirikisi yaa beyi dereja, girima, nja selema ba guru worede su yi mbo kyakyawu, Yawudawa ma ni pari tukuna worede su ma Yawudawa ba. 11 Mirikisi yaa yi shiriya ni nana bombom ba guru amu muma yiri daa la. 12 Ntani de su ma Yawudawa ba su man doka Musa ba, su yi lepi su beeta dege doka ni Musa Yawudawa su man doka Musa; su yi lepi nja sua yi su shiriya ta doka Musa. 13 Ba sobon de ntani sua zi doka Musa na su man kyakya anya Mirikisi ba, sede ki man nsu yi mbode doka Musa e pala nkye ki yi. 14 Ntani de su man Yawudawa ba su mani doka ba; sede su yi mbode doka e pala, osu na su ma doka kiya su, kode nkye su mani doka Musa ba. 15 Tunde yiri zunwa su nana nkye su man doka rubuta a dishiya asu, tunani asu du nana su mbo mu ma gaskye la, tunde a kwanki worosu su dishiya su yaa ba su lepi nja kwanki daa yaa ba su lepi ba. 16 Kankye yiride de Ni gye ku nabari kyakyawu, Yomuna yaa ma nana de Mirikisi te anya Yesu Kiristi yaa yi shiriya mbode e ma a boyi a dishiya ni guru ntani.

17 Mina kwa pala game nkyaku? Kwa sukwa nkyaku nkye kuma Yawudawa; ku dengela ni doka Musa nja kwa dege dolo a kiya Mirikisi. 18 Ku shina mbode Mirikisi yaa bila de ku yi, yomuna kuma ni shina doka Musa yiride kwa zabi mbode ma kyakya; 19 Ki yeda nkye kuma nsu nana makapi turiki la, kuma kankye asikye te nja worede su ma a siki dopuwa, 20 nsu kokoyi Odundu, nja male nsu worede shina mbodaa ba. ku nkye a siki doka Musa ku shina mbo guru nja gaskye. 21 Eke nsu kokoyi worosu su mina sa de ki kokoyi kiya ke ba? Ki gye ntani nkye, <<Kede su yi bolowa eke ki ma yi bolowa bo? 22 Ki ma gye ntani nkye, <<Kede su kwana nja mata nseda ba>> eke ki ma kwana nja mata nseda bo? Eke de ki ma zi kazanta ni nsu boka, ki ma yi bolowa dege kunguni boka bo? 23 Eke de ki ma dege dolo nkye ki shina doka Mirikisi, sede ki ma ba Mirikisi kumnya te anya kariya doka Mirikisi bo? 24 Yiride takada Mirikisi pala nkye, <<Sobon oku ntani Yawudawa na ntani de su ma Yawudawa ba sua pala beta saba a kiya Mirikisi.>> 25 Nde ki ma biya doka Musa, yanka ku e mani moriya naka, sede nde ki ki biya doka Musa ba ema kankye su yi ke yanka ba naka. 26 Nde ntani de su ma Yawudawa ba, worede su yi su yanka ba, nde su biya doka Mirikisi, Mirikisi yaa geni su kankye ntani de su ma nsu yanka naka bo? 27 Worede su ma Yawudawa ba sua yi ku taala sobon ku keriya doka, kode nkye ku manshi a rubuta nja su yi ku yanka; sede ku biya doka Mirikisi, kode nkye su yi yanka nki ba. 28 A beyi guru mbo, waa ma Yawudawa ni gaskye, waa yi yanka ni gaskye? Ba nsude yi yanka ni nki nja alama ni woze na ema Yawudawa ba. 29 Sede Yawudawa ni gaskye e shiya ma Yawudawa siki dishiya nja yanka ni dishiya te anya ANKI ni Aworo Mirikisi ba ni doka de su rubuta naba. Yiri ntani mu yobo su e butu anya ni nsebeki naba, sede e butu anya ni Mirikisi la.