1 Nkayomu, yayuwa na, Mma yi ologba ku, sobon yowa ni aniyeri Mirikisi ku munka nki ku kankye sedeka nsu leyi, nsuseki nja mbo keleba anya Mirikisi, da mu na e ma kyakyawu turiki de kwa bowuta Mirikisi ngaskye. 2 Kede ku yi zunwa yiri ni ntani durinya mu, sede ku bila de Mirikisi e shenja ku de kuma sabuwa a siki dishiya ku. Yomuna kwa shina mbode Mirikisi yaa bila de ku yi, de ma kyakyawu, nja mbode jima yi, nja mbode ema dedeta nupi yi.

3 Sobon aniyeri de Mirikisi yi ni nshi mma ja ku kuni: Kede ku yi tunani pi yiride e kamata, de ka yi yomu, sede konse yi ankeli ni yiride e ma kone kiya yi, kyakya yiri beigaskye de Mirikisi beyi. 4 Mu mani ganga nki nyowa a siki nki daakaka, guru ganga nki mu mani ankisu mbombom de su meyi, 5 yomuna kode mu man nyowa a siki Kiristi sede mu ma nki ndandaa la, kowoni daa mu muma ganga nki yayiwa mu la. 6 Kode mu man kyawuta kyakya yiri aniyeri de Mirikisi yi mu nshi. Nde kyawuta mu e ma ni pala mbode yaa paru a geba la, se mu pala mbode yaa paru a geba kyakya yiri beigaskyemu. 7 Nde kyawuta mu e mani yi ANKI la, se mu yi ANKI; nde kyawuta mu e mani kokoyi ntani la se mu kokoyi ntani kyakyawu; 8 nde kyawuta mu e ma de mua ja ntani sori guyam la, se mu ja su sori guyam; nde kyawuta mu e ma de mua sua ntani nto la, mu sua su nto kede mu yi nonwa ba; nde kyawuta mu e ma de mua ma kamkiya la, mu yi kamkiya ni dishiya kyakyawu; nde e ma de mua nana toseyi la, se mu yi ni perisiki.

9 Ema dole na de so ku ema gaskye. Mu ki mbode ma mumungu; mu sigeba ni yi mbo kyakyawu. 10 Mu munka akiyamu te nja nkyamu ni so yayuwa. Konwawa e yi memeri ba yayiwa e yi girima pi kiya yi. 11 Kede lesa memeri nja kede kuma okyabo. Sede ku bowuta Obagizi ndishiya daa. 12 Ku yi peri siki a siki ni sa dishiya ku, ku kadishiya a siki ngala ku, kuma nsu yi lepa kon kwanki. 13 Ku laba mbode ku manshi nja nsubiya Yesu worede su manshi ba. Kuma nsu keleba bakwe nnani bi.

14 Ku sa worede sua sa ku Genbeki anabirika; ku sa su anabirika kede ku gye Mirikisi de yi su baki ba. 15 Ku yi peri siki nja worede su meyi peri siki; ku yi anwe nja worede su meyi anwe. 16 Ku yi zunwa selema nja konwawa. kede ku ma nsu dege kiya, sede ku la kiya ku kuma oboki worede ntani la su ma baki mbodaa ba. Kede tunani ku ema kankye ku pi ririgye ntani.

17 Kede ku lama mungu nja mumungu mbo. Ku yi kokori de ku yi mbode yi kyawu a ndani konwawa. 18 Ku yi guru kokori ku, nde yaa yi kyawu, ku yi zunwa selema nja konwawa. 19 Yayuwa na, kede kuma nsu lama mungu mbo, ku bila de Mirikisi e lama nkiya yi a siki anwashiyi, sobon e ma rubutu a siki beta Mirikisi nkye: <<E ni Mirikisi la Na lama mbode nseda yi ke nshi de e ma kyakya ba; Na lama ku nshi,>>. 20 Yiride e ma a rubutu a siki takada Mirikisi nkye:

<<Nde oboki gebake e ma zi nyunwa, ki ba su mbosi de e si;

nde oboki gebake e ma zi kishi riki, ki beyi riki de e sha.

Te turiki yomu, ki ma tala su angoshi wuta a kiya aka.

21 Kede ku bila mungu mbo e sha kiya ku, sede ku shakiya mungu ni mbo kyakyawu.