1 A beyi de Bulusu zi yomu, e bila Atina ta Korentiya. 2 Anya ni Bulusu san nse ni Yawudawa seni yi ma Akila, e ma nse ni Pontu, de e zo dege kesa ni Italiya nja mata e yi Bilkisu, sobon Kalaudiyu beyi doka de guru Yawudawa su bila Roma. Se Bulusu te de e geni su. 3 Sobon Bulusu ma nsu yi rugwa na yiri de osu ma sua yi rugwa, e sonka anya asu e yi ANKI nja su. 4 Kowon nana Asibi, Bulusu yaa yi gadama a siki kolonwa ni Yawudawa yaa yi kokori de ja ankeli Yawudawa nja Helenawa.

5 De Silasi nja Timoti zo dege Makidoniya, Bulusu beyi kiya e yi de beyi manki beta Mirikisi, yaa sheeda Yawudawa nkye Yesu e shina ma kiristi. 6 Sede Yawudawa su geba nja Bulusu sua basi yi, e kekebe kula ni keyi yi e gye su nkye, <<Zini aku ma a a kiya ku! Ni man sere dege lepi ku. Dege a kuzukam na kuma te anya worede su ma Yawudawa ba.>> 7 Se Bulusu bila kolonwa Yawudawa ta gizi ni Titus Yustu, nsu bowuta Mirikisi. 8 Se Kirisbu, tolense kolonwa, nja ntani gizi e yi su beigaskye nja Obagizi; nja ntani Korentiyawa nyowa de su zi Bulusu su beigaskye se su yi su tunkwasa. 9 Nana daa ndederi Obagizi yi beta nja Bulusu te anya bure yi ndani: <<Kede ki zi womba; sigeba ni beta, kede ki yi shuru. 10 Sobon ni ma nja ke, ba nsu de yaa taba kpa ke ko e zi ke suwo, sobon ni mani ntani a siki totolo geri mu.>> 11 Se Bulusu zunwa anya ni ni shekera daa ni rebi, yaa kokoyi su kelima beta ni Mirikisi.

12 De Galiyo ma tolense ni kesa Akaya, Yawudawa su gama kiya asu su yi geba ni Bulusu ari su zo nshi a geba nsu shiriya. 13 Su nkye, <<Nseminji mu>> <<Yaa kokoyi ntani de su yi bowuta Mirikisi a turiki de e taka doka amu.>>

14 De Bulusu ma bila de yi beta, se Galiyo gye Yawudawa nkye, <<Nde oku Yawudawa kwa yi beta a kiya lepi de e yi kode e yi mungu mbo, tuku de e mani nkyawu de ni zi ku. 15 Sede tunde e ke anya minya beta a kiya kelima nja seni nja doka aku, ku shiriya mbo mu nkiya aku. E ni mma taba ma anikari ni yiri mbo mu ba.>> 16 Se e kula su a laki shiriya. 17 Se guru asu su zi a kiya Sostanu tolense nsu geba a kolonwa dukwa yi a geba laki shiriya. Sede Galiyo e damu ba.

18 Bulusu zunwa a korentiya ni worosu kwanki nja nsubiya Yesu. Se e bila yayuwa e yuru a kwanto ta kesa Suriya, Bilkisu nja Akila su sa yi. Bulusu sheke kiya e yi a kesa Kankiriya kapi de e yuru a kwanto, sobon anikowori de e yi. 19 Su keyi Apisa, anya de Bulusu bila Bilkisu nja Akila. Bulusu nkiya e yi ta siki kolonwa yaa musu nja Yawudawa. 20 Se su pata yi de e zunwa nja ni woron su kwanki, sede Bulusu ki 21 Sede yaa dege bila, e yi su anikowori nkye, <<Na kuma zo nde Mirikisi yeda.>> Se Bulusu yuru a kwanto e biya ta Apisa . 22 De Bulusu keyi Keseriya, e te geshe nsubiya Yesu de su ma Antakiya.

23 A beyi de Bulusu yi woron su kwanki Antakiya, Bulusu shiriya de yi tepiya biya geri geri guru a kesa Galatiya nja Pirijiya, yaa ba nsubiya Yesu sori guyam.

24 A kwanki mu nseminji ni Yawudawa daa seni yi ni gizi ma Apolos e ma yaa kesa Alezandiriya, zo Apisa, Apolos shina mbo soseyi a siki takada Mirikisi. 25 Su kokoyi turiki ni Obagizi, e yi beta ni aniyeri nja e kwa kokoyi ntani a kiya Yesu kyakya, sede e shina kiya tunkwasa ni Yaaya kede. 26 Se Apolos para yi beta ba puari geba a siki kolonwa Yawudawa. De Bilkisu nja Akila su zi mbode Apolos yaa pala, su sukwa yi ta a gizi asu su pala gye yi beta ni Mirikisi soseyi. 27 De Apolos yaa bila de e te a kesa ni Akaya, yayuwa su beyi sori guyam su kuma rubuta nsubiya Yesu takada anya ni de su keleba yi nani bi. Nde e lesa, e ma sua su tun soseyi worede a siki aniyeri su beigaskye. 28 E shi Apolos si nasara kiya Yawudawa a geba ntani, e ba su tabeshi a siki takada Mirikisi nkye Yesu na e ma kiristi.