1 Mina mua pala, a kiya Abireyi de e ma Adaatolo mu, de e ma Adaa mu ni siki nki? Mina e gane a kiya beta beigaskye? 2 Nde Abireyi e ma nse gangasi a geba Mirikisi te anya mbode yi, e ma ni mbode dege dolo a kiya e yi, sede a geba Mirikisi na yaa yi ba. 3 E ma rubuta a siki takada Mirikisi nkye, <<sobon beigaskye ni Abireyi Mirikisi, leyi e ma nse gangasi.>> 4 kuzukam nde nsebeki yi ANKI sua biya e yi nani wuteyi, e ma kyawuta naba, e ma mbode yi ANKI a kiya e yi la e keleba. 5 Sede worede la leyi su jaa Mirikisi, ba ni ANKI su ba, su ma nsude sadishiya ni Mirikisi de sa su ma mere lepi, beigaskye mu la Mirikisi yaa kone de e sa ntani su ma mere lepi nja shi. 6 Mbode Dowuda e nupi naka de yi beta a kiya perisiki nsude Mirikisi keleba yi ma nse gangasi, ba sobon delili ANKI de yi naba.

7 <<Anabirika ma nja nsude su yape yi lepi ni ki biya doka,

nsude Mirikisi yape lepi yi.

8 Nsu anabirika na nsude Obagizi yaa kikiriga lepi mbode yi ba!>>

9 Anabirika de Abireyi pala ema sobon Yawudawa na kede ko nzun worede su ma mere yanka? Yi! mu pala mbode e ma a rubuta a siki takada Mirikisi de nkye,<<Abireyi yeda ni Mirikisi, sobon beigaskyeyi Mirikisi keleba yi e ma nse gangasi.>> 10 Woni kwanki na mbo mu paru? a kwanki de e yi yanka la ko kwanki de e yi yanka aba? e ma kapi yanka, ba a beyi yanka aba. 11 Abireyi yi yanka beyi de su sukwa yi la, yanka yi e ma alama de e manshi sobon ni gangasi yi Mirikisi yeda nja shi kapi de e yi yanka. Sobon yomuna Abireyi e ma Adaa ni ntani guru de su beigaskye nja Mirikisi, kode su yi su yanka ba. 12 Yomuna Abireyi e ma Adaa ni worede su yi su yanka, sede sua biya gangasi de Abireyi biya kami de e yi yanka.

13 Kwanki de Mirikisi yi Abireyi anikowori nkye yaa beyi guru durinya de su ma na yi, Mirikisi yi yomu sobon de Abireyi biya doka naba. Sede sobon e beigaskye la Mirikisi sukwa yi nkye ema nse gangasi. 14 Nde mbode Mirikisi yi anikowori de beyi sobon worede biya doka Musa la, beigaskyemu ema mbodaa ba, yomuna anikowori Mirikisi ema wopi aka, 15 sobon doka Musa zo ni anwashi Mirikisi; sede anya de doka te ma ba, lepi ma ba naka. 16 Nkaayom Anikowori e ma a kiya beigaskye la, da mu e ma sobon aniyeri Mirikisi de beyi ba guru juriya Abireyi, ba worede biya doka na kin ba, sede worede beigaskye yiride Abireyi yi. Sobon Abireyi e shiya e ma Adaa mu ni aworo guru. 17 Yiride e ma a rubutu a siki Takada Mirikisi nkye, <<Ni sakye de ki ma Adaa ni juriya nyowa.>> Sobon yomu anikowori e man kyawu anya ni Mirikisi, nsude Abireyi beigaskye nshi, Mirikisi de yaa dege worede muntu a kumsha nja nsude yaa sa mbode su ma ba su ma. 18 Abireyi beigaskye e kwa sa dishiya, kode nkye e mani delili sa dishiya ba, nzun yomu e ma <<Adaa ni arishiya nyowa. yiride Takada Mirikisi pala nkye, <<Juriya ke sua ma nyowa kankye kemu.>> 19 Se kwanki ni Abireyi e kusa ni shekera deri; sede beigaskyeyi e kisa e yi nki ba, kode e man sori gagaba sobon sopa, nja mata yi Saratu de bise kwanki de e kamata e yapu yaa. 20 Abireyi ema dishiya bi ni anikowori de Mirikisi yi ba, sede beigaskye yi ja yi sori; e yobo Mirikisi. 21 Abireyi ma ni tebeshi ni anikowori de Mirikisi yi. 22 E shiya sa sobon beigaskye ni Abireyi, <<Mirikisi yeda nkye e ma nse gangasi la.>> 23 Kelima de nkye, <<Abireyi ma nse gangasi>> ba su rubuta sobon e shi dandaa e yi naba. 24 Sede e ma rubuta sobon omu na du de Mirikisi yeda de muma ntani gangasi, omu de mu beigaskye nja Mirikisi de dege Yesu Obagizi mu a kumsha. 25 Sobon lepi mu na Yesu muntu, E kwa dege man leyi de e sa mu muma mere lepi anya Mirikisi.