1 Worosu ntani butu dege kesa Yawudiya su ta geri ni Antakiya sua kokoyi yayuwa nsu biya Yesu nkye: <<Nde su butu ke yari, yiride Musa kokoyi ntani a kiya alada ba, kwa samu sila ba.>> 2 Beta mu zo totolo gadama nja reshi yeda ba Bulusu nja Barnaba anya ntani. Se su zabi Bulusu nja Barnaba, nja worosu su ntani nsu biya Yesu, de su ta Wurishelima anya ni yayamanki nja toree de su minya su a kiya butu yari. 3 De nsubiya Yesu sa Bulusu nja Barnaba, de sua yi gyewe kesa ni Pinikiya nja Samariya, sua pala yiride worede su shina Mirikisi ba su juyi. Nabari mu sa guru yayuwa yi peri siki. 4 De su zo a Wurishelima, nsubiya Yesu nja yayamanki e yi nja toree su yi Bulusu nja Barnaba naba, se su beyi nabari ni mbo de Mirikisi yi anya su. 5 Se worosu beigaskye ni Yesu de su ma ni keshi parisiyawa su dege a bisi nkye, <<Dole nsu worede shina Mirikisi ba sua butu su yari nja biya doka de Musa kokoyi.>> 6 Yayamanki nja toree ni nsu biya Yesu gomu de kone mbode beta de su pala. 7 A beyi de su yi beta nyowa, Biturusu dege a bisi gye su nkye: <<Yayuwa, ku shina worosu su kwanki de bise Mirikisi yi zabi ni a siki aku nkye worede su shina Mirikisi ba sua zi manki ni nabari kyakyawu anya na tukuna sua yeda. 8 Mirikisi de shina dishiya konse, e pala nkye e yeda nsu e ba su Aworo nsuseki, yiri de e ba mu. 9 Mirikisi nana bombom ba a sisika mu nja su, e wonkye dishiya asu sere te turiki beigaskye. 10 Kuzukam, se mina sa kwa gwada Mirikisi anya ni jaa Yayagizi ganse totolo a kiya de omu ko nsu Adaatolo amu mu ma sori la ba? 11 Sede! Mu beigaskye anya ni aniyeri Obagizi amu Yesu mu samu sila, yiride osu ma su samu.>>

12 Se guru yowa ntani su yi shuru sua zi beta de Barnaba nja Bulusu sua pala a kiya mamanki alama nja mbo mamanki de Mirikisi yi worede su shina Mirikisi ba sobon omu. 13 De su gama yi beta, Yakubu dege a bisi yi beta nkye: <<Yayuwa, ku zi ni. 14 Sima gye mu yiri de dege pari Mirikisi so ntani worede su ma nsu biya yi ba butu a pari de su ma na yi. 15 Da mu e shiya ma kyakya kelima ni anebi de e ma rubuta a siki takada ni Mirikisi:

16 << <A beyi da mu Na kuma,

de ngina rugwa ni Dowuda de juru.

E puari Na kuma gina yi,

nja de Na kuma gina yi,

17 sobon yomu ntani worede su rigye sua bila Obagizi,

se guru worede su ma yawudawa ba sua sukwa su ma na yi,

nzi Obagizi, nsu de e yi mbo mu>

18 De su shina yi tun kwanki de bise.

19 <<Nsu mu na ma shiriya na, Yakubu sigeba, kede mu ba worede su shina Mirikisi ba Genbeki de su kuma zo anya e yi. 20 Sede mu rubuta keyi su, de mu gye su kede su si mbosi de ema ni rebi, de sua ba boka, ko nungwe ko suku nama de e man zini a siki yi. 21 Dun Musa beyi manki mu kowon geri a kwanki ni pari su kwa karanta yi a siki kolonwa kowon nana ni asibi.>>

22 Se yayamanki nja toree, nja guru nsubiya Yesu, yeda de su zabi worosu su a siki asu de su saka su manki ta Antakiya nja Bulusu nja Barnaba. Su zabi Yawuda de sua sukwa yi nkye Barsabba nja Sila, de su ma toree a siki nsu biya Yesu. 23 Ni manki nkye:

Yayamanki nja toree, yayuwa aku,

Te anya ni nsu worede su shina Mirikisi ba nsu biya Yesu Antakiya nja kesa Suriya nja ni Kilikiya:

Mma gesheku.

24 Mu zi nabari nkye worosu su dege siki amu su zo sua dege dishiya ku, ni mbode sua pala ma ku, dama dishiya ku shiri ni mbode sua kokoyi. 25 Sobon yomu guru amu yeda, mu zabi worosu de mu saka su nja nsu yayuwa de mua so Barnaba nja Bulusu, 26 Worede su beyi leyi su sobon seni ni Obagizi mu Yesu kiristi. 27 Nkaa yomu mu saka Yawuda nja Sila osu nkiya su de su tabata aku gye ku kelima ni mbode mu rubuta. 28 Aworo nsuseki nja mu geni yi kyawu kede mu ja ku keyi de man loni pi daa de Mirikisi yeda: 29 Sede oku, kede ku si mbosi de su ba boka sedeka, ko nama de ema ni zini, ko daa de su muruda yi ko kwana nja mata nse ku yi kokori de ku kiyaye mbo worosu mu guru.

Ku pushe lapiya.

30 Se su saka Yawuza nja Sila su ta Antakiya, de su tala nsu biya Yesu anya daa de su ba su manki. 31 De ntani karanta takada ni su yi peri siki sobon manki de su zi ja sori guyam. 32 Yawuda nja Sila, osu ma su ma anebi, su yi beta soseyi de ba yayuwa sori guyam. 33 A beyi de su yi worosu su kwanki piri anya ni, se yayuwa seleme su ni anabirika ni selema de su kuma ta anya worosu de su saka su. 34 Sede Sila geni yi kyawu de e zunwa anya ni tuku 35 Sede Bulusu nja Barnaba su sakisi Antakiya, anya de Osu nja worosu ntani nyowa su kokoyi nja beyi manki kelima ni Obagizi.

36 A beyi worosu kwanki a geba Bulusu gye Barnaba nkye, <<Zo de mu kuman beyi de mu geni yayuwa a guru geri de mu beyi manki kelima ni Obagizi nja de mu geni yiri de sua yi.>> 37 Barnaba yaa so de e la Yaaya, nsude sua sukwa yi Marikusu, de te nja su, 38 sede Bulusu yi tunani de e te nja Marikusu ba, sobon de da e bila su a Papiliya e sigeba nja su a yanki ba. 39 Su samu rishi yeda soseyi nja kiya su ari su laba kiya su. Barnaba la Marikusu su yuru a kwanto ta Sayipuru, 40 sede Bulusu zabi Sila su te ma su, yayuwa su yi lepa de aniyeri ni Mirikisi e ma nja su. 41 Bulusu nja Sila sigeba ni tepiya biya ni Suriya nja Kilikiya, e ja nsubiya Yesu sori dishiya.