1 De mu keyi lapiya awuje ni totolo riki, mu geni geri de ma a sisika riki de sua sukwa yi Malta. 2 Ntani geri ni su yi mu aniyeri. Su wula mu wuta nja su keleba mu guru su yi mu naba sobon sua yi riki bisi nja keseyi ma. 3 Bulusu tala ntasi ni wula wuta, de yaa nya a wuta, se lodom butu sobon zapi wuta, ka nani yi. 4 De ntani geri ni geni mesi lete a nani yi, su gye nkiasu, <<Nseminji mu ema nsu kisa ntani la, ko de e sila a siki totolo riki mu, alaki ntani ma a kiya kode ma nleyi.>> 5 Se Bulusu jijika nani yi se mesi puari a siki wuta e sua yi ba. 6 Su geni kankye nani Bulusu yaa kibu ko dandani yaa puari e muntu, sede su pekye dede su geni mbodaa paru nja Bulusu ba, se su saki tunani asu nkye ema mirikisi daa na.

7 Anya ni pili daa ma ni pubiliyus, tolense ni kesa geri ni. Eshi na keleba mu bakwe yi a gizi yi kwana wuku. 8 Adaa Pubiliyus kwana agbodo mayi suwo, ni zapi nki nja suwo kwashi. Bulusu yuru anya yi Bulusu yi lepa, e ja yi nani a kiya se nseminji ni worikye. 9 De yomu paru, se guru nsu suwo de su ma a geri ni su zo se su ma worikye su. 10 ntani geri ni ba mu kyawuta nyowa a kwanki de mwa dege yuru a kwanto, su tatala mu mbo nyowa de mwa bila.

11 A beyi ni wonta wuku mu sigeba ni tepiya a siki kwanto ari damina yi mu anya ni. Ema kwanto ni Alezandiriya na de ma ni alama ni nsu togweyi boka. 12 De mu zo a Sirakus mu yi kwana wuku anya ni. 13 Dege anya ni mu sigeba ni tepiya mu zo a Rigiyum. De geri shekeri akusuka butu dege kudu, a nana ni bi mu zo a Putiyoli. 14 Anya ni mu sani worosu yayuwa nsu biya Yesu su ologba mu de mu yi kwana bokwe nja su. Ni yomu na mu zo a Roma. 15 De yayuwa de ma a Roma zi nkye mwa zo, su yi tepiya ari su ka yi Appius nja anya de sua sukwa yi anya sonka ni ntani wuku na su san mu. De Bulusu geni ntani woromu Bulusu e gbede Mirikisi e kwa ja samu sori dishiya. 16 De mu keyi Roma, su bila Bulusu de eke gizi de zunwa nja shoja de yaa kpanku yi.

17 A beyi kwana wuku e shi sukwa gabada toree ni Yawudawa. De su tala. Bulusu gye su nkye: << Yayuwa na, Eni yi mbode a kiya ni ntani mu ba ko a kiya ni alada ni nsu adaa mu, Eni su ka ni a siki Wurishelima na su la ni ba ntani ni Roma. 18 Su minya ni, su bila de su shika ni, Sobon su sani ni lepi de deta muntu ba. 19 Sede de Yawudawa yeda ba, se e mani dole de Ni te ni kara na a geba kesar, kode nkye ma yi kara ni ntani na Yawudawa. 20 E shiya sa de Ni bila de ni geni ku de ni yi beta nja ku. Tunde ema sobon nse mu de ntani Izireyila su sadishiya nkye yaa zo na su domuna ni serika mu.>>

21 Su keleba nkye, <<Mu keleba manki takada daa dege Yawudiya a kiya eke ba, ba ko yayuwa mu de zo anya mu ni beta ke ko manki daa mumungu a kiya ke ba. 22 Sede omu mwa bila de mu zi dege baki ke ko mina ma tunani ke, sobon mu shina nkye ntani su ma yi mumungu beta a kiya kunji de ki ma a shika yi mu.>>

23 Se su sa nadaa de su gomu nja Bulusu, ntani yowa su zo anya kwana laki bakwe. Tun dege sape ari nyema ema pala nja gye su guru a kiya ni solota ni Mirikisi nja kokori de a sa su yeda ni Yesu yiride doka ni Musa nja dege rubutu ni anebi. 24 Worosu asu yeda ni mbode Bulusu pala gye su, sede worosu asu yeda ni mbode e pala ba. 25 Na su samu rishi yada nja nkiasu, kapi de su bila anya ni se Bulusu yi su beta ni karishe nkye: << Aworo Nsuseki pala gaskye de yi beta nja nsu adaatolo aku te anya anebi Ishaya!

26 <Te nja ntani woromu de ki pala:

<Kwa sigeba ni zi, sede kwa gane ba;

kwa sigeba ni kone, sede kwa geni ba

27 Sobon dishiya ntani mu yi tori,

Su ripe kuni asu

su kwa ripe ndani asu.

Sobon kede su geni ni ndani asu,

su kwa zi ni kuni asu,

su kwa gane ni dishiya su

ari su juyi zo anya na, de ni worikye su.>>>

28 Sobon yomu, ku shina nkye, Mirikisi saka manki anabari sila zo anya worede su ma Yawudawa ba na. Sua zi!>> 29 De e pala yomu, se Yawudawa dege bila anya ni su ma yi rikishi soseyi nja nkiasu.

30 Bulusu zunwa a gizi de e keleba haya ari shekera bi, anya ni ema keleba guru worede su zo anya yi. 31 Bulusu beyi manki ni solota Mirikisi nja kokoyi su a kiya Obagizi Yesu Kiristi ba womba.