1 Sede a kwanki de Apolos ma a siki Korentiya, Bulusu bibiya kesa de gyewe Apisa, e san worosu su nsubiya Yesu. 2 Se e minya asu nkye, <<Ku keleba Aworo Nsuseki kwanki de ku beigaskye?>>

Su keleba nkye, <<Yi, mu taba zi nkye Aworo Nsuseki ma ba.>>

3 Se Bulusu minya su nkye, <<Woni yiri tunkwasa su yi ku nshi?>>

<<Su keleba nkye tunkwasa de Yaaya yi,>>

4 Bulusu nkye, <<Tunkwasa ni Yaaya e ma tunkwasa ni juyi bila lepi na. Yaa gye ntani su beigaskye nja nsude yaa zo a beyi e yi, e shina e ma Yesu.>> 5 De su zi yomu, se su yi su tunkwasa a siki seni Obagizi Yesu. 6 De Bulusu sa su nani a kiya, Aworo Nsuseki sonka a kiya asu, su kuma yi beta ni worosu su arishiya sua pala mbode a paru a geba. 7 Su ma ntani gom sha bi na guru asu.

8 Bulusu yuru a siki kolonwa Yawudawa e kuma yi beta ba puari geba ni wonta wuku, yaa ja ankeli asu a kiya solota gizi Mirikisi. 9 Sede worosu su a siki asu yi tori kiya; su ki beigaskye a siki ntani sua yi mungu beta a kiya turiki ni Obagizi Bulusu bila su. Bulusu la nsubiya Yesu te anya daa ta kokoyi su kowon nana a makaranta ni Tiranus 10 Mbo mu sigeba ari shekera bi, sobon guru Yawudawa nja Helenawa de sua zunwa a kesa Asiya zi beta ni Obagizi.

11 Mirikisi yi mbo mamanki anya ni Bulusu, 12 Yomu na ko gyele nja keikei sa nki Bulusu de kpa nki yi su la kpa nsu suwo, se suwo asu worikye e kwa kula mungu aworo bila asu.

13 Worosu Yawudawa su gyewe kowoni anya sua kula mungu aworo sua yi kokori de su yi anpani seni ni Obagizi Yesu a kiya worede su ma ni mungu aworo. Sua pala nkye, <<A siki seni Yesu, nsu de Bulusu yaa beyi manki e yi, mu ba ku doka ku butu.>> 14 Se yaya bokwe ni Sigeba, totolo pirisi ni Yawudawa, sua yi mbo mu. 15 Nana daa mungu aworo ni keleba su, <<Ni shina Yesu , ni saki shina Bulusu, oku ku ma waa?>> 16 Se nse nsu mungu aworo ni tirimi ja su e ma sori pi su guru. e ba su dukwa soseyi ari su yi gudu a woze gizi ni totombolo ni zini suwo a nki asu.

17 De Yawudawa nja Helenawa shina mbo mu worede sua zunwa Apisa, guru asu su womba ka su, se su ka seni ni Obagizi Yesu ni girima soseyi. 18 Yowa ntani de su beigaskye su zo a pili sua pala mungu mbo asu. 19 Ntani nyowa de sua yi sapi su tala takada sapi asu se su suwuta yi a geba ntani. de su yi lisapi gyolo keyi sapi asu, se e keyi aziripa dubu amisin. 20 A turiki mu na kelima beta ni Obagizi sigeba e kwa ja sori soseyi.

21 E beyi de guru mbo mu paru, Bulusu shiriya de te a Wurishelima, se e biya a Makidoniya nja Akaya. <<Bulusu nkye, a beyi de ni keyi anya ni,>> <Dole Na ta Roma du.>> 22 Bulusu saka nsu de sua sua yi to ANKI ntani bi, Timoti nja Erastu, de su ta Makidoniya, e shi zunwa a gunduma kesa ni Asiya piri.

23 A kwanki ni su yi dege ankeli soseyi a kiya turiki. 24 Sobon nsu mikila daa ma de seni yi ma Dimitiriya, ema kila keikei ni laki boka ni zinari ni Atemis, ema zo su ni bije nyowa. 25 E sukwa su gom, nja worede sua yi jari yiri ANKI nsum, e gye su nkye: <<Ntani, ku shina mwa keleba riba gyolo nkyawu dege jari mu. 26 Ku geni ku kwa zi yiri de Bulusu juyi ntani nyowa Apisa nja guru kesa ni Asiya.Ema pala nkye mirikisi de su yi nnani ema mirikisi na ba. 27 Yaa ma ni asari ba yaa bebeta seni bije amu kyakyawu kin ba, sede ari laki boka totolo ni Atemis sua la ma girima ba, nsu de sua bowuta yi a kesa Asiya nja ari guru durinya sua bowuta yi.>>

28 De su zi mbo mu, su yi anwashi su dege murinya yi kuruwa nkye: <<Girima ma nja Atemis ni Apisa!>> 29 Se a kwanki piri guru ntani geri rikishe. se ntani sukwa gudu te anya tala pegye, su ka Gayusu nja Aristakus, oboki tepiya ni Bulusu butu Makidoniya, 30 Bulusu yaa bila de butu a pili a siki yowa ntani, sede nsubiya Yesu nani yi. 31 Nzun worosu su a siki toree ni gunduma, oboki ni Bulusu, su saka manki sua ologba yi kede yuru a siki ntani de su tala pegye ni ba.

32 Se yowa ntani de tala su rikishe: Worosu su sua yi kuruwa a kiya mbo daa, worosu su kuma a kiya mbo daa. yowa a siki asu shina mbode sua yi anya ni ba. 33 Se Yawudawa su kiri Alezanda ta geba, se worosu su nyowa yi kuruwa nkye e shina yi mbo mu de para. E pala nkye su yi shuru e shi yaa yi beta a geba ntani. 34 Sede de su shina nkye e ma nse ni Yawudawa na, guru asu su yi kuruwa ari keripi bi: <<Girima ma nja ke Atemis ni Apisa!>>

35 Se sakada geri sa ntani yi shuru e gye su nkye: Ntani Apisa, ko guru durinya shina nkye totolo geri ni Apisa na sua kula ni laki lepa nsu girima Atemis nja dunsi nsuseki, de puari dege bisi? 36 Nkaa, tunde mbomu e ma musu ba, yaa yi kyawu de ku yi shuru kede ku yi mbo seberi. 37 Ku zo ni ntani woromu anya mu, ba de su yi bolowa ko su saba boka ni Artemis ba. 38 Nde, Dimitiriya nja oboki bije e yi su ma ni beta a kiya nse daa, laki shiriya ma a bure nsu yi ANKI kuma su ma. Se ku yuru ni kara asu. 39 Nde mbodaa na kwa bila de ku zo nshi, ku shiriya yi a siki doka anya de kwa tala. 40 A yiri de e ma, mu ma a siki aseri a kiya tawaye ni yawu. sobon mu ma ni delili de sa dege dishiya mu paru ba.>> 41 A beyi e pala yomu, se e seleme ntani de su tala.