1 Manki butu dege anya Bulusu, bunwa Kiristi Yesu, Mirikisi zabi yi de ema yaamanki nja de e yi doka nabari kyakyawu. 2 Nabari Kyakyawu de Mirikisi yi anikowori tun a kwanki de bise te anya Anebi yi, yiride e ma rubuta a siki takada Nsuseki. 3 Manki mu e ma a kiya ni Yaa yi, Obagizi amu Yesu Kiristi: de te anya nki, e ma dege zuriya ni seleki Dowuda la; 4 Te anya Aworo nsuseki, ni totolo sori su pelesa yi nkye e ma Yaa Mirikisi la te anya dege Yesu Kiristi a kumsha. 5 Te anya Yesu la Mirikisi ba ni aniyeri nja dama ni ma yaamanki sobon Kiristi, de ni sa ntani durinya guru de su beigaskye, sukwa beyi girima te nja shi. 6 Ema nzun oku ntani Roma, worede Mirikisi sukwa ku de ku mani Yesu Kiristi.

7 Te anya guru worede su ma Roma worede Mirikisi yaa so, e kwa sukwa ku de kuma ntani yi:

Bila de Mirikisi Adaamu nja Obagizi mu Yesu Kiristi e ba ku aniyeri yi nja zunwa selema.

8 Mpari mma gbede Mirikisi te anya Yesu Kiristi sobon guru ku, sobon guru ntani durinya su ma zi nabari beigaskye ku. 9 Mirikisi ema sheeda na sobon mbode mma pala ema gaskye la, Mirikisi de ni ma bowuta yi ndishiya daa te anya pala manki kyakyawu ni Yaa yi. Mirikisi e shina nkye mma turunwa nku a siki lepa kon kwanki. 10 Guru kwanki de mma yi lepa. Mma ologba Mirikisi nde e ma nupi yi la de kuzukam nsamu dama de ni zo anya ku. 11 Sobon Na bila de ngenku soseyi, de ni ba ku anabirika ni Aworo kyawuta de yaa sa ku sakisi nsori. 12 Mbode ni meyi nupi e shiya de e ni nja ku mu jaa nkiya mu sori guyam, de ni jaa ku sori guyam a siki beigaskye na de oku ma ku jaa ni sori guyam du. 13 Yayuwa na, na bila de ku shina nkye, a kwanki nyowa ni bila de ni zo anya ku, sede ari kuzukam mbo yi nyowa nana ni de ni zo. Na bila de ni shakiya ntani de su ma siki ku yiride ni yi a siki worede su ma Yawudawa ba. 14 Ema ANKI guru ntani akyiyana, ANKI worede ma totolo geri nja worede ma dende geri, nsu ilimi nja worede su ma ni ilimi ba. 15 Sobon yomuna, na yi memeri de ni gye ku nabari kyakyawu oku de kuma Roma.

16 Sobon yomu na zi kumnya pala nabari kyakyawu ni manki Yesu Kiristi mu ba, sobon e shiya ma sori Mirikisi de e sila ni worede su beigeskye, ni pari Yawudawa nja worede su ma Yawudawa ba. 17 Nabari kyakyawu mu e shiya pelesa yiride Mirikisi sa ntani de su yi zunwa gangasi nja shi: e ma te anya beigaskye dege pari ta karishe. Yiride beta Mirikisi pala nkye, <<Nsude yi zunwa gangasi anya Mirikisi yaman leyi te anya beigaskye.>>

18 Anwashi Mirikisi nana dege bisi a kiya guru nsu lepi nja mungu mbo ni ntani de tengele gaskye de su shina. 19 Tunde mbode e kamata su shina a kiya Mirikisi e ma a pili, Sobon Mirikisi pelesa kiya yi ba su a pili. 20 Ko tunde Mirikisi yi durinya, kyakyawu arinya yi ema a boyi ba nja sori yi ni gbogbo, guru sori arinyayi ni Mirikisi, su geni yi ni a ndani su, sua geni te anya mbode Mirikisi yi. Sobon yomu ntani woromu su ma mbodaa de sua pala ba 21 Su shina Mirikisi, sede sua beyi girima de e ma na yi ba, ko su gbede yi ba, memeko yomu, dishiya asu shina beta Mirikisi ba se mbo Odundu nja dopuwa. 22 Su nkye su man wayo, sede su ma Odundu la. 23 Momoko de su yobo Mirikisi de muntu ba, sua bowuta kamani mbode ma kankye nsusuwa ko kankye ni nama bikiya ko worede sua ja siki a kisi. 24 Sobon yomu Mirikisi sa ntani mu de su yi mbode dishiya asu yaa bila de su yi, sua yi mbo sha dola nja kumnya nja nki su. 25 Su juyi gaskye ni Mirikisi ma yaruwa, sua yi bowuta nja biya mbode Mirikisi yi memeko de su biya Mirikisi de yi su, Nsude yobo ni gbogbo ma Na yi emayomu. 26 Sobon de su yi yomu, Mirikisi la su ma mbo kumnya ni memeri nki. Ko mata su bila kwana nja minjisu su ma kwana nja nkyasu. 27 Yomuna menza du su bila mata sua kwana nja nkyasu, menza sua yi mbo kumnya nja nkyasu, sobon yomu anwashi Mirikisi yaa sonka a kiya asu, de e poro mbo mumungu de su yi. 28 Sobon ntani su ki sa dishiya a siki gaskye ni shina Mirikisi, Mirikisi sa su de su yi mbo mumungu a dishiya asu, de su yi mbode yi kyawu de su yi ba. 29 Su sika ni kowoni yiri mumungu mbo, ni mungu mbo, ni opu, nja kode yi, kishi, nja kisa ntani, topula, shishirigye ntani, nja keyi ntani a dishiya, nja beta nkyasu a beyi. 30 Nja yi mungu beta a kiya yayiwa asu, nsu geba nja Mirikisi, nsu yada ntani kiya, nsu dege kiya, nja nsu dege dolo, nsu yi tunani a turiki de su yi mungu mbo, sua ba nsu adaa su girima ba. 31 Su ma nsu reshi kiya, nsu reshi beigaskye, su ma nsu mungu dishiya, mere toseyi. 32 Su shina nkye doka Mirikisi pala nkye, worede sua yi mbo mumungu e kamata su muntu, nzun yomu su sigeba ni yi mbo worosu mu, sede sua domuna kutiri worede sua yi yiri mbo ni.