1 Nkaayom, poro ma a kiya worede su ma ni Yesu Kiristi gagaba. 2 Sobon doka ni Aworo, de ba mu leyi a siki Kiristi Yesu, butu ni dege doka lepi nja muntu. 3 Sobon mbode doka yi yaa ba, sobon arinya nki nsebeki yi sori de yaa yi ba, Mirikisi yi. E juru lepi a siki nki nsebeki te anya saka Yaa yi, de zo ni nki kankye ni nsebeki, de e bebeta sori ni lepi. 4 Mirikisi yi yomu na sobon guru mbo gangasi de doka yaa bila yaa e sika asikimu, omu de muma yi zunwa a siki arinya ni nki nsu lepi ba sede a siki Aworo Mirikisi.

5 Worede su meyi zunwa a siki arinya nki nsu lepi, su ma sa tunani su a siki mbode nki yaa bila; sede worede su meyi zunwa a siki Aworo Mirikisi sua sa dishiya su a siki mbode Aworo Mirikisi ma bila. 6 Dishiya ni nsu lepi yaa ema mumuntu; sede worede meyi zunwa a siki Aworo Mirikisi sua mani leyi nja selema. 7 Ntani su ma oboki geba Mirikisi nde su bila arinya dishiya ni nsebeki shakiya su; sobon sua taba biya doka Mirikisi ba, gaskye naka sua taba biya doka Mirikisi ba. 8 Worede su mayi zunwa a siki arinya nki sua taba jima Mirikisi ba.

9 Sede oku ku mayi zunwa a siki arinya nki yiride e sa ku naba; sede kuma yi zunwa yiride Aworo sa ku de ku yi, nde ma gaskye, Aworo Mirikisi ma a siki ku. Du nsude mani Aworo ni Kiristi ba, e mani Kiristi ba. 10 Sede nde Kiristi e ma a siki aku, Aworo yaa ba ku leyi sobon de e sa ku ma gangasi anya Mirikisi, kode nkye nki ku yaa muntu sobon lepi. 11 Nde Aworo Mirikisi de dege Yesu a siki kumsha e ma a siki aku, se nsude dege Kiristi a kumsha yaa kwa beyi leyi ba nki ku te anya Aworoyi de ma a siki ku. 12 Nkaayom, yayuwa na, mu mani ANKI, sede e mani zunwa ni arinya nki de yaa bila de mu yi naba. 13 Sobon nde ku mayi zunwa a siki arinya nki, kua muntu; sede nde e ma te anya sori Aworo na ku sa nki nsu lepi mu de muntu, kwa mani leyi. 14 Sobon worede su mayi zunwa a siki Aworo Mirikisi su ma yaya Mirikisi. 15 Sobon Aworo de Mirikisi ba ku yaa sa ku de kuma bunwa de ku yi womba naba; sede ku keleba Aworo de sa kuma yaya Mirikisi, Sobon te anya sori Aworo na mua yi lepa nkye, <<Adaa! Adaa na!>> 16 Aworo Mirikisi gom nki yi nja aworomu pala nkye muma yaya Mirikisi. 17 Tunde muma yaa yi, muma nsu sigado anabirika de e ba mu ntani yi, nja mua sigado mbode Mirikisi shiriya ba Kiristi; nde mu Genbeki yiride Kiristi sha, yomuna mua man dereja nja shi.

18 Ni mani tebeshi nkye Genbeki de mu ma geni a kwanki mu mua taba gonta yi nja dereja de mua man shi a geba ba. 19 Guru mbode Mirikisi yi, sua yi memeri soseyi de Mirikisi e pelesa yaya yi. 20 Sobon kowoni mbode Mirikisi yi sua bebeta, ba ni yeda asu ba, sede sobon Mirikisi yeda de e ma yomu, nzun yomu ni sa dishiya 21 mbode Mirikisi yi nkiyeyi sua sila dege bowuta de sua yi a siki nki nsu rubu, sua samu dereja ni yenshi de Mirikisi yaa ba yaya yi. 22 Mu shina nkye ari kuzukam mbode Mirikisi yi, sua yi otum ni suwo yiride mase nsu siki yaa yi a kwanki de yaa bila yapu yaa. 23 Sede mbode Mirikisi yi kede na yaa yi otum ba; omu de muma ni Aworo npari ni kyawuta Mirikisi mua yi otum a dishiya mu mua pekye de Mirikisi e samu de muma yaya yi, de e pushe ni nki mu guru. 24 Sobon sa dishiya mu na mu sila; Sede sa dishiya a kiya mbode mua geni e ma sa dishiya na ba. Waana yaa sa dishiya a kiya mbode mu geni? 25 Sede nde mu sa dishiya a kiya mbode mua geni, mua pekye nyi ni kadishiya. 26 Yomu na, Aworo yaa sua mu nto, a siki rishi sori mu. Mu shina ko yaya na mua yi lepa ba; sede Aworo nkiya yi yaa ologba Mirikisi amomoko mu ni otum ni kelima de mua yi yaa pala ba. 27 Mirikisi de yaa kone dishiya mu e shina mbode Aworo yaa pala, sobon Aworo yaa ologba amomoko ntani yi a siki yeda ni Mirikisi. 28 Mu shina nkye a siki guru mbo Mirikisi yaa yi ANKI kyakyawu sobon worede sua so yi, worede e sukwa su sobon delili yi. 29 Sobon worede Mirikisi rigye zabi su,e sa su a keteri de su ma kankye Yaa yi, de Yaa yi ema ni pari a siki yayuwa nyowa. 30 Sobon yomu worede Mirikisi zabi su, e sukwa su; worede e sukwa su, e sa su su ma mere lepi a geba e yi, de su laba dereja yi nja shi.

31 Mina mua pala kuzukam a kiya mbo mu? Nde Mirikisi e ma aketerimu, waana yaa yi geba nja mu? 32 Mirikisi ki de ba mu Yaa yi naba, sede e munka mu nshi kankye sedeka, yaya na yaa ba mu guru mbo ba? 33 Waa pala mbodaa mumungu a kiya worede Mirikisi zabi? Mirikisi na yaa sa su de sua ma mere lepi a geba e yi. 34 Waa, deta de yaa yi nsebeki shiriya? Se Kiristi Yesu, de muntu, kode nkye, Mirikisi dege yi nleyi, e ma nani dama Mirikisi yaa ologba Mirikisi amomokomu. 35 Waa, laba mu nja so de Kiristi mayi mu? jinki na, ko ngala ko Genbeki ko nyunwa ko rishi mbo ko aseri ko muntu? 36 Yiride e ma a rubuta a beta Mirikisi nkye,

<<Sobon oku mu ma a baki aseri ni muntu kowoni kwanki;

Su la mu ma kankye timshiya de sua bila yanka.>>

37 Yi! A siki mbo guru mu bise de su nkye muma nsu nasara te anya nsude so mu. 38 Sobon yomu Ni man tabeshi nkye, ba mbode yaa laba mu ni so Mirikisi: ko muntu ko leyi, ko nsu meleku Mirikisi ko nsu solota ni bisi ko arizeni, ko kwanki mu ko ta a geba, ko worosu su yiko, 39 ko a bisi ko a kisi, ko mbo daa a siki guru mbode Mirikisi yi, yaa yiya laba mu dege so Mirikisi de yaa yi mu te anya Kiristi Yesu Obagizi mu.